ရန်ကုန်၊ မတ် ၂၅ ။ ။ ရခိုင်ပြည်နယ်ရှိ မြို့နယ်အချို့တွင် တိုက်ပွဲများကြောင့် တစ်ပတ်အတွင်း စစ်ဘေးရှောင်လာသူ လူဦးရေ ၇၀၀၀ ခန့်အထိ ရှိလာကြောင်း ရခိုင်တိုင်းရင်းသားမျိုးနွယ်များအစည်းအရုံး အတွင်းအရေးမှူး ဦးဇော်ဇော်ထွန်း ကဆိုသည်။
“ တစ်ပတ်လောက်အတွင်းမှာကို လူဦးရေ ၇၀၀၀ လောက်က ဝုန်းဒိုင်းကြီးပေါ့နော် ထွက်ပြေးကြတယ်” ဟု ၎င်းကဆိုသည်။
အဆိုပါ ထွက်ပြေးလာကြသောဒေသခံများသည် မြောက်ဦးမြို့နယ်နှင့် မင်းပြားမြို့နယ်အစပ်၊ ရသေ့တောင် မြို့နယ်နှင့် ဘူးသီးတောင် မြို့နယ် အစပ်တို့မှ အများဆုံးဖြစ်ကြကြောင်းလည်း ဦးဇော်ဇော်ထွန်း ကဆိုသည်။
ရခိုင်ပြည်နယ်ရှိ ရသေ့တောင်၊ ဘူးသီးတောင်၊ ကျောက်တော်၊ မြောက်ဦးနှင့် မင်းပြားမြို့နယ်တို့တွင် စစ်ရှောင် စခန်း ၃၇ ခု ဖွင့်လှစ်ထားပြီး စစ်ရှောင်လူဦးရေ ၁၄၁၃၉ ဦးရှိကာ နီးစပ်ရာရွာများတွင် ခိုလှုံနေကြသူ ၆၀၈၀ ဦးခန့် ရှိနေကြောင်း သိရသည်။
“ အကုန်လုံးတော့ ၂၀၂၁၉ ဦးဆိုတဲ့ အနီးစပ်ဆုံးစာရင်းကောက်ယူရရှိထားပါတယ်” ဟု ရခိုင် တိုင်းရင်းသား မျိုးနွယ်များအစည်းအရုံး အတွင်းအရေးမှူး ဦးဇော်ဇော်ထွန်းကဆိုသည်။
ထို့အပြင် အရပ်သားသေဆုံးမှုမှာ ၁၆ ဦးထိရှိနေပြီး ဒဏ်ရာရသူ ၃၂ ဦးရှိသည့်အပြင် ဖမ်းဆီးထိန်းသိမ်းခံရသူ အရေအတွက်မှာ ၈၀ ကျော်ပြီဟုလည်း ၎င်းကပြောသည်။
သို့သော် မည်သည့်အဖွဲ့အစည်းများမှ ဖမ်းဆီးသည်ကိုမသိရှိရသလို အချို့မှာ ပျောက်ဆုံးနေသည့် အခြေအနေ တွင်သာရှိနေသည်ဟုလည်း ဦးဇော်ဇော်ထွန်းက ရရှိထားသည့်အချက်အလက်များအား ကိုးကား၍ ပြောပြ သည်။
လက်ရှိတွင် စစ်ဘေးရှောင်စခန်းများအပြင် စစ်ဘေးရှောင်များကို လက်ခံထားသည့် ရွာများတွင်လည်း သောက်သုံးရေ ရှားပါးသည့် ပြဿနာကိုရင်ဆိုင်နေရကြောင်းလည်းသိရသည်။
အစားအသောက်ရိက္ခာအတွက်ကိုမူ ဒေသခံပရဟိတအဖွဲ့များနှင့် အလှူရှင်များကိုသာ အားထားနေရပြီး လုံလောက်မှုမရှိသောကြောင့် အစိုးရအနေဖြင့် သင့်လျော်သည့် နေရာထိုင်ခင်းနှင့် ကျန်းမာရေး စောင့်ရှောက် မှုမျိုးကို စီစဉ်ပေးသင့်ကြောင်းလည်း ဦးဇော်ဇော်ထွန်းက အကြံပြုသည်။
ရက္ခိုင့်အဖွဲ့(AA) နှင့် တပ်မတော်တို့သည် ၂၀၁၈ ခုနှစ်နှောင်းပိုင်းမှ စတင်ကာ တိုက်ပွဲများ ပြင်းပြင်းထန်ထန် ပြန်လည် ဖြစ်ပွားခဲ့ပြီး ဒေသခံများအနေဖြင့် နေရပ်စွန့်ခွာ လာရခြင်းလည်းဖြစ်သည်။
အလားတူ မတ်လဆန်းပိုင်းထဲတွင်လည်း တိုက်ပွဲအဓိကဖြစ်ပွားနေသည့် ရခိုင်ပြည်နယ်မြောက်ပိုင်းသို့ တပ်မတော်မှ တပ်အင်အား ၈၀၀၀ ခန့် ထပ်မံ စစ်ကူပို့ပေးခဲ့သည်ဟုလည်း ရက္ခိုင့်အဖွဲ့(AA)က ထုတ်ပြန်ခဲ့သည်။
ထို့ကြောင့် တိုက်ပွဲများမှာ ပိုမိုပြင်းထန်လာဖွယ်ရှိပြီး စစ်ဘေးရှောင်များလည်း ထပ်မံရောက်ရှိလာဖွယ် ရှိနေဟု ဝေဖန်အကဲခတ်မှုများလည်း ရှိနေသည်။
