ရန်ကုန်၊ မေ ၂၃ ။ ။ မိုးကြိုးပစ်ခံရမှုကြောင့် ၃ ရက်အတွင်း မန္တလေးတိုင်းဒေသကြီး၊ ပဲခူးတိုင်းဒေသကြီး၊ ဧရာဝတီတိုင်းဒေသကြီးနှင့် ကရင်ပြည်နယ်တို့တွင် သေဆုံးသူ ၆ ဦးအထိ ရှိကြောင်း သိရသည်။
ဖြစ်စဉ်မှာ မေ ၂၀ ရက်၊ ညနေ ၄ နာရီ ၃၅ မိနစ်အချိန် ဧရာဝတီတိုင်းဒေသကြီး၊ အိမ်မဲမြို့နယ်၊ ညောင်ပင်စုကျေးရွာနေ အသက် ၃၅ နှစ်အရွယ် အောင်စိုးဆိုသူမှာ စပါးစိုက်ရန်အတွက် လယ်ကန်သင်းများပိတ်နေစဉ် မိုးကြိုးပစ်ခတ်ခဲ့ရာ နှာခေါင်း၊ ဝဲပါး၊ လက်မောင်း၊ ဝဲခါးစောင်း ပွန်းပဲ့ညိုမဲဒဏ်ရာများဖြင့် အခင်းဖြစ်နေရာ၌ သေဆုံးခဲ့သည်။
အလားတူ ယင်းနေ့ ညနေ ၅ နာရီ၊ ၄၀ မိနစ်အချိန်တွင် ဟင်္သာတခရိုင်၊ လေးမျက်နှာမြို့နယ်၊ ညောင်ပင်ကွင်း ကျေးရွာ နေ အသက် ၁၄ နှစ်အရွယ် အောင်ကိုချစ် အပါအဝင် ၄ ဦးတို့မှာ ကျေးရွာအနီးလယ်ကွင်း၌ စပါးကျဲနေစဉ် မိုးကြိုးပစ်ခံခဲ့ရသည်။
မိုးကြိုးပစ်ခတ်မှုကြောင့် အောင်ကိုချစ်တွင် ဝဲရင်အုံညိုမဲဒဏ်ရာရရှိ၍ အခင်းဖြစ်နေရာ၌ သေဆုံးခဲ့ပြီး အသက် ၅၆ နှစ်အရွယ် ဦးသန်းထွန်းပါ ၃ ဦးတို့တွင် ဒဏ်ရာများရရှိခဲ့သဖြင့် လေးမျက်နှာပြည်သူ့ ဆေးရုံသို့ပို့ဆောင်ခဲ့ရ ကြောင်း သိရသည်။
အလားတူ မေလ ၂၀ ရက်နေ့၊ ည ၆ နာရီခွဲအချိန် ကရင်ပြည်နယ်၊ လှိုင်းဘွဲ့ဲမြို့နယ်၊ ကော့စိန်ချောင်းဝ ကျေးရွာ နေ အသက် ၄၅ နှစ်အရွယ် မောင်လူကူးနှင့် အသက် ၆၄ နှစ်အရွယ် ဦးသာအောင် ၂ ဦးသည် မောင်လူကူး၏ နေအိမ်ခေါင်မိုးအား ပြုပြင်နေစဉ် မိုးကြိုးပစ်ခံခဲ့ရသည်။
မိုးကြိုးပစ်ခတ်မှုကြောင့် မောင်လူကူးတွင် ရင်ဘတ်၊ ဝဲခါးရိုး၊ ကျောကုန်း ညိုမဲဒဏ်ရာများရရှိကာ အခင်းဖြစ် နေရာ၌ သေဆုံးခဲ့ပြီး ဦးသာအောင်တွင် ကျောကုန်းညိုမဲဒဏ်ရာ(မစိုးရိမ်ရ) ရရှိခဲ့သဖြင့် ရွှေဂွန်းတိုက်နယ် ဆေးရုံသို့ ပို့ဆောင်ဆေးကုသခဲ့ရကြောင်း ရဲတပ်ဖွဲ့၏ သတင်းထုတ်ပြန်ချက်တွင် ပါရှိသည်။
မေလ ၂၁ ရက်နေ့၊ ညနေ ၆ နာရီ ၃၀ မိနစ်အချိန် ဧရာဝတီတိုင်းဒေသကြီး၊ ဝါးခယ်မမြို့နယ်၊ မြဂိုးကြီး ကျေးရွာတွင် မိုးကြိုးထိမှန်၍ အမျိုးသမီးတစ်ဦးသေဆုံးသွားခဲ့ပြီး အလားတူ မွန်းလွဲ ၂ နာရီခွဲအချိန် မိုးရွာသွန်း ကာ မိုးကြိုးပစ်ခတ်မှုကြောင့် ဟင်္သာတမြို့နယ်၊ မရမ်းချိုကျေးရွာနေ အသက် ၅၃ နှစ်အရွယ် ဦးတင်ထွန်းအား မိုးကြိုးထိမှန်ခဲ့ပြီး ဒဏ်ရာများရရှိခဲ့ကြောင်းသိရသည်။
မေလ ၂၂ ရက်နေ့ ည ၇ နာရီအချိန် မန္တလေးတိုင်းဒေသကြီး၊ ကျောက်ပန်းတောင်းမြို့နယ် သီးကုန်း ကျေးရွာတွင် မိုးကြိုးပစ်ချခံရ၍ အမျိုးသမီးတစ်ဦးသေဆုံးသွားခဲ့ပြီး ပျော်ဘွယ်မြို့နယ်၊ ညောင်ရွှေကျေးရွာတွင် မိုးကြိုးပစ်ချခံရ၍ မိုးကြိုးစက်ကွင်းထိမှန်ကာ အဆိုပါကျေးရွာနေ အသက် ၄ဝ အရွယ် ဒေါ်သင်းသင်းခိုင်တွင် ဒဏ်ရာများရရှိခဲ့သဖြင့် မိတ္ထီလာပြည်သူ့ဆေးရုံတွင် ဆေးကုသမှုခံယူလျက်ရှိကြောင်း ရဲထုတ်ပြန်ချက်အရ သိရသည်။
မေလ ၂၂ ရက်နေ့တွင်ပင် ညနေ ၃ နာရီအချိန် ပဲခူးတိုင်းဒေသကြီး၊ ပဲခူးမြို့နယ်၊ မြောက်ဆက်အင်းကျေးရွာ တွင် အသက် ၁၁ နှစ်အရွယ် ရဲထက်နိုင် ဆိုသည့် ကလေးမှာ ကျေးရွာအနီးရှိ လယ်ကွင်း၌ ကျွဲကျောင်းနေစဉ် မိုးကြိုးပစ်ချခံရ၍ ဒဏ်ရာများရရှိကာ အခင်းဖြစ်နေရာ၌ပင် သေဆုံးသွားကြောင်းသိရသည်။
ယခုလများအတွင်း တစ်နိုင်ငံလုံးအတိုင်းအတာအနေဖြင့် မိုးကြိုးပစ်မှုအန္တရာယ်ကို ဖြစ်စေပေါ်စေနိုင်သည့် မိုးတိမ်တောင်များကို ဂရုပြုရန်လိုကြောင်း မိုးလေဝသပညာရှင် ဒေါက်တာထွန်းလွင်က သတိပေးထားသည်။
