မတ် ၈ ။ ။ ချန်ပီယံလိဂ်ပွဲစဉ်အဖြစ် ပြင်သစ်မြေမှာ PSG အသင်းကို အံ့အားသင့်ဖွယ် အနိုင်ရခဲဲ့တဲ့ ပွဲစဉ်အပြီးမှာ မန်ချက်စတာယူနိုက်တက် ပရိသတ်တစ်ဦး ဓားထိုးခံရလို့ ဒဏ်ရာရခဲ့တယ်လို့ သိရပါတယ်။
၎င်း မန်ယူပရိသတ်ဟာ ပါရီမြို့ခံ တက္ကစီဒရိုင်ဘာတစ်ဦးရဲ့ ဓားနဲ့ တိုက်ခိုက်မှုကြောင့် ဒဏ်ရာရခဲ့ကာ ခွဲစိတ်ကုသမှု ခံယူခဲ့ရကြောင်း Sky Sports က ဖော်ပြပါတယ်။
၎င်း မန်ယူပရိသတ်ဟာ မတ်လ ၆ ရက်က တက္ကစီသမားတစ်ယောက်နဲ စကားများ ရန်ဖြစ်လို့ ဒဏ်ရာရခဲ့တဲ့သတင်းကိုလည်း ပြင်သစ်ရဲတပ်ဖွဲ့က အတည်ပြုပါတယ်။
ဒါပေမယ့် ယခုအခါ ၎င်းဟာ အသက်အန္တရာယ် မစိုးရိမ်ရတော့ကြောင်း သိရပါတယ်။
အသက် ၄၄ နှစ်အရွယ် အဆိုပါ မန်ယူပရိသတ်ဟာ ဘောလုံးပွဲအပြီး ၎င်းရဲ့ မိတ်ဆွေသုံးဦးနဲ့အတူ ပါရီ မြို့လယ်ခေါင်မှာ လမ်းလျှောက်လာစဉ် တက္ကစီသမားရဲ့ ရန်ရှာခြင်းကို ခံခဲ့ရတာဖြစ်ပါတယ်။
" အောင်ပွဲခံတာကို မကျေနပ်တဲ့ ကားသမားက သူ့ကားထဲက ထွက်လာတယ်၊ ပြီးတော့ ဓားကို ဆွဲထုတ်လိုက်တယ်၊ ပြီးတော့ အဖွဲ့ထဲက အမျိုးသမီးတစ်ဦးကို ခြိမ်းခြောက်ခဲ့တယ်၊ အဲဒီအချိန်မှာ ခု ဓားထိုးခံရတဲ့သူက အဲဒီအမျိုးသမီးကို ဝင်ကာကွယ်ဖို့ လုပ်ရာကနေ အထိုးခံခဲ့ရတာပါ" လို့ Sky က ဖော်ပြပါတယ်။
သတင်းတွေအရ သံသယရှိ တရားခံကို ရဲက ဖမ်းဆီးထားပြီးဖြစ်ပေမယ့် အသုံးပြုခဲ့တဲ့လက်နက်ကိုတော့ ရှာမတွေ့ဘူးလို့ သိရပါတယ်။