ရွှေဘို၊ မေ ၉ ။ ။ စစ်ကိုင်းတိုင်းဒေသကြီးအတွင်းရှိ ရွှေဘိုထောင်ဆူပူမှုကို လုံခြုံရေးတပ်ဖွဲ့ဝင်များမှ ထိန်းသိမ်းနိုင်ပြီ ဖြစ်ကြောင်း ယင်းနေရာသို့ ရောက်ရှိနေသည့် မဇ္ဈိမသတင်းထောက်မှ ပြောသည်။
အဆိုပါ ဆူပူမှုတွင် အကျဉ်းသားများ တန်းတူအခွင့်အရေးရရှိရေး၊ ထောင်ပြောင်းရွှေ့ခွင့်ရရှိရေး၊ လူသတ်မှု/ မူးယစ်ဆေးဝါး စသည့်ပုဒ်မများဖြင့် ကျခံနေသည့် အကျဉ်သားများအား နှစ်ရှည်ထောင်ဒဏ်မှ ဖြေလျော့ ပေးရေး၊ ထောင်သားများ ဆူပူ၍ ပျက်ဆီးသွားသည့် ပစ္စည်းများနှင့် ယခုဆူပူမှုများအား အရေးမယူရေးအတွက် တောင်းဆိုခဲ့ကြသည်။
ထောင်ဆူပူမှုကို မေလ ၈ ရက် ညနေ ၄ နာရီအချိန်မှ မေလ ၉ ရက် နေ့လယ်ပိုင်းအထိ ဖြစ်ပွားခဲ့ပြီး တပ်မတော် နှင့် လုံခြုံရေးရဲတပ်ဖွဲ့ဝင်များ၊ အကျဉ်းထောင်ဝန်ထမ်းများမှ သေနတ်ပစ်ဖောက်ခြင်း၊ မျက်ရည်ယိုဗုံးများပစ်၍ လူစုခွဲခြင်းကို ပြုလုပ်ခဲ့ကြသည်။
အဆိုပါ အကျဉ်းထောင် ဆူပူမှုဖြစ်စဉ်သို့ တိုင်းဒေသကြီး ဝန်ကြီးချုပ်နှင့် အဖွဲ့မှ လာရောက်ညှိနှိုင်းခဲ့သော်လည်း ပြေလည်ခြင်းမရှိခဲ့သဖြင့် အင်းအားသုံဖြေရှင်းခဲ့ရကြောင်း ဆူပူမှုကြောင့် အကျဉ်းသား ၄ ဦး သေဆုံးခဲ့ပြီး ၂၀ ဦး ထက်မနည်း ဒဏ်ရာရှိခဲ့ကြောင်း သိရသည်။
ယခုဖြစ်ပွားသော ရွှေဘိုထောင်ဆူမှုသည် ဒုတိယအကြိမ်မြောက်ဖြစ်ပြီး အကျဉ်းထောင်၌ အကျဉ်းသားများမှ နိုင်ငံတော်သီချင်း သီဆိုပြီး တန်းတူညီမျှအခွင့်ရေး ရရှိရေးများကို သံပြိုင်အော်ဟစ်၍ ဆန္ဒထုတ်ဖော်ခဲ့ကြသည်။
အဆိုပါ ရွှေဘိုထောင် ဆူပူမှုအား လူမှုကွန်ယက်စာမျက်နှာတွင် Live ဗီဒီယို မှတ်တမ်းများ ပျံနှံခဲ့သည့် အပေါ် ဝေဖန်မှုများစွာရှိနေသည်။
