ငဖဲ၊ ဧပြီ ၁၄ ။ ။ မကွေးတိုင်းဒေသကြီး၊ ငဖဲမြို့နယ်၊ လိုင်ကျေးရွာ၏အနောက်မြောက်ဘက်၂ မိုင်ခန့်အကွာတွင် တောမီးလောင်သဖြင့် ငြှိမ်းသတ်ရာတွင် အမျိုးသား ၃ ဦး သေဆုံးပြီး ၁ ဦးဒဏ်ရာ ရရှိခဲ့ကြောင်း သိရသည်။
ဖြစ်စဉ်မှာ ဧပြီ ၁၃ ရက်နေ့ မွန်းလွဲ ၁ နာရီခွဲခန့်က တောမီးလောင်နေ၍ လိုင်ကျေးရွာကို မီးကူးစက်မည် စိုးရိမ်ရသောကြောင့် တစ်ရွာလုံး မီးဝိုင်းဝန်းငြှိမ်းသတ်ရာတွင် အမျိုးသား ၃ ဦး တောမီးလောင်၍ သေဆုံးခဲ့ရခြင်း ဖြစ်ကြောင်း ဒေသခံများထံမှ သိရသည်။
“ ကျွန်တော်တို့ ဝိုင်းဝန်းပြီး တောမီးကို ငြှိမ်းသတ်ကြတယ်။ လေတိုက်လာတဲ့အတွက် မီးများလာလို့ ထွက်ပြေးရ တယ်။ မီးထဲက ထွက်ပြေးရတော့ ခြေထောက်တွေမှာ မီးလောင်ခံရတာပါ” ဟု ပဒါန်းဆေးရုံတွင် ဆေးကုသနေ သည့် ကိုပိန်းက ပြောသည်။
တောမီးလောင်၍ သေဆုံးသူများမှာ လိုင်ကျေးရွာမှ ဦးမောင်( အသက် ၆၆နှစ်)၊ ကိုမုံစိန် ( အသက် ၃၅ နှစ်) ၊ ကိုဟန်သိန်း (အသက်၂၀ နှစ်)တို့ တောမီးလောင်သည့်နေရာတွင် သေဆုံးခဲ့ခြင်း ဖြစ်သည်။
အဆိုပါ တောမီးလောင်နေသည့်နေရာသို့ နောင်ကျေးရွာ၊ ပစီကျေးရွာ၊ ဂုတ်ကြီးကျေးရွာတို့မှ ရွာသူရွာသား များပါ လာရောက်ဝိုင်းဝန်းမီးငြှိမ်းသတ်ခဲ့ရသည်။
“ တောမီးလောင်တာတွေက တောင်ပေါ်ဒေသမှာဖြစ်တော့ မီးသတ်ကားတွေ အလွယ်တကူ မလာနိင်ဘူး။၊ လမ်းပန်းဆက်သွယ်ရေး မကောင်းဘူး။ ဒေသခံကျေးရွာတွေက ရိုင်းပင်းကူညီကြပါတယ်။ ကျွန်တော်တို့ ဂုတ်ကြီးကျေးရွာက ဒေသခံ ပြည်သူ ၅၀ ခန့်နဲ့ နောင်၊ ပဇစ်ကျေးရွာက ဒေသခံတွေ သွားရောက်ကူညီ ဝိုင်းဝန်းငြှိမ်းသတ်ပေးခဲ့ပါတယ်” ဟု ဂုတ်ကြီးကျေးရွာမှ ကိုရန်အောင်ထွန်းက ပြောသည်။