ရခိုင်ဒေသတိုက်ပွဲများနှင့် အရပ်သားတို့ ထိခိုက်သေဆုံးမှု

By အောင်ငြိမ်းချမ်း နှင့် ခင်မို့မို့လွင်
27 April 2019
ရခိုင်ဒေသတိုက်ပွဲများနှင့် အရပ်သားတို့ ထိခိုက်သေဆုံးမှု
မြောက်ဦးမြို့ ကျေးလက်ဒေသ ပစ်ခတ်မှုများကြောင့် ခန္ဓာကိုယ်အနှံ့ ဒဏ်ရာရခဲ့ပြီး ရန်ကုန်၊ မြောက်ဥက္ကလာပဆေးရုံတွင် ကုသမှုခံယူနေသော မပေါက်စ (ဓာတ်ပုံ - ခင်မို့မို့လွင်/Myanmar Now)

ရခိုင်ပြည်နယ်မြောက်ပိုင်း ကျေးလက်ဒေသတစ်ခုရှိ ၂၄ နှစ်အရွယ် မပေါက်စသည် နံနက်ပိုင်းလုပ်ငန်းခွင်မဝင်မီ သနပ်ခါးလိမ်းနေစဉ် သေနတ်သံများ ကြားလိုက်ရသည်။

အိမ်ထဲအထိ ရောက်လာသည့် ကျည်ဆံတချို့က ကွမ်းယာဆိုင်သွားရန် အလှပြင်နေသည့် မပေါက်စကို ထိမှန်ရာ  မပေါက်စလည်း ဦးခေါင်းနှင့်  ခန္ဓာကိုယ်အနှံ့ ဒဏ်ရာရပြီး သတိလစ်သွားသည်။

အိမ်ထဲမှ သူနှင့် သက်တူရွယ်တူ လုပ်ဖော်ကိုင်ဘက် မစံပယ်မှာမူ နေရာတွင်ပင် ပွဲချင်းပြီး သေဆုံးသည်။

ဤသို့ဖြင့် မတ် ၂၉ နံနက်စောစောပိုင်းတွင် မြောက်ဦးမြို့ မြောက်ဘက် ကိုးမိုင်ခန့် အကွာရှိ အောက်သားကန်ရွာမှာ တိုက်ပွဲနယ်မြေ ဖြစ်သွားခဲ့သည်။ ကျည်ဆံများက အခြား ရွာသား ၆ ဦးထက် မနည်းကို ထိမှန်ခဲ့ပြီး ၎င်းတို့အနက်မှ  ၆၅ နှစ်အရွယ် အမျိုးသားတစ်ဦး သေဆုံးသွားသည်။

တိုက်ပွဲများသည်  တပ်မတော်နှင့် AA အဖွဲ့ဟု ခေါ်ကြသော ရက္ခိုင့်တပ်မတော်ကြား ဖြစ်ပွားနေခြင်း ဖြစ်သည်။ ရခိုင်ပြည်နယ်မြောက်ပိုင်း မြို့နယ်အများအပြားတွင် ပေါ်ပေါက်နေသော ပစ်ခတ်မှုများတွင် အရပ်သားတို့ ဒဏ်ရာရ၊ သေဆုံးမှု များပြားလာသည်။

သို့သော်လည်း နေအိမ်အတွင်း ရောက်လာသော ကျည်ဆံများအတွက် မည်သည့်အဖွဲ့အစည်းကမျှ ၎င်းတို့တွင် တာဝန်ရှိကြောင်း ပြောဆိုခြင်း မရှိသေးပေ။

ဖမ်းဆီးမှုများ

တိုက်ပွဲဖြစ်သည့်နံနက်က မပေါက်စတို့၏ ရွာအတွင်းသို့  တပ်မတော်သား  ၅၀ ထက် မနည်း ရောက်လာသည်။

ကလေးလူကြီးမကျန် ရွာသားအားလုံးနီးပါး ရွာလယ်လမ်းမကြီးတွင် မနက် ၆ နာရီမှ ၁၁ နာရီအထိ စုထိုင်နေရစဉ် စစ်သားတို့က နေအိမ်ထဲ ဝင်ရောက် ရှာဖွေကြသည်ဟု ရွာသား ဦးအောင်သန်းညွှန့်၊ ဦးဖိုးသားအောင်နှင့် အခြား ၃ ဦးက Myanmar Now ကို ပြောသည်။

ဒေသခံတို့ AA အဖွဲ့နှင့် ပတ်သက်မှုရှိမရှိ  စစ်ဆေးမေးမြန်းသည်ဟု ဆိုသည်။ စစ်သားများက မောင်ဖြူရှည် (အသက် ၄၅)၊ ဦးဘထွန်း(၆၂)၊ ဦးလှသိန်းမောင်(၅၀)၊ ဦးစိန်ထွန်း(၄၀)၊ ကိုနိုင် (၄၀) တို့ကို ဖမ်းဆီးခေါ်ဆောင်သွားပြီး နောက်ပိုင်းတွင်  မတရားအသင်း ဆက်သွယ်မှု ပုဒ်မ ၁၇(၁) ဖြင့် အမှုဖွင့်လိုက်သည်ဟု  ဒေသခံတချို့က ပြောသည်။

တပ်မတော် သတင်းမှန်ပြန်ကြားရေး အဖွဲ့ အတွင်းရေးမှူး ဗိုလ်မှူးချုပ်ဇော်မင်းထွန်းက ထိုသို့ အမှုဖွင့်ထားကြောင်း အတည်ပြုသည်။ 

ရွာအတွင်းသို့ ဝင်ရောက်ရှင်းလင်းရခြင်းမှာ  AA အဖွဲ့ဝင်များက ရွာထိပ်မှနေ၍ ပစ်ခတ်တိုက်ခိုက်ပြီး ရွာအတွင်း ဝင်ရောက် ထွက်ပြေးခြင်းကြောင့်ဖြစ်သည်ဟု ဗိုလ်မှူးချုပ်ဇော်မင်းထွန်းက ပြောသည်။

ရက္ခိုင့်တပ်မတော် AA အဖွဲ့၏ ပြောခွင့်ရ ခိုင်သုခကမူ ထိုနေ့က အောက်သားကန်ရွာအနီး တိုက်ပွဲဖြစ်ပွားခြင်း မရှိကြောင်း ငြင်းဆန်ထားသည်။ 

ထိုနေ့က နေပြည်တော်တွင် ပြုလုပ်သည့် သမ္မတရုံးသတင်းစာရှင်းလင်းပွဲတွင် ရခိုင်မြောက်ပိုင်း တိုက်ပွဲများကြောင့် ၂၀၁၈ နိုဝင်ဘာလမှ အစပြုပြီး  အရပ်သားသေဆုံးသူ ၁၂ ဦးနှင့် ဒဏ်ရာ ရရှိသူ ၂၀ ထက်မနည်း ရှိနေကြောင်း ထုတ်ပြန်ခဲ့သည်။

myanmar_now_1.jpg

၂၀၁၉ ဇန်နဝါရီလက တွေ့ရသော ရခိုင်ဒေသ စစ်ရှောင်စခန်း မြင်ကွင်းတစ်ခု (ဓာတ်ပုံ - အောင်ငြိမ်းချမ်း/Myanmar Now)

တိုက်ပွဲများက ရပ်ကွက်ကျေးရွာအတွင်း ရောက်ရှိလာတတ်ရာ  ဒေသခံတို့သည် ရွာပြင်မထွက်၊ အိမ်ပြင်မထွက်ဘဲနေလျှင်ပင် လုံခြုံမှု မရှိတော့ပေ။

ဇန်နဝါရီ ၂၆ ရက်နေ့က  ရသေ့တောင်၊ သမီးလှကျေးရွာရှိ နေအိမ်တွင် ထမင်းစားနေသော ပထမတန်းကျောင်းသား မောင်နိုင်စိုး၏ ဦးခေါင်း ကျည်သင့်ခဲ့ရာ ၎င်းကို ကုသမှုပေးရန် ရန်ကုန်သို့ ခေါ်ဆောင်စဉ် လမ်းတွင် သေဆုံးသည်။

ဖေဖော်ဝါရီ ၂ဝ ရက်နေ့က  ရသေ့တောင်၊ မင်းဖူးရွာမှ ၁၈ နှစ်အရွယ် မရီရီစိုး နေအိမ်တွင် မိသားစုနှင့် ရှိနေစဉ် ဦးခေါင်းကျည်သင့်ပြီး ပွဲချင်းပြီး သေဆုံးသည်။

ဧပြီ ၃ ရက်နေ့  ဘူးသီးတောင်မြို့နယ် ပစ်ခတ်မှုများတွင်  ရေချမ်းပြင်၊ သပြုချောင်း၊ သင်းတောင် စသည့်  ရွာများမှ သေဆုံးသူ ၅ ဦးထက်မနည်း ရှိသည်ဟု သိရကြောင်း ကျေးရွာအုပ်ချုပ်ရေးမှူး တစ်ယောက်ကို ကိုးကားပြီး အမျိုးသားလွှတ်တော်အမတ် ဦးမောင်ကျော်ဇံက ပြောသည်။  

ရဟတ်ယာဉ်ပေါ်မှ ပစ်သည်ဟူသော  ဒေသခံတချို့၏ စွပ်စွဲချက်နှင့် ပတ်သက်ပြီး  ထိုသို့ ပစ်ခတ်ခြင်း ရှိမရှိ မသိရှိရသေးကြောင်း အနောက်ပိုင်းတိုင်းစစ်ဌာနချုပ် တိုင်းဦးစီး ဗိုလ်မှူးကြီးဝင်းဇော်ဦးက ဆိုသည်။

တပ်မတော်ယာဉ်တန်း မိုင်းဆွဲ တိုက်ခိုက်ခံရအပြီး တုန့်ပြန် ပစ်ခတ်မှု ရှိခဲ့သည်ဟု ဗိုလ်မှူးကြီးဝင်းဇော်ဦးက ပြောသည်။

တိုက်ပွဲတို့ကြောင့်  စစ်ရှောင်ဦးရေလည်း ၂၆,၀၀၀ ကျော်လာပြီဟု အစိုးရက ဧပြီလဆန်းတွင် သတင်းထုတ်ပြန်ထားသည်။

စစ်တွေအခြေစိုက် ရခိုင်တိုင်းရင်းသားမျိုးနွယ်စုများ အစည်းအရုံးက  မြောက်ဦးတွင် စစ်ရှောင် ၆.၀၀၀ ဝန်းကျင်ရှိသည်ဟု ဧပြီလဆန်းပိုင်းတွင် ဆိုထားရာ မြောက်ဦးသည်  အခြားမြို့နယ်များထက် စစ်ဘေးဒုက္ခသည် ပိုများနေသည်။

ရခိုင်ဘုရင်အဆက်ဆက် ထီးနန်းစိုက်ခဲ့သည့် မြောက်ဦးသည် ယနေ့ခေတ်တွင် ခရီးသွားဒေသတစ်ခု ဖြစ်လာသည်။

သျှစ်သောင်းပုထိုးတော်ကြီး အခြား ဘာသာရေးဆိုင်ရာ အဆောက်အုံများစွာ မြောက်ဦး ရှေးဟောင်း ယဉ်ကျေးမှုနယ်မြေကို လာမည့် နှစ်အနည်းငယ်အတွင်း ကမ္ဘာ့အမွေအနှစ်စာရင်းဝင်နိုင်ရေးအတွက် ကြိုးစားနေစဉ် တိုက်ပွဲများ ရောက်လာခြင်း ဖြစ်သည်။

ရပ်ကွက် ၇ ခု၊  ကျေးရွာပေါင်း ၂၆၀ နှင့် ဖွဲ့စည်းထားသည့် ဤမြို့တွင်  လူဦးရေ နှစ်သိန်းနီးပါး ရှိကြောင်း ၂၀၁၄ သန်းခေါင်စာရင်းပါ အချက်များအရ သိရသည်။

ရပ်ကွက်ထဲအထိ ပစ်ခတ်မှုများရှိလာသည့်နောက်တွင် မြောက်ဦးမြို့နယ်တစ်ခုလုံး ခြောက်ကပ်တိတ်ဆိတ်ကာ ယခင်လို စည်ကားမှုမျိုး မရှိတော့ကြောင်း  ပြည်နယ်လွှတ်တော်အမတ် ဦးထွန်းသာစိန်က ပြောသည်။

မြို့ကြီးတစ်ခုလုံးက သုသာန် တစပြင်လို ဖြစ်နေတယ်ဟု ဦးထွန်းသာစိန်က မှတ်ချက်ပေးသည်။

 

myanmar_now_2.jpg

၂၀၁၂ ခုနှစ်က တွေ့ရသော မြောက်ဦးရှေးဟောင်းယဉ်ကျေးမှုနယ်မြေ မြင်ကွင်းတစ်ခု (ဓာတ်ပုံ - ဆွေဝင်း/Myanmar Now)

မြောက်ဦးဒေသဘက်မှ လာသော သတင်းများသည်  တိုက်ပွဲ၊ ကျေးရွာအတွင်း ဝင်ရောက်ပစ်ခတ်မှု၊ မိုင်းပေါက်ကွဲမှု၊ ဒဏ်ရာရ သေဆုံးမှု၊ လုပ်ကြံသတ်ဖြတ်မှု စသည့် အကြောင်းအရာများ ပါဝင်နေသည်။ 

ဧပြီ ၂ တွင် ပြည်နယ်အစိုးရက တိုက်ပွဲနယ်မြေ   ၅ မြို့နယ်ကို ညမထွက်ရအမိန့် ထုတ်လိုက်သည်။ 

ထိုအမိန့် မထွက်မီ ရက်ပိုင်းအလိုတွင် ရန်ကုန် အမေရိကန် သံရုံးကလည်း  ၎င်းတို့နိုင်ငံသားများ တိုက်ပွဲဒေသသို့  ခရီးမသွားရန်  သတိပေးချက် ထုတ်ပြန်သည်။

စစ်ရှောင်ရခြင်း

သနပ်ခါးလိမ်းနေစဉ် ကျည်ဆံထိခဲ့သော မပေါက်စတို့၏ ရွာသည် မြောက်ဦးရှိ အခြားရွာ အများအပြားနည်းတူ လယ်ယာစိုက်ပျိုးရေးရွာဖြစ်ပြီး  အိမ်ထောင်စု ၂၂၀၊ လူဦးရေ ၁,၀၀၀ ခန့် ရှိသည်။ 

တိုက်ပွဲက ရွာသို့ ရောက်လာသဖြင့်  ရွာသားတို့က လုံခြုံမည်ဟုယူဆရာအရပ်များသို့ ထွက်ပြေးရသည်။ 

သပြေကန်ရွာမှ အုပ်ချုပ်ရေးမှူး ဦးမောင်သိန်းဇံက ၎င်းတို့ထံတွင် စစ်ရှောင် ၃၀၀ ကျော် ရောက်ရှိနေကြောင်း အတည်ပြုသည်။

သပြေကန်တွင် ခိုလှုံနေသည့် မကြည်ကြည်ဌေးက ၎င်းတို့မိသားစု ထွက်မပြေးခင် ဗုံးခိုကျင်းအတွင်း ဝင်ပုန်းခဲ့ရသည်ဟု ဆိုသည်။ အိမ်ပြန်နိုင်မည့်အချိန်ကို မသိရသေးပေ။

ကျွန်မတို့က ခံထားရတာဆိုတော့ ကြောက်တယ်၊ လူကြီးတွေကအစ ကလေးတွေရော ဘယ်သူမှ အိမ်ကိုပြန်ဖို့ မပြောဘူးဟု ၎င်းက ဆိုသည်။

ပိုင်ဆိုင်မှုများအတွက် နောက်ဆံတင်းနေသူ အများအပြား ရှိကြောင်း အမျိုးသားတစ်ဦးက ပြောသည်။

တချို့တွေ ပိုက်ဆံတောင် မပါဘူး။ အခုမှ ပြန်ယူကြတယ်။ ကျွန်တော်က စပါးတင်း ၇၀၀ ကျော် ကျန်ခဲ့တယ်။ ရွာမှာဟု ၎င်းက ပြောပြသည်။ 

အောက်သားကန်ရွာ၌ ပစ်ခတ်မှုများပြီးဆုံးခဲ့သည်မှာ တစ်လကျော်သွားပြီဖြစ်သည်။

၎င်းတို့ ခိုလှုံနေရာ စစ်ရှောင်စခန်းများတွင် ရေမသန့်ခြင်း၊ ရာသီဥတု ပူခြင်း၊ ခြင်ကိုက်ခြင်း စသည့် ဒုက္ခများနှင့် ရင်ဆိုင်နေရစဉ်  မပေါက်စသည် ရန်ကုန်၊ မြောက်ဥက္ကလာပဆေးရုံသို့ ရောက်နေသည်။

ခေါင်းကို ခွဲစိတ်ရန် မပေါက်စ၏ ဆံပင်ကို ရိပ်ထားရသည်။ မြောက်ဦး၊ စစ်တွေဆေးရုံတို့တွင် ၆ ရက်ကြာ နေခဲ့ရသည့် မပေါက်စကို Myanmar Now က  မြောက်ဥက္ကလာပဆေးရုံတွင် သွားရောက် တွေ့ဆုံရာ ၎င်းသည် စကား ပြောရန်ပင် မနည်း ကြိုးစားနေရသည်ကို တွေ့ခဲ့ရသည်။ 

သူဝတ်ဆင်ထားသည့် နူးညံ့ပျော့ပြောင်းသည့် အဝတ်အစားများအောက်တွင် ဒဏ်ရာတချို့ ရှိနေသည်။  ဆေးရုံရောက်ပြီး နောက်နေ့တွင်ပင် ဦးခေါင်းကို  ခွဲစိတ်ကုသမှု ခံယူသည်။

ဆေးရုံအုပ်ကြီး ဒေါက်တာ ကြည်စိုးက ခွဲစိတ်မှု အောင်မြင်သဖြင့် စိုးရိမ်စရာ မရှိကြောင်း Myanmar Now ကို ပြောသည်။

သူက ခေါင်းထဲမှာ အရိုးစတွေ ရှိတယ်။ ခေါင်းထဲမှာ တစ်ခု ခုနဲ့ ထိသွားလို့ အဲ့ဒီအရိုးစတွေ ဝင်သွားတာ ဖြစ်မယ်။ ဦးခေါင်းအရိုးစ ဝင်သွားတဲ့အတွက် အဲ့ဒီအရိုးစတွေကို ကျွန်တော်တို့က ထုတ်တာ။ ကျည်ဆံတွေ ဖောက်ထွင်းတယ်လို့ ပြောလို့ မရဘူး ။ ဖြစ်နိုင်ချေ ရှိတာတော့ မိုင်းစတို့ ဘာတို့။ ကျည်က မှန်ပြီးတော့ ကျောက်တို ကျောက်စတွေကပဲ မှန်သလား။ တိတိကျကျ မပြောနိုင်ဘူးဟု ၎င်းက ရှင်းပြသည်။

ပေါင်မှ ဒဏ်ရာတို့မှာလည်း ထိခိုက်လျှင် အန္တရာယ် ရှိနိုင်သည့် သွေးကြောများနှင့် လွတ်ကင်းသည်ဟု ဆိုသည်။

ဆေးရုံတွင် မပေါက်စ၏ မိဘနှစ်ပါးကိုလည်း တွေ့ခဲ့ရသည်။

မပေါက်စ၏ ခင်ပွန်း လွန်ခဲ့သည့် ၂ နှစ်က ကွယ်လွန်သွားကြောင်း၊ ငယ်ငယ်ရွယ်ရွယ်နှင့် မုဆိုးမဖြစ်သွားသည့်  မပေါက်စတွင် ၅ နှစ်အောက် ကလေးနှစ်ဦး ရှိကြောင်း ၎င်းတို့က ပြောသည်။

ယခင်က မပေါက်စသည် လမ်းဖောက်လုပ်ငန်း၊ ဆောက်လုပ်ရေးလုပ်ငန်းတို့တွင် လုပ်ကိုင်သော်လည်း တိုက်ပွဲတို့ကြောင့် ထိုလုပ်ငန်းများ ရှားပါးလာသည်။  အေးချမ်းနေသေးသည့် အောက်သားကန်ရွာသို့ သွားရောက် နေထိုင်ပြီး အလုပ်လုပ်ကိုင်စဉ် တိုက်ပွဲနှင့် တိုးခြင်းဖြစ်သည်ဟု ၎င်း၏မိခင် ဒေါ်ဦးခင်ကျော့က ရှင်းပြသည်။

ဒဏ်ရာများကို ရန်ကုန်တွင် လာရောက် ကုသသည့် ခရီးအတွက်  ပုဏ္ဏားကျွန်းမြို့နယ် အခြေစိုက် ပိုးရွှီပြင် လူမှုကယ်ဆယ်ရေး အသင်းက လေယာဉ်လက်မှတ်များနှင့် ကျပ် ငါးသိန်း ထောက်ပံ့သည်။

ရခိုင်ပြည်နယ်တွင် ကုသမှုခံယူသည့် ၆ ရက်အတွင်း ကူညီရန် တာဝန်ရှိသော အခြား ဌာနဆိုင်ရာ အဖွဲ့အစည်းများနှင့် အဆက်အသွယ် မရခဲ့ကြောင်း မပေါက်စ၏ မိခင်က ဆိုသည်။

ကျည်ဆံများကြား ကြိုးစားရှင်သန်နေရသည့် ရခိုင်ဒေသ ပြည်သူများဘဝအတွက် မည်သည့် လက်နက်ကိုင် အဖွဲ့အစည်းကိုမှ ဒေါ်ဦးခင်ကျော့က အပြစ်မတင်ပေ။

တစ်ခုမှ ဆန္ဒမရှိဘူး၊ မမျှော်လင့်ဘူး။ ပေါက်စမ (ဒဏ်ရာတွေ) ပြန်ကောင်းရင် အေးဆေးနေရမယ်ဟု ဒေါ်ဦးခင်ကျော့က ဆေးရုံကုတင်ပေါ်တွင် လဲလျောင်းနေသည့် သမီးဖြစ်သူကို ကြည့်ပြီး ခပ်လေးလေး ပြောလိုက်လေသည်။

နောက်ဆုံးရသတင်းတွေကို နေ့စဉ် အခမဲ့ဖတ်ရှုနိုင်ဖို့ သင့် အီးမေးလ်ကို ဒီနေရာမှာ စာရင်းသွင်းလိုက်ပါ။

* indicates required

Mizzima Weekly