မိန်းကလေးငယ်တစ်ဦးကို ဆွေမျိုးနီးစပ် အိမ်ရှင်မိသားစုက နှိပ်စက်သည်ဟု စွပ်စွဲခံရ

By ခင်မို့မို့လွင်
27 March 2019
မိန်းကလေးငယ်တစ်ဦးကို ဆွေမျိုးနီးစပ် အိမ်ရှင်မိသားစုက နှိပ်စက်သည်ဟု စွပ်စွဲခံရ
မော်လမြိုင်ကျွန်းမြို့၊ မြင်းကကုန်းကျေးရွာရှိ ဓမ္မရတနာရွှေကျောင်းတွင် မအေးအေးနွယ်ကို တွေ့ရစဉ် (ဓာတ်ပုံ - ခင်မို့မို့လွင် / Myanmar Now)

ဆွေးနီးမျိုးစပ် ခေါ်ယူစောင့်ရှောက်ထားသည့် အသက်မပြည့်သေးသည့် မိန်းကလေးတစ်ဦးကို အိမ်ရှင် မိသားစုက ရုပ်ပိုင်း၊ စိတ်ပိုင်း နာကျင်အောင် ညှဉ်းဆဲသည်ဟုဆိုကာ စွပ်စွဲထားသော အမှုတစ်မှုတွင် သက်ဆိုင်ရာ ရဲစခန်းက အမှုမဖွင့်ပေးသောကြောင့် တရားလိုများက တရားရုံးဦးတိုက်လျှောက်ထားရန် ပြင်ဆင်နေသည့် ဖြစ်ရပ်တစ်ရပ် ဧရာဝတီတိုင်းတွင် ယခုရက်ပိုင်းအတွင်း ဖြစ်ပွားခဲ့သည်။

စွပ်စွဲခံထားရသူများမှာ ဧရာဝတီတိုင်းဒေသကြီး၊ မော်လမြိုင်ကျွန်းမြို့နယ်၊ ဒေါင်းရေကျော်-မြင်းကကုန်း ကျေးရွာ အုပ်စု၊ မြင်းကကုန်းကျေးရွာရှိ အမျိုးသား ဒီမိုကရေစီအဖွဲ့ချုပ် NLD ၏ မြို့နယ်အလုပ်အမှုဆောင် အဖွဲ့ဝင် ဦးသောင်းဟန်မိသားစုဖြစ်ပြီး ထိခိုက်ခံစားခဲ့ရသည်ဟုဆိုသူမှာ ၎င်းမြို့နယ် မဘေကျေးရွာဇာတိ အသက် ၁၂ နှစ်အရွယ် မအေးအေးနွယ် ဖြစ်သည်။

 

ထိုမိန်းကလေးသည် လွန်ခဲ့သော သုံးနှစ်ခန့်ကတည်းက မိခင်နှင့်အတူ မဘေရွာမှ ရေလမ်းအတိုင်း နှစ်နာရီခန့် လာရသည့် မြင်းကကုန်းရှိ ဆွေမျိုးနီးစပ်တော်သည့် ဦးသောင်းဟန်တို့ မိသားစုထံသို့ လာရောက် နေထိုင်ခဲ့သူ ဖြစ်သည်။ ပြီးခဲ့သည့် မတ်လ ၁၇ ရက်နေ့တွင် ရွာ၏ ရွာဦးကျောင်းသဖွယ်ဖြစ်သော ဓမ္မရတနာကျောင်းတိုက်သို့ ထွက်ပြေးလာပြီး ၎င်းကို အိမ်ရှင်များက နှိပ်စက်ကြောင်း တိုင်တန်းသဖြင့် ကျောင်းထိုင်ဆရာတော် ဦးဝါရိန္ဒက စောင့်ရှောက်လက်ခံထားသည်။
 
အရိုက်ခံရဟုဆို
 
မအေးအေးနွယ်က ၎င်းသည် မနက် ၆နာရီ မထိုးခင် ထကာ အိမ်မှုကိစ္စလုပ်ရပြီး ညသန်းခေါင်မှ အိပ်ရကြောင်း၊ တစ်ခါတစ်လေ ထမင်းနပ်မှန်အောင် မကျွေးသဖြင့် အိမ်နီးချင်းများက ခေါ်ကျွေးရကြောင်းMyanmar Now ကို ဓမ္မရတနာကျောင်းတိုက်၌ မတ်လ ၂၁ ရက်နေ့က တွေ့ဆုံစဉ် ပြောသည်။

“ဝါးစိမ်းတုတ်နဲ့ ရိုက်တယ်။ တစ်ခါတလေ ငရုတ်သီးထောင်းရင်း ထထရိုက်တယ်။ တံမြက်စည်းတွေဘာတွေ မလှဲလို့တို့ သူတို့စိတ်အထင် မပြောင်လို့တို့ဆိုပြီး ထမင်းမကျွေးဘူး။ သူ့သမီးကို ရိုက်ခိုင်းတယ်။ ရေပြင်ကြီးထဲ ခေါင်းထည့်ပြီးတော့ ရိုက်ခိုင်းတယ်” ဟု ၎င်းက ဆိုသည်။  ဦးသောင်းဟန်နှင့် ဇနီး၊သား၊သမီးလေးဦးလုံးက ရိုက်သည်ဟု ၎င်းက ပြောသည်။

မအေးအေးနွယ်နှင့် ၎င်း၏မိခင်တို့သည် လွန်ခဲ့သည့် သုံးနှစ်ခန့်က ယခုမိသားစုထံ ရောက်ရှိလာခဲ့ကြောင်း၊ မိခင်သည် လပိုင်းမျှအတူနေပြီး ပြန်သွားခဲ့ကြောင်း၊ ထိုသို့ မိခင်ပြန်သွားချိန်နောက်ပိုင်းတွင် ထိုသို့ ရိုက်နှက် နှိပ်စက်ခြင်းများ စတင်ပြုလုပ်လာကြောင်း ပြောသည်။

ထိုမိသားစုဝင်များသည် ၎င်းအား ကွမ်းသီးပင်တွင် ကြိုးချည်ပြီးရိုက်ကြောင်း၊ ကျောက်ရေစည်ထဲတွင် ရေနှစ်၍ရိုက်ကြောင်း၊ ညဘက်ထွက်ပြေးမည်စိုး၍ ကြိုးတုပ်ထားကြောင်း ဆိုသည်။
Myanmar Now အနေဖြင့် ထိုမိန်းကလေးခန္ဓာပေါ်၌ ထင်ရှားသည့် မျက်မြင်ဒဏ်ရာများကိုတော့ မတွေ့ရပါ။ ဆရာတော်၏မယ်တော် ဒေါ်ခွေးကမူ မိန်းကလေးရောက်စက လက်ခုံနှင့် လက်ချောင်းများတွင် အညိုအမည်းစွဲနေသည်များ တွေ့သည်ဟု ပြောသည်။
 
ငြင်းဆို
 
စွပ်စွဲခံထားရသည့် မိသားစုကမူ မအေးအေးနွယ်ကို မနှိပ်စက်ပါဟု ဆိုထားပြီး မအေးအေးနွယ်သည် ၎င်း၏တူမက မွေးသောသူဖြစ်၍ စောင့်ရှောက်ထားသည်မှာ သုံးနှစ်ခန့် ရှိပြီဟု ဦးသောင်းဟန်၏ဇနီး ဒေါ်မြင့်မြင့်အေးက Myanmar Now ကို ပြောသည်။

မအေးအေးနွယ် ဘုန်းကြီးကျောင်းသို့ ထွက်ပြေးသည့် မတ်လ ၁၇ရက်က ဒေါ်မြင့်မြင့်အေးတို့၏အိမ်သို့ ရဲဝန်ထမ်းများက အလုပ်ကိစ္စဖြင့် လာရာ မအေးအေးနွယ်သည် ထိုရဲများစီးလာသော လှေထဲမှ မုန့်ကို ခိုးစား၍ “နင့်ကို ရဲဖမ်းတော့မယ်” ဟု ပြောခြင်းကို ကြောက်လန့်ထွက်ပြေးခြင်းဖြစ်သည်ဟု ဒေါ်မြင့်မြင့်အေးက ပြောသည်။

“မီးပူသွားငှားခိုင်းတာ ပြန်မလာဘူးပေါ့။ နောက်မှ ဘုန်းကြီးကျောင်း ရောက်သွားတယ်ဆိုတာ သိရတာ။ ရဲဖမ်းတော့မယ်ဆိုလို့” ဟု ၎င်းက ပြောသည်။

မအေးအေးနွယ်သည် ညဘက်တွင် မုန့်ဆိုင်များမှ ပစ္စည်းခိုးတတ်ကြောင်း၊ ၎င်းတို့အိမ်မှငွေကိုလည်း ခိုးကြောင်း၊ ၎င်းတို့က အပင်မြင့်များပေါ် တက်ခိုင်း၍ အလုပ်ခိုင်းခြင်းမဟုတ်ဘဲ ကလေးမကိုယ်တိုင်က သစ်ပင်ပေါ်တက်ခြင်းဖြစ်ကြောင်း ဒေါ်မြင့်မြင့်အေးနှင့်၎င်း၏သားကိုအောင်ဆန်းက ပြောကြသည်။

 

Myanmar Now က ထိုရွာသို့ ရောက်ရှိချိန်တွင် ဦးသောင်းဟန် ရှိမနေသဖြင့် မေးမြန်းခွင့် မရခဲ့ပါ။ ၎င်း၏ ဖုန်းနံပါတ်ကို တောင်းသည့်အခါမှာလည်း ဦးသောင်းဟန်၏ ဖုန်းနံပါတ်ကို ၎င်း၏ဇနီး၊ သမီးနှင့် ကျေးရွာ အုပ်ချုပ်ရေးမှူးတို့ထံမှာပါ မရှိဟု ပြောသည်။
 
မျက်မြင်သက်သေ အိမ်နီးချင်းများ
 
မအေးအေးနွယ် ရိုက်နှက်ခံရသည်ကို မျက်မြင်တွေ့ရသည့် အိမ်နီးချင်းများရှိသလို ကွမ်းသီးပင်တွင် ကြိုးချည်ရိုက်သည်ကို တွေ့မြင်ရသူများလည်း ရှိသည်။

မအေးအေးနွယ်သည် အရွယ်နှင့်မလိုက်အောင် အိမ်အလုပ်များကို ခိုင်းစေခံရကြောင်း တွေ့မြင်ကြရသည်ဟု အိမ်နီးချင်းတစ်ဦးကMyanmar Now ကို ပြောသည်။

“ကျွန်မတို့ခေါင်းရင်းက ကုက္ကိုကိုင်းတွေ ကတုံးတွေဖြစ်နေတာ တွေ့လိမ့်မယ်။

အဲဒါအဲဒီကောင်မလေး တက်ခုတ်ထားတာ။ အဲဒါထင်းစိုက်တာ။ အဲဒီကောင်မလေးကိုယ်တိုင် တက်တက်ချိုင်ရတာ။

မိုးလင်းမိုးချုပ်လုပ်တဲ့ကြားထဲကနေ ဘာအပြစ်ရှိလို့ ရိုက်လဲ ကျွန်မတို့မသိဘူး။ သူတို့အိမ်တွင်းရေးကိစ္စကို။ ကျွန်မတို့မြင်တာတော့ ရိုက်တာပဲတွေ့တာ” ဟု ကပ်လျက်အိမ်မှ အသက် ၃၇ နှစ်အရွယ် မလုံမက ပြောသည်။

ဦးသောင်းဟန်တို့၏အိမ်မှ ရိုက်သံများ၊ ငိုသံများ ကြားခဲ့သည်ဟု အိမ်နီးချင်းတစ်ဦးကလည်း ပြောသည်။

“အဲဒီကလေးကိုရိုက်လို့ ကိုယ်တွေကြည့်လို့လည်းမရဘူး။သူတို့ကကြည့်ရင်လည်း မကြိုက်ဘူး။ ကြည့်ရင် အိမ်ထဲသွင်းပြီး ရိုက်တာ” ဟု အိမ်နီးချင်းနောက်တစ်ဦးဖြစ်သည့် မသင်းသင်းခိုင်က ပြောသည်။

တစ်ရက်တွင် ၎င်းကို မအေးအေးနွယ်က “ကြီးကြီးရေ သမီးတော့ အဆိပ်သောက်တော့မယ်” ဟု ပြောသဖြင့် ရွာဦးကျောင်းဆရာတော်ထံ ပြေးရန် အကြံပေးခဲ့ကြောင်း မသင်းသင်းခိုင်က ပြောသည်။

မတ်လ ၁၇ရက်တွင် မအေးအေးနွယ်သည် မီးပူ သွားငှားရာမှ အိမ်မပြန်တော့ဘဲ ထိုမီးပူကို ကိုင်ကာ ဓမ္မရတနာရွှေကျောင်းသို့ သွားရောက် တိုင်တန်းကြောင်း၊ ဆရာတော်က ၎င်းကို ကျောင်းတွင် နေထိုင်ခွင့်ပြုကာ စောင့်ရှောက်ထားသော်လည်း အမှုကို အာဏာပိုင်များထံ လွှဲအပ်ခဲ့ကြောင်း သိရသည်။

ကျေးရွာရွာခံတစ်ဦးဖြစ်သည့် ကိုပြေကျော်က အမှုဖွင့်နိုင်ရန် ကြိုးစားသော်လည်း မတ်လ၂၆ရက်နေ့အထိ အပိုင်ရဲစခန်းတွင် အမှုဖွင့်နိုင်ခြင်း မရှိသေးပေ။

“ရဲက ဆွေမျိုးသားချင်း ဆုံးမတာပါဆိုပြီး သူကြားထားတယ်လို့ ပြောတယ်။ ကျွန်တော်တို့ကို အကြံဉာဏ်လည်း မပေးဘူး။

အမှုဖွင့်ဖို့ ကြန့်ကြာနေလို့ ကျွန်တော်တို့ တရားရုံးဦးတိုက်လျှောက်ဖို့ပဲ ပြင်ဆင်နေတယ်” ဟု ဆိုသည်။
 
ဆုံးမတာကြောင့်မို့ အမှုမဖွင့်တာပါ
 
မော်လမြိုင်ကျွန်းမြို့နယ် မြတ်သာရဲစခန်း စခန်းမှူး ရဲအုပ်ထွန်းလင်းကမူ အမှုမဖွင့်ပေးသည်မှာ ဦးသောင်းဟန်သည် NLD ပါတီမှဖြစ်နေခြင်းကြောင့် မဟုတ်ဘဲ ထိုမိသားစုနှင့် မအေးအေးနွယ်တို့သည် ဆွေမျိုးတော်စပ်ခြင်းကြောင့် ညှဉ်းပန်းနှိပ်စက်ခြင်း မဟုတ်ဘဲ ဆိုဆုံးမခြင်းသာဖြစ်ခြင်းကြောင့် ဖြစ်သည်ဟု Myanmar Now ကို ပြောသည်။

“ဦးသောင်းဟန်ကို မကြိုက်တဲ့သူတွေ ရှိပုံရတယ်။ ဦးသောင်းဟန်ကို မကြိုက်တဲ့လူတွေကနေ မြှောက်ပေးပြီးတော့မှ တိုင်ဖို့ဆိုပြီးတော့ လုပ်ကြတယ်။

ဦးသောင်းဟန်ကို မကြိုက်တဲ့လူတချို့ကပေါ့။ ဦးသောင်းဟန်ကို မကြိုက်တဲ့လူ ရှိတယ်လို့ ကြားရတယ်” ဟု ရဲအုပ်ထွန်းလင်းက ပြောသည်။

၎င်းအနေဖြင့် နှိပ်စက်ခံရသည်ဆိုသော ကလေးကိုမူ အမှုနှင့်ပတ်သက်၍ တစ်စုံတစ်ရာ မမေးမြန်းရသေးဟုလည်း ဆိုသည်။
 
ထိုကိစ္စသည် NLD ပါတီနှင့် သက်ဆိုင်ခြင်းမရှိဘဲ ပါတီက အမှုအခင်းများတွင် ပါတီဝင်များကို ကာကွယ်ပေးခြင်းမရှိကြောင်း မော်လမြိုင်ကျွန်းမြို့နယ် တိုင်းဒေသကြီးမဲဆန္ဒနယ် မဲဆန္ဒနယ် (၂) မှ လွှတ်တော်ကိုယ်စားလှယ် ဦးကျော်ကျော်က ပြောသည်။

၎င်းတို့၏ပါတီကြွေးကြော်ချက်တွင်ပင် တရားဥပဒေစိုးမိုးရေးပါဝင်၍ တရားဥပဒေလုပ်ငန်းတွင် တားဆီးပိတ်ပင်မည် မဟုတ်ကြောင်း၊ ယခုကိစ္စတွင် တိုင်ကြားကြသည့် ကာယကံရှင်များက ၎င်းတို့ထံ လာရောက်ဆွေးနွေးမှသာ ပါတီအနေဖြင့် တစ်စုံတစ်ရာ ဆောင်ရွက်ပေးနိုင်မည်ဖြစ်ကြောင်း မြို့နယ်ပါတီဥက္ကဋ္ဌ ဦးညွန့်ဌေးက ဆိုသည်။

“ကာယကံရှင်ကိုယ်တိုင် လာပြီးတော့ ပြောဆိုဆွေးနွေးမယ်ဆိုရင် အဖြေတစ်ခုခုတော့ ပြောနိုင်မှာပေါ့။ စကားပြောကြည့်မှာပေါ့။ ကာယကံရှင်တွေ ခေါ်လာခဲ့ပါ” ဟု ဆိုသည်။

လတ်တလောတွင် မအေးအေးနွယ်ကို ဓမ္မရတနာကျောင်းတိုက်ကပင် စောင့်ရှောက်ထားမည်ဖြစ်ကြောင်း၊ သို့သော် မာတုဂါမနှင့် ဘုန်းကြီးကျောင်း မသင့်တော်သဖြင့် စောင့်ရှောက်ပေးနိုင်မည့်သူများ တွေ့ပါက လွှဲပြောင်းပေးမည်ဖြစ်ကြောင်း ဆရာတော် ဦးဝါရိန္ဒက မိန့်သည်။

မအေးအေးနွယ်၏ အမေသည် မဘေရွာတွင် မရှိတော့ဘဲ မည်သည့်နေရာတွင် ရောက်နေမှန်းမသိကြောင်း မဘေရွာမှ မြင်းကကုန်းသို့ လိုက်လာကြသည့် မအေးအေးနွယ်တို့နှင့် ဆွေမျိုးတော်သူဟုဆိုသူ အမျိုးသမီးနှစ်ဦးက Myanmar Now ကို ပြောသည်။

“သူ့အမေ ရွာကို ပြန်လာပြီး တစ်နှစ်လောက်ကဘောက် (ကြုံရာကျပန်း) လုပ်လိုက်သေးတယ်။ နောက် ဘယ်ရောက်သွားမှန်း မသိဘူး။ ကလေးမအကြောင်း မေးတော့ အကြွေးနဲ့ ဒီရွာမှာ ထားခဲ့တယ် ပြောတာပဲ။ဆွေမျိုးလည်းတော်တယ်ဆိုတော့ ကောင်းကောင်းမွန်မွန် ထားမယ်ထင်တာပေါ့” ဟု ဒေါ်လှမြင့်က ပြောသည်။

မအေးအေးနွယ်ကို စောင့်ရှောက်ရန်အတွက် ၎င်းတို့လည်း တာဝန်ယူနိုင်စွမ်း မရှိကြောင်း ဆိုသည်။

မြင်းကကုန်းကျေးရွာတွင် အိမ်ခြေ ၃၀၀ ကျော်နှင့် လူဦးရေ ၁၂၀၀ ကျော်ရှိပြီး မော်လမြိုင်ကျွန်းမှ ရေလမ်းကြောင်း တစ်ခုဖြင့်သာ ရောက်နိုင်သည့်ရွာဖြစ်သည်။

Mizzima Weekly