နေပြည်တော် အောက်တိုဘာ ၁ ။ ။ မြန်မာနိုင်ငံ တောင်သူလယ်သမား အလုပ်သမားပြည်သူ့ပါတီ အထွေထွေအတွင်ရေးမှူး ဦးအောင်မျိုးခိုင်က ၎င်းတို့ပါတီ၏ မူဝါဒ၊ သဘောထား လုပ်ငန်စဉ်စသည် တို့ကို အောက်တိုဘာ ၁ ရက်နေ့ ညပိုင်းက ရေဒီယိုနှင့်ရုပ်မြင်သံကြားအစီစဉ်များမှ ဟောပြော တင်ပြခဲ့ပါသည်။ အဆိုပါဟောပြောတင်ပြချက် အပြည့်စုံမှာ အောက်ပါအတိုင်းဖြစ်ပါသည်။
ချစ်ကြည်လေးစားရပါသော ပြည်ထောင်စုသမ္မတမြန်မာနိုင်ငံတော် အတွင်းရှိ ရဟန်းရှင်လူ တိုင်းရင်းသားမိဘ ပြည်သူအပေါင်းတို့ကို ကိုယ်၏ ကျန်းမာခြင်း၊ စိတ်၏ချမ်းသာခြင်းကောင်းကျိုးလိုအင် ဆန္ဒများနှင့် ပြည့်စုံပါစေကြောင်း ကျွန်တော်နှင့်အတူ ''မြန်မာနိုင်ငံ တောင်သူလယ်သမား အလုပ်သမားပြည်သူ့ပါတီ'' ဝင်များအားလုံးကနေ ဆုတောင်းမေတ္တာပို့သအပ်ပါတယ်။
ကျွန်တော်ကတော့ ''မြန်မာနိုင်ငံ တောင်သူလယ်သမား အလုပ်သမားပြည်သူ့ပါတီ" ''PPMFW" ရဲ့ အထွေထွေအတွင်းရေးမှူး ဦးအောင်မျိုးခိုင်ဖြစ်ပါတယ်။ ကျွန်တော်တို့ပါတီဟာနိုင်ငံရဲ့ အဓိကအင်အားစု ကြီးဖြစ်တဲ့ တောင်သူလယ်သမားများ၊ အလုပ်သမားများနှင့် လက်လုပ်လက်စား ပြည်သူများကို ကိုယ်စားပြုပြီး အသိပညာရှင် အတတ်ပညာရှင်များရဲ့ ဟန်ချက်ညီညီပူးပေါင်းပါဝင်မှုနှင့်အတူ ဖွဲ့စည်း တည်ထောင်ထားတာ ဖြစ်ပါတယ်။ လက်လုပ်လက်စားအခြေခံလူတန်းစားပြည်သူများ ကြုံတွေ့နေတဲ့ ဆင်းရဲ နွမ်းပါးမှုမှ လွတ်မြောက်အောင် ဥပဒေဆိုင်ရာ အကာအကွယ်တွေ အမှန်တကယ် ရရှိနိုင်အောင်နဲ့ ကမ္ဘာ့နိုင်ငံများနဲ့ တန်းတူရင်ပေါင်တန်းနိုင်တဲ့ဖွံ့ဖြိုးတိုးတက်သော ချမ်းသာကြွယ်ဝသော စစ်မှန်တဲ့ ဒီမိုကရေစီဖက်ဒရယ် ပြည်ထောင်စုနိုင်ငံတော်သစ်ကြီးကို တည်ဆောက်မယ်ဆိုတဲ့ ရည်ရွယ်ချက်များနဲ့ ဖွဲ့စည်းတည်ထောင်ခဲ့တာဖြစ်ပါတယ်။
ကျွန်တော်တို့ရဲ့ ''မြန်မာနိုင်ငံ တောင်သူလယ်သမား အလုပ်သမားပြည်သူ့ပါတီ'' ရဲ့အဓိက ဦးစားပေး နိုင်ငံရေးမူဝါဒသဘောတရားများ ကိုတင်ပြသွားမှာဖြစ်ပါတယ်။
(၁) ဒီမိုကရေစီစံနှုန်းများနှင့်ကိုက်ညီသော ပြည်သူဗဟိုပြုတဲ့ သန့်ရှင်းသော အစိုးရအုပ်ချုပ်ရေးစနစ် ပေါ်ထွန်းလာစေရေး၊
(၂) မှန်ကန်မျှတသော လွတ်လပ်ပွင့်လင်းသော တရားဥပဒေစိုးမိုးရေး၊
(၃) ပြည်တွင်းငြိမ်းချမ်းရေးနှင့်အတူ ညီညွတ်မျှတသော ဖက်ဒရယ် ပြည်ထောင်စုတည်ဆောက်ရေး။
ကောင်းမွန်သန့်ရှင်းသော ပြည်သူကိုဗဟိုပြုတဲ့ အစိုးရအုပ်ချုပ်ရေး
စနစ်တည်ဆောက်မယ်ဆိုရင် ဒီမိုကရေစီစံနှုန်းများနှင့်အညီ ပြည်သူ့ဆန္ဒအရရွေးချယ်တင်မြောက်သော လွှတ်တော်ကိုယ်စားလှယ်ရာနှုန်းပြည့်နဲ့ ဖွဲ့စည်းထားတဲ့ပြည်ထောင်စု လွှတ်တော်ပြည်ထောင်စု အစိုးရအဖွဲ့ ဖြစ်ရပါမယ်။
တိုင်းဒေသကြီးနဲ့ ပြည်နယ်အဆင့်၊ ခရိုင်နဲ့ မြို့နယ်အဆင့်၊ အုပ်ချုပ်ရေးနေရာများမှာ ပြည်သူ့ကိုယ်စားလှယ်များနဲ့သာ အစားထိုးရမှာဖြစ်ပါတယ်။ အုပ်ချုပ်ရေးမဏ္ဍိုင်မှာ ပွင့်လင်းမြင်သာမှုရှိရေး ဗဟိုဦးစီးချုပ် ကိုင်မှုလျှော့ချပြီးတော့ အမြော်အမြင်ကြီးမားတဲ့ ပညာရှင်များရဲ့အခန်းကဏ္ဍကိုလည်း ပါဝင်စေရပါမယ်။
တရားဥပဒေစိုးမိုးရေးမှာလည်း တည်ဆဲဥပဒေတွေကိုပဲ အတင်းစိုးမိုးနေရုံနဲ့ မလုံလောက်ပါဘူး၊ တရားမျှတတဲ့ ပြည်သူ့အကျိုးစီးပွားကိုကာကွယ်စောင့်ရှောက်ပေးနိုင်တဲ့ ဥပဒေအသစ်များပြဋ္ဌာန်းနိုင်ဖို့ ပြင် ဆင်နိုင်ဖို့နဲ့မမျှတ မလိုအပ်တဲ့ ဥပဒေချုပ်ကိုင်မှုတွေကို ဖျက်သိမ်းနိုင်ဖို့ဆောင်ရွက် သွားရမှာ ဖြစ်ပါတယ်။
တရားစီရင်ရေးစနစ်မှာလည်း လာဘ်ပေးလာဘ်ယူအဂတိကင်းရှင်းဖို့အရေးကြီးသလို ပွင့်လင်းမြင်သာတဲ့ အုပ်ချုပ်ရေးအာဏာမှ ကင်းလွတ်တဲ့ တရားစီရင်ရေးမျိုးဖြစ်ရပါမယ်။ ဥပဒေအရ မည်သူ့ကိုမဆို တရားစွဲဆိုပိုင်ခွင့်ရှိရပါမယ်။ အပြန်အလှန်အားဖြင့် တရားစွဲဆိုခံရသည့် မည်သည့်ပုဂ္ဂိုလ်မဆိုဥပဒေကြောင်းအရ ခုခံချေပနိုင်ခွင့်နှင့် အခြားဥပဒေဆိုင်ရာ အခွင့်အလမ်းများ တန်းတူညီမျှစွာခံစားနိုင်ကြ မှာဖြစ်ပါတယ်။ ပြဋ္ဌာန်းပြီး ဥပဒေများရဲ့စိုးမိုးရေးလုပ်ငန်းစဉ်များမှာလည်း ပြည်သူအားလုံး လေးစားလိုက်နာတတ်စေရန် ဥပဒေဆိုင်ရာ အသိပညာပေးမှုများကို ကျယ်ကျယ်ပြန့်ပြန့်ဆောင်ရွက်သွား ရမှာ ဖြစ်ပါတယ်။ ဥပဒေဆိုင်ရာ အထောက်အကူပြုအဖွဲ့ အစည်းများ လွတ်လပ်စွာပေါ်ထွန်းစေပြီး ပြည်သူပါဝင်မှုနဲ့အတူ တရားဥပဒေစိုးမိုးရေး နယ်ပယ်ဟာလည်း ပိုမိုအားကောင်းလာစေမှာ အမှန်ပဲဖြစ်ပါတယ်။
ကျွန်တော်တို့ နိုင်ငံရဲ့လွတ်လပ်ရေးနဲ့အတူတွဲလျက် ပါလာခဲ့တဲ့ပြည်တွင်းစစ်မီးဟာလည်း ဒီကနေ့အထိ အမွေဆိုးတစ်ခုဖြစ်ပါတယ်။ပါလီမန် ဒီမိုကရေစီခေတ်ကနေစပြီး ယနေ့တိုင်အောင်နိုင်ငံရေးခေါင်းဆောင်များ၊ လက်နက်ကိုင်များရဲ့တင်းမာတဲ့သဘောထားတွေဟာဒီကနေ့ ကျွန်တော်တို့နိုင်ငံကို ဖွံ့ဖြိုးတိုးတက်မှု နှေးကွေးတဲ့အခြေအနေကိုရောက်စေခဲ့ပါတယ်။ မတူညီတဲ့ အမြင်တွေကို သဘောထားကြီးမှုအပြန်အလှန် နားလည်မှုတွေ၊ မတည်ဆောက်နိုင်တဲ့အခါ အားမဖြစ်စေတော့ဘဲ ဘေးဖြစ်နေတာ ဒီကနေ့ ပြည်သူအားလုံး အသိပဲဖြစ်ပါတယ်။ မျှတခြင်းဆိုတာရှိမှ ညီညွတ်ခြင်းနဲ့ ယုံကြည်မှုဆိုတာ တည်ဆောက်လို့ရမှာဖြစ်ပါတယ်။ တိုင်းရင်းသားများအခြေပြုရာ ပြည်နယ်များနဲ့ တိုင်းဒေသကြီးများအားလုံးမှာ အခွင့်အရေးတန်းတူဖြစ်စေဖို့ တာဝန်သိတတ်မှု တာဝန်ယူတတ်မှုတွေ တူညီနေကြဖို့လိုပါတယ်။
လူမျိုး ရေးစိတ်ဓာတ်ပြင်းထန်မှုဆီကနေတစ်ဆင့် နိုင်ငံသားစိတ်ဓာတ်ကို မွေးမြူပျိုးထောင်ကြရမှာဖြစ်ပါတယ်။ နိုင်ငံရေးပါတီအားလုံးနဲ့ တိုင်းရင်းသားခေါင်းဆောင်များပါဝင်တဲ့ နိုင်ငံရေးဆွေးနွေးပွဲများ အမြန်ဆုံး ကျင်းပနိုင်ဖို့ အလေးအနက် တိုက်တွန်းလိုပါတယ်။ နိုင်ငံရေးဆွေးနွေးပွဲတွေကနေတစ်ဆင့် အပြန်အလှန်ယုံကြည်မှု သဘောတူညီမှုများနဲ့အတူ ညီညွတ်မျှတသော ဖက်ဒရယ်ပြည်ထောင်စု တည်ဆောက်နိုင်ရေးဟာ ကျွန်တော်တို့''မြန်မာနိုင်ငံ တောင်သူလယ်သမားအလုပ်သမားပြည်သူ့ပါတီ''ရဲ့အရေးကြီးတဲ့ ပန်းတိုင်တစ်ခု ဖြစ်ပါတယ်။
PPMFW ပါတီရဲ့ နိုင်ငံခြားရေးမူဝါဒများအနေနဲ့ အမျိုးသားအကျိုးစီးပွားကို ရှေးရှုသော လွတ်လပ်၍တက်ကြွသော ဘက်မလိုက် နိုင်ငံခြားရေးမူဝါဒဖြစ်ပါတယ်။ ကမ္ဘာ့နိုင်ငံများနှင့် ဆက်ဆံရေး တိုးတက်အောင် ဆောင်ရွက်သွားမှာဖြစ်ပြီး အခြားနိုင်ငံများ၏ အချုပ်အခြာအာဏာကို လေးစားခြင်းနှင့်အတူ ငြိမ်းချမ်းစွာ ယှဉ်တွဲနေထိုင်ကြမှာ ဖြစ်ပါတယ်။
စီးပွားရေးဆိုင်ရာ မူဝါဒအနေနဲ့
- စက်မှုလယ်ယာစနစ်ကို အခြေခိုင်မာစေပြီး စက်မှုနိုင်ငံတော်အဖြစ်သို့ တက်လှမ်းတည်ဆောက်သွားမှာဖြစ်တယ်။
- အစိုးရရဲ့ စီးပွားရေးချုပ်ကိုင်မှုများကို လျှော့ချပြီး ပုဂ္ဂလိကလုပ်ငန်းရှင်များရဲ့ပါဝင်ဆောင်ရွက်နိုင်စွမ်းကို မြှင့်တင်သွားရပါမယ်။
- လွတ်လပ်တဲ့ ဈေးကွက်စီးပွားရေးစနစ်ကို အခြေခံမှာဖြစ်ပြီး နိုင်ငံခြားရင်းနှီးမြှုပ်နှံမှုများ ဖိတ်ခေါ်သွားပါမယ်။ တစ်ချိန်တည်းမှာပဲပြည်တွင်းတိုင်းရင်းသား လုပ်ငန်းရှင်များရဲ့ယှဉ်ပြိုင်ရပ်တည်နိုင်စွမ်းကိုလည်း အကာအကွယ်ပေးတဲ့ မူဝါဒများရေးဆွဲဆောင်ရွက်ရပါမယ်။
- နိုင်ငံ့သယံဇာတအရင်းအမြစ်များကို ထုတ်ယူသုံးစွဲရာတွင်လည်းအနာဂတ်နိုင်ငံတော်နှင့် နိုင်ငံသားများအတွက်ပါ ရေရှည်မြော်မြင်ပြီး သယံဇာတဆိုင်ရာမူဝါဒများရေးဆွဲ ဆောင်ရွက်သွားရမှာဖြစ် ပါတယ်။
- သဘာဝပတ်ဝန်းကျင်နှင့် ဂေဟဟစနစ်မထိခိုက်စေရန်အတွက်လည်းအလွန်အရေးကြီးပါတယ်။ ပြည်သူ့သယံဇာတဆိုင်ရာ ဘဏ္ဍာရေးကော်မရှင်ဖွဲ့စည်းပြီး ပွင့်လင်းမြင်သာမှုရှိစွာ ဆောင်ရွက်သွား ရမှာ ဖြစ်ပါတယ်။
- နိုင်ငံရဲ့ဒီကနေ့ စီးပွားရေးအခြေနေကို သုံးသပ်ကြည့်ရင် လယ်ယာထုတ်ကုန်မှတစ်ပါး အခြားကုန်ထုတ်လုပ်ငန်းများ၊ ဝန်ဆောင်မှု လုပ်ငန်းများအနေနဲ့အလွန်ပဲအားနည်းနေသေးတာဖြစ်ပါတယ်။ လက်ရှိ ကျွန်တော်တို့နိုင်ငံရဲ့ စီးပွားရေးဟာ သယံဇာတထုတ်ယူ သုံးစွဲခြင်းအပေါ်မှာပဲ အလွန်အကျွံမှီခိုနေတာ ဖြစ်တာကြောင့်နိုင်ငံရဲ့အနာဂတ်အတွက် များစွာစိတ်ပူစရာရှိနေပါတယ်။ သယံဇာတဆိုတာ အမြဲမရနိုင်ပါဘူး။ ပဒေသာပင်မဟုတ်ပါဘူး။ ကမ္ဘာမှာကြည့်ရင် သယံဇာတကိုအမှီပြုပြီး အာဏာရှင်စနစ်တွေ သက်ဆိုးရှည်ခဲ့ကြတာ အထင်အရှားရှိပါတယ်။ ဒါကို သယံဇာတကျိန်စာသင့်တယ်လို့ ပညာရှင်များက သုံးသပ်ကြပါတယ်။
နိုင်ငံကိုမှန်ကန်တဲ့စီးပွားရေးလမ်းကြောင်းပေါ်မှာ ရပ်တည်ဖို့ဆိုရင်SME, SMI အသေးစား၊ အလတ်စား စက်မှုလက်မှုလုပ်ငန်းရှင်များကိုလိုအပ်တဲ့အထောက်အပံ့များပေးနိုင်ဖို့နဲ့ ဥပဒေဆိုင်ရာ အကာအကွယ်ပေးနိုင်ဖို့ ပုဂ္ဂလိကစီးပွားရေးနဲ့ ဝန်ဆောင်မှုလုပ်ငန်းများ မြှင့်တင်နိုင်ဖို့ လိုအပ်ပါတယ်။ ဘဏ်လုပ်ငန်းများနဲ့ငွေကြေးဆိုင်ရာ တည်ငြိမ်မှုရရှိအောင် ကုန်ဈေးနှုန်းတည်ငြိမ်မှုရှိအောင် ထိန်းကျောင်းပေးရမှာဟာ အစိုးရများရဲ့တာဝန်ပဲဖြစ်ပါတယ်။ ကုန်သွယ်ဖက်နိုင်ငံများ၏ ဈေးကွက်ချုပ်ကိုင်မှု မခံရစေရန် ပြည်တွင်းထုတ်ကုန်များနည်းပညာနှင့် အရည်သွေးမြင့်မားရေး ပြည်ပဈေးကွက် ရှာဖွေရေးလုပ်ငန်းများ ဆောင်ရွက်သွားရမှာဖြစ်ပါတယ်။
PPMFW ပါတီရဲ့ပညာရေးဆိုင်ရာ မူဝါဒများ အနေနဲ့ လက်ရှိအလွတ်ကျက်မှတ်ဖြေဆိုခြင်းစနစ်ကို ပပျောက်စေပြီး အမှန်တကယ် နားလည်တတ်မြောက်စေရေး ကိုယ်ပိုင်တွေးခေါ်ကြံဆနိုင်သည့် လွတ်လပ်မြင့်မားတဲ့ပညာရေးမျိုး ဖော်ဆောင်သွားမှာဖြစ်ပါတယ်။ အခြေခံပညာမူလတန်းကို မသင်မနေရပညာရေး၊ အထက်တန်းအဆင့်အထိကို အခမဲ့ ပညာရေးမူဝါဒများ ချမှတ်သွားရမှာ ဖြစ်တယ်။
အဆင့်မြင့်ပညာရေးနယ်ပယ်မှာလည်း အကန့်အသတ်မူဘောင်များဖြေလျှော့ပြီး လွတ်လပ်စွာသင်ကြားနိုင်ရေး ဆောင်ရွက်သွားရမှာ ဖြစ်ပါတယ်။ တိုင်းရင်းသားကလေးငယ်များအတွက် အလယ်တန်း အဆင့်ထိ မိခင်ဘာသာစကားဖြင့် သင်ကြားနိုင်ရေး ဆောင်ရွက်ပေးရမှာ ဖြစ်ပါတယ်။ ဆရာ/ဆရာမများနှင့်ကျောင်းသားအဖွဲ့အစည်းများ၊ လွတ်လပ်စွာပေါ်ပေါက်စေပါမယ်။ ပညာရေးစီမံကိန်းများရေးဆွဲပြီး ပညာရေးအသုံးစရိတ်တိုးမြှင့်ရေး၊ သင်ထောက်ကူပစ္စည်းများပြည့်စုံရေး၊ ဆရာ/ဆရာမများ အရည်အသွေးမြှင့်တင်ရေး၊ ပညာသင်ထောက်ပံ့ကြေးနဲ့နိုင်ငံတကာသို့ ပညာတော်သင်များ ပိုမိုစေလွှတ်နိုင်ရေး လုပ်ငန်းများ ဆောင်ရွက် သွားရမှာဖြစ်ပါတယ်။
ပညာရှင်များကို ပြည်တွင်းမှာပဲ အလုပ်အကိုင် အခွင့်အလမ်းများဖန်တီးပေးနိုင်ရမှာ ဖြစ်ပါတယ်။ ဒါမှသာ ပြည်ပရောက် နိုင်ငံသားခေတ်ပညာတတ် များအား ပြန်လည်ဖိတ်ခေါ်၍ နိုင်ငံတော် တည်ဆောက်ရေးမှာ လူ့စွမ်းအားအရင်းအမြစ်များ ဖွံ့ဖြိုးစေမှာ ဖြစ်ပါတယ်။
အမျိုးသားကျန်းမာရေးစီမံချက်များ ရေးဆွဲ၍ ကျန်းမာရေးအသုံးစရိတ်လုံလောက်စွာ မြှင့်တင်ပေးရမှာဖြစ်ပါတယ်။ ဆင်းရဲနွမ်းပါးသူများ၊ ကလေးသူငယ်များနဲ့ သက်ကြီးရွယ်အိုများ အခမဲ့ဆေးကုသနိုင်ခွင့် ရှိစေရပါမယ်။ သွားလာရေးခက်ခဲသည့် ဒေသများပါမကျန် နယ်လှည့်ဆေးကုသရေး အစီစဉ်များ ဆောင်ရွက်သွားပါမယ်။ ဆေးဘက်ဆိုင်ရာပညာရှင်များပိုမိုမွေးထုတ်၍ အရည်အသွေးနှင့် စိတ်စေတနာမြင့်မားရေးကို လေ့ကျင့် ပျိုးထောင်သွားရန် လိုအပ်ပါတယ်။ ပြည်သူ့ကျန်းမာရေး နယ်ပယ်မှာ ကုသရေးအပြင် ရောဂါကြိုတင် ကာကွယ်တားဆီးရေး အစီအမံများလည် အလွန်အရေးကြီးပါတယ်။
တိုင်းရင်းသားလူမျိုးစုများအားလုံးရဲ့ကိုယ်ပိုင်အခွင့်အရေးမှန်သမျှကို အာမခံပေးနိုင်ရမှာဖြစ်ပါတယ်။ တိုင်းရင်းသားများ အခြေပြုရာ ပြည်နယ်များအားလုံးမှာ လမ်း၊တံတား၊ ဆေးရုံ၊ စာသင်ကျောင်း၊ စီးပွားရေးဇုန်၊ စက်မှုဇုန်စသည့် အခြေခံအဆောက်အအုံများ ဖွံ့ဖြိုးတိုးတက်အောင် ဆောင်ရွက်ပေးရမှာဖြစ်သလို ကျန်းမာရေး၊ပညာရေးဆိုင်ရာ အထောက်ပံ့များ ဖွံ့ဖြိုး တိုးတက်စေရပါမယ်။ တိုင်းရင်းသားရိုးရာ ယဉ်ကျေးမှု စာပေအနုပညာများကို အစဉ်ထိန်းသိမ်းကာကွယ်စောင့်ရှောက်ရမှာဖြစ်ပါတယ်။
တောင်သူလယ်သမားများနဲ့ အလုပ်သမားများ အခြေခံ လက်လုပ်လက်စား ပြည်သူများ ချမ်းသာမှ တိုင်းပြည်ချမ်းသာမှာဖြစ်တဲ့အတွက်အဆိုပါအခြေခံလူ့အဖွဲ့အစည်းများဆင်းရဲနွမ်းပါးမှုမှ လွတ်မြောက်အောင် အစီမံများ ချမှတ်ဆောင်ရွက်သွားမှာ ဖြစ်ပါတယ်။ တောင်သူလယ်သမားများနဲ့ အလုပ်သမားများရဲ့ ရပိုင်ခွင့်အခွင့်အရေးတွေကို ကာကွယ်စောင့်ရှောက်ပေးတဲ့ဥပဒေများပြင်ဆင်ပြဋ္ဌာန်းပေးရမှာ ဖြစ်တယ်။ လယ်သမားများရဲ့လယ်ယာမြေပိုင်ဆိုင်ခွင့်ကို အာမခံပေးရမှာဖြစ်ပြီး လက်ရှိမြေယာ လက်ဝါးကြီးအုပ်မှုအခြေအနေကို ပပျောက်စေ၍ လယ်လုပ်သူတိုင်း လယ်ယာမြေ ပိုင်ဆိုင်ခွင့်ရရှိစေမှာဖြစ်ပါတယ်။ လက်ရှိဖြစ်ပေါ်နေတဲ့ လယ်ယာမြေအငြင်းပွားမှုများကိုလည်း အမြန်ဆုံးမှန်မှန်ကန်ကန်ဖြေရှင်းဆောင်ရွက်ပေးပါ့မယ်။
အလုပ်သမားများအတွက် နိုင်ငံရဲ့အနိမ့်ဆုံးလုပ်ခနှုန်းထား သတ်မှတ်ချက်ဟာ အာဆီယံနိုင်ငံများနဲ့ တန်းတူဖြစ်စေဖို့ အစိုးရပိုင်းကနေ ပံ့ပိုးမှုများဥပဒေနဲ့အညီ လုပ်ဆောင်သွားရမှာ ဖြစ်တယ်။ ပြည်ပရောက် မြန်မာ ရွေ့ပြောင်းလုပ်သားများကိုလည်း နိုင်ငံတကာအလုပ်သမားဥပဒေများနဲ့အညီအခွင့်အရေးနှင့်အကာကွယ်များ အပြည့်အဝရရှိစေရေး ဆောင်ရွက်ပေးသွားရမှာဖြစ်ပါတယ်။
နိုင်ငံတော်ရဲ့ အရေးကြီးလှတဲ့ ကာကွယ်ရေးတာဝန်ကို ထမ်းဆောင်နေကြသော တပ်မတော်သားများနှင့် မိသားစုဝင်များရဲ့ လူမှုဘဝပြည့်စုံရေး၊ ပညာရေး၊ ကျန်းမာရေးအထောက်အပံ့ကောင်းများ အနာဂတ်အတွက် အစီအမံများ ချမှတ်ပေးရမှာ ဖြစ်ပါတယ်။ မြန်မာ့တပ်မတော်ကို ပြည်သူချစ်သောနိုင်ငံနှင့်ပြည်သူအတွက် သစ္စာရှိတဲ့ပြည်သူ့သားကောင်းတပ်မတော်အဖြစ်ယုံကြည်ပါတယ်။ တိုင်းရင်းသားပြည်သူများနှင့် တပ်မတော်သားများအားလုံးတစ်သွေးတည်း တစ်သားတည်းဖြစ်ဖို့ဆိုတာဟာ နိုင်ငံတိုင်းရဲ့အသက်ဝိညာဉ်ပဲ ဖြစ်ပါတယ်။
ဝန်ထမ်းများအနေနဲ့လည်း အစိုးရဝန်ထမ်းဆိုတာထက် ပြည်သူ့ဝန်ထမ်း အဖြစ် ခံယူသွားရမှာဖြစ်ပါတယ်။
ပြည်ထောင်စုသမ္မတမြန်မာနိုင်ငံသားများသည် လွတ်လပ်စွာကိုးကွယ်ယုံကြည်ခွင့်ရှိပါတယ်။ သို့သော် ဘာသာရေးအစွန်းရောက်ဝါဒများစွဲကိုင်ပြီး တစ်ဖက်နဲ့တစ်ဖက် စော်ကားတိုက်ခိုက်ခြင်းမျိုးမဖြစ်ဖို့ အင်မတန် အရေးကြီးပါတယ်။ အမျိုးဘာသာသာသနာ ဝံသာနုရကိူ္ခတတရားများကို ထိန်းသိမ်းကာကွယ်စောင့်ရှောက်ဖို့ဆိုတာ နိုင်ငံသားအားလုံးရဲ့သမိုင်းပေး တာဝန်ကြီးပဲဖြစ်ပါတယ်။
အချုပ်အားဖြင့် တင်ပြရမယ်ဆိုရင် စစ်မှန်တဲ့ ဒီမိုကရေစီအနှစ်သာရနဲ့ကောင်းမွန်တဲ့အုပ်ချုပ်ရေးစနစ်ကို ကျွန်တော်တို့ ပြည်သူတွေ လက်တွေ့ ကျကျပိုင်ဆိုင်နိုင်ဖို့ဆိုတာမှာ အဖြေကတော့ နိုင်ငံသား အားလုံးမိမိနိုင်ငံရဲ့နိုင်ငံ့အရေးအရာတွေမှာ အခုထက်ပိုပြီး လေးလေးနက်နက်ပါဝင်ဆောင်ရွက်ကြဖို့ တာဝန်ယူတတ်လာဖို့ ဖြစ်ပါတယ်။
ဒါကြောင့် အခု ကျင်းပမယ့် ၂၀၁၅ ပါတီစုံအထွေထွေရွေးကောက်ပွဲကြီးမှာ စစ်မှန်တဲ့ပြည်သူ့ကိုယ်စားပြု ပါတီစိတ်ဓာတ်နဲ့ ဉာဏ်ပညာမြင့်မားတဲ့ လွှတ်တော်ကိုယ်စားလှယ်လောင်းတွေကို မှန်မှန်ကန်ကန် ရွေးချယ်ပေးဖို့ဖြစ်ပါတယ်။ မဲဆန္ဒဒရှင်ပြည်သူများရဲ့အနာဂတ်ကိုပုံဖော်ပေးမယ့်အခွင့်အရေးကြီးပဲဖြစ်ပါတယ်။
ဒါကြောင့် ပြည်သူကိုအလုပ်အကျွေးပြုမယ်ဆိုတဲ့ ခိုင်မာတဲ့ သိန္နိဋ္ဌာန်နဲ့အတူပေါက်ဖွားလာတဲ့ ကျွန်တော်တို့ရဲ့ "မြန်မာနိုင်ငံတောင်သူလယ်သမားအလုပ်သမား ပြည်သူ့ပါတီ'' PPMFW ရဲ့ လွှတ်တော်ကိုယ်စားလှယ်များကို ထောက်ခံအားပေးကြပါလို့ မေတူ္တာရပ်ခံပန်ကြားအပ်ပါတယ်။
ကျွန်တော်တို့ပါတီရဲ့ဆောင်ပုဒ်ကတော့-
''လိုအပ်ချက်တွေ ဖြည့်ဆည်းဖို့
မတရားမှုတွေ ကာကွယ်ဖို့၊
နစ်နာမှုတွေ ကူညီဖို့၊
ပြည်သူ့အနာဂတ်တွေ သာယာပြည့်စုံဖို့
မြန်မာနိုင်ငံ တောင်သူလယ်သမား အလုပ်သမားပြည်သူ့ပါတီကို ထောက်ခံစို့'' ပဲဖြစ်ပါတယ်။
မိဘပြည်သူများ ကိုယ်စိတ်နှစ်ပါးရွှင်လန်းချမ်းမြေ့ပြီး အနာဂတ်ဘဝ
များ ငြိမ်းချမ်းပြည့်စုံပါစေကြောင်း မြန်မာနိုင်ငံ တောင်သူလယ်သမား
အလုပ်သမားပြည်သူ့ပါတီမှ ဆန္ဒပြုအပ်ပါတယ်ခင်ဗျား။
မြန်မာနိုင်ငံ တောင်သူ လယ်သမား အလုပ်သမား ပြည်သူ့ပါတီ
၁။ | ပါတီအမည် | - | မြန်မာနိုင်ငံတောင်သူလယ်သမားအလုပ်သမားပြည်သူ့ပါတီ |
၂။ | ပါတီအမည်(English) | - | People`s Party of Myanmar Farmers And Workers |
၃။ | ပါတီတည်ထောင် ခွင့်လျှောက်ထားသည့်နေ့ | - | ၂၄.၇.၂၀၁၄ |
၄။ | လာရောက်လျှောက်ထားစဉ်ပါတီအင်အား | - | (၂၂)ဦး |
၅။ |
လာရောက်လျှောက်ထားစဉ်ခေါင်းဆောင်နှင့် ဒုတိယခေါင်းဆောင် |
- | ဦးအောင်မျိုးခိုင်၊ ဦးကိုကိုလွင် |
၆။ | ပါတီတည်ထောင်ခွင့်ပြု့သည့်နေ့ | - | ၂၂.၈.၂၀၁၄ |
၇။ | ပါတီမှတ်ပုံတင်ခွင့်လျှောက်ထားသည့်နေ့ | - | ၁၄.၁၀.၂၀၁၄ |
၈။ | ပါတီမှတ်ပုံတင်ခွင့်ပြုသသည့်နေ့ | - | ၉.၁၂.၂၀၁၄ |
၉။ | ခွင့်ပြုသည့်ပါတီအမှတ်စဉ် | - | အမှတ်စဉ်(၇၉) |
၁၀။ | ခွင့်ပြု့သည့်ပါတိအလံ | - | |
၁၁။ | ခွင့်ပြု့သည့် ပါတီတံဆိပ် | - | |
၁၂။ | ပါတီဥက္ကဋ္ဌ နှင့်ဗဟိုအလုပ်အမှုဆောင်စာရင်း | - | |
၁၃။ | ပါတီနယ်မြေ | - | ပြည်ထောင်စုတစ်ဝန်းလုံး |
၁၄။ | ပါတီ ရုံးချုပ်တည်နေရာ | - | အမှတ်(၂)၊ တကောင်းဘုရားလမ်း၊ (၄)ရပ်ကွက်၊ ပုသိမ်မြို့၊ ဧရာဝတီတိုင်းဒေသကြီး |
၁၅။ | ဆက်သွယ်ရန် ဖုန်း နှင့် ဖက်စ် | - | ၀၉-၄၂၂၅၂၉၀၆၉ (ဦးအောင်မျိုးခိုင်) ၀၉-၄၉၇၆၄၅၇၃(ဦးကိုကိုလွင်) |
၁၆။ | ပါတီ၏ မူဝါဒလမ်းစဉ်များ | - | PDFDownload |