ဆိုးလ်၊ ဇွန် ၁ ။ ။ “Twinkle twinkle little star” သီချင်းကို အသက် ၈၀ ကျော် အဘွား နမ်းယန်ဆွန်းဟာ သူ့ရဲ့ ဂျူနီယာ အတန်းဖော် အသက် ၇၀ တန်း အဘွားအရွယ် မူလတန်းကျောင်းသူတွေနဲ့အတူ သံပြိုင်သီဆိုနေပါတယ်။
တောင်ကိုရီးယားမှာ အသက်ကြီးပိုင်း လူဦးရေက ဒီရေအလား မြင့်မားလာသလို နိုင်ငံရဲ့ ကျေးလက်တောနယ်ပိုင်းက လူတွေကလည်း မြိို့ပြဆီ ရေကြည်ရာမြက်နုရာ ရွှေ့ပြောင်းအခြေချတာတွေ ပိုများလာပါတယ်။
အဲဒါကြောင့် ကျေးလက်က မူလတန်းကျောင်းတွေမှာ ကျောင်းသားကျောင်းသူဦးရေဟာ သိသိသာသာ နည်းပါးကျဆင်း လာတာကို ရင်ဆိုင်လာရပါတယ်။
ဒီ ပြဿနာကို မူလတန်းကျောင်းတစ်ချို့ကတော့ အသက် လေးငါးခြောက်နှစ်အရွယ် တပည့်တွေ နေရာမှာ အသက် ၇၀ ကျော် ၈၀ အရွယ် အဘွားကြီးတွေကို တပည့်အဖြစ် စာသင်ခန်းထဲ ဆွဲသွင်းပြီး ဖြေရှင်းလာပါတော့တယ်။
မီးစာကုန် ဆီခန်းအရွယ် အဲဒီအဘွားတွေဟာ သူတို့ ငယ်ရွယ်စဉ်ဘဝက စာသင်ခွင့် မရခဲ့တဲ့ စာမတ်သူတွေဖြစ်ပြီး သူတို့ကို စာရေးတတ်၊ ဖတ်တတ်အောင် မူလတန်းကျောင်းတွေက အနီးကပ် သင်ကြားပေးနေတာ ဖြစ်ပါတယ်။
“အဘွားက စာမတတ်လို့ အခြားသူတွေက အထင်သေးတဲ့ အကြည့်နဲ့ ကြည့်တယ်လို့ မကြာခဏ ခံစားခဲ့ရတယ်။”လို့ ဝုဒေါင်းမူလတန်းေကျောင်းမှ ဒုတိယတန်းကျောင်းသူ အဘွားအို နမ်းယန်ဆွန်းက ပြောပါတယ်။
အဘွား နမ်းယန်ဆွန်းဟာ ဒုတိယတန်း ကျောင်းသူ အဘွားအို သုံးဦးမှာ အသက်အကြီးဆုံး ကျောင်းသူပဲ ဖြစ်ပြီး သချာင်္က သူ အပိုင်နိုင်ဆုံး ဘာသာဖြစ်တယ်လို့ ဆိုပါတယ်။
“ဂဏန်းလေးတွေကို ပေါင်းရတာ နုတ်ရတာ ပျော်ဖို့ ကောင်းတယ်။”လို့ တစ်ခစ်ခစ်နဲ့ ရယ်ရင်း အဘွားအို နမ်းက ပြောပါတယ်။
“အဘွား သွားနိုင်လာနိုင်ပြီး ကျန်းမာနေသရွေ့ ဒီကျောင်းကို လာတက်နေချင်ပါတယ်။”လို့ အဘွားအို နမ်းက ပြောခဲ့ပါတယ်။
