ဘိန်းစိုက်ခင်းတွေထဲက ရုန်းမထွက်နိုင်ကြတဲ့ မြန်မာဘိန်းစိုက်တောင်သူများ

ဘိန်းစိုက်ခင်းတွေထဲက ရုန်းမထွက်နိုင်ကြတဲ့ မြန်မာဘိန်းစိုက်တောင်သူများ
Photo: AFP

ဟိုပုံး၊ ဖေဖော်ဝါရီ ၇ ။      ။ မြန်မာနိုင်ငံ အရှေ့ပိုင်း တောင်ထူထပ်ရာဒေသရဲ့ စားကျက်မြေတွေနဲ့ တောင်ထိပ်တွေမှာ ခရမ်းရောင် ဘိန်းစိုက်ခင်းတွေက တစ်ပြန့်တစ်ပြောရှိနေပါတယ်။

ဘိန်းစိုက်တောင်သူဘဝကနေ လွတ်မြောက်ရေးအတွက် မက်လုံးပေးဆွဲတင်ပေမယ့် အကျိုးအမြတ်ပေါ်တဲ့ ဘိန်းစိုက်ပျိုးမှုဟာ အများစုသော တောင်သူတွေအတွက် ရုန်းမထွက်နိုင်တဲ့ ဘဝပေးအခြေအနေ ဖြစ်နေပါတယ်။

မြန်မာနိုင်ငံဟာ အာဖဂန်နစ္စတန်ပြီးရင် ကမ္ဘာမှာ ဒုတိယဘိန်းအများဆုံး ထွက်ရာ ရင်းမြစ်ပါပဲ။ အဓိကထုတ်လုပ်ရေးအချက်အခြာဟာ ရှမ်းပြည်နယ်ပဲ ဖြစ်ပါတယ်။

အေအက်ဖ်ပီသတင်းအဖွဲ့ဟာ ဟိုပုံးမြို့ငယ်က တောင်စောင်းတွေဆီ ရောက်ရှိခဲ့ပါတယ်။ ဟိုပုံးမြို့ဟာဆိုရင် ခရီးသွားမဏ္ဍိုင်တစ်ရပ်အဖြစ် ထင်ရှားတဲ့ အင်းလေးကန်ကနေ ဒါဇင်ကီလိုမီတာ အနည်းငယ်သာ ကွာလှမ်းရာ အရပ်ပါပဲ။

ဒီဟိုပုံးမြို့ငယ်ရဲ့ ဝန်းကျင်က စိုက်ခင်းယာမြေတွေဟာ ကော်ဖီ၊ အာလူးနဲ့ ပြောင်းတွေ စိုက်ပျိုးကြရင်း ဟိုသည်ပြန့်ကျဲတည်ရှိတဲ့ ကျေးရွာတွေအတွက် အသက်သွေးကြောပဲ ဖြစ်နေပါတယ်။

ဒါပေမယ့် အလှမ်းနည်းနည်းကွာတဲ့ တောင်ရိုးတစ်ကြောဟာတော့ ခရမ်းရောင်လွှမ်းခြုံထားပါတယ်။ ပေ ၈၀၀၀ နီးပါးအမြင့်က ဘိန်းစိုက်ခင်းတွေပါပဲ။

ပအို့ဝ်နဲ့ ရှမ်းတိုင်းရင်းသားလူနည်းစုတွေ နေထိုင်ရာ ပတ်ပတ်လည်က ကျေးရွာတွေမှာ နေ့စဉ်နေ့တိုင်း အမျိုးသားတွေနဲ့ အမျိုးသမီးတွေဟာ တရားမဝင်ပန်းပွင့်အတွက် တောင်ယာဆင်းကြစမြဲပါ။

သူတို့ဟာ ဘိန်းကို အစေးခြစ်ယူပြီး ဘူးတွေထဲ ထည့်ကြပါတယ်။ ဒီတစ်ဘူးဟာဆိုရင် အမေရိကန််ဒေါ်လာ ၁၀၀ အထက် စျေးရပါတယ်။ အခြားသီးနှံတွေထက် အကျိုးအမြတ်များစွာရရှိတဲ့ ဘိန်းပင်ပဲ ဖြစ်ပါတော့တယ်။

ဘိန်းထုတ်လုပ်မှု အမြစ်ပြတ်ရေးအတွက် တိုက်ထုတ်နေတာဟာဆိုရင် ဆယ်စုနှစ်တွေ များစွာ ရှိပါပြီ။ ပြီးခဲ့တဲ့နှစ်က ဟိုပုံးမှာ ဘိန်းခင်းဧက ၁၅၀၀ ကို မူးယစ်တိုက်ဖျက်ရေးရဲတပ်ဖွဲ့က ဖျက်ဆီးခဲ့ပါတယ်။

တစ်ချိန်တည်းမှာပဲ အစိုးရနဲ့ NGOs တွေဟာ ဘိန်းစိုက်တောင်သူတွေကို အခြားသီးနှံ ပြောင်းလဲစိုက်ပျိုးဖို့ မက်လုံးတွေပေး ဆွယ်ယူစည်းရုံးရာ အောင်မြင်မှု တစ်ချို့တစ်လေတော့ ရှိပါတယ်။

၂၀၁၈ ခုနှစမှာ ဘိန်းစိုက်ဧရိယာဟာ တမန်နှစ်ကထက် ဆယ်ရာခိုင်နှုန်း ကျဆင်းပြီး ၃၇၃၀၀ ဟတ်တာ ရှိခဲ့ကြောင်း ကုလသမဂ္ဂ မူးယစ်ဆေးဝါးနှင့် ရာဇဝတ်မှုရုံးအရ သိရပါတယ်။

ဒါပေမယ့် မူးယစ်ဂိုဏ်းတွေရဲ့ မက်သာဖီတာမင်းဆေးပြားတွေ ထုတ်လုပ်မှုဆီ အားကောင်းမောင်းသန် အရွှေ့ရှိခဲ့တာကို ကုလသမဂ္ဂအေဂျင်စီက ဝန်ခံထားပါတယ်။

မြန်မာနိုင်ငံက ဆင်းရဲတဲ့ ပြည်သူတွေကြားက အများစုသော တောင်သူတွေအတွက်ကတော့ ငွေအရပေါ်ဖို့ ရိုးရိုးရှင်းရှင်းပဲ ရွေးချယ်မှု ပြုကြပါတယ်။

ကော်ဖီပြောင်းစိုက်ဖို့ ကြိုးစားတဲ့ တောင်သူတစ်ဦးဟာ လွန်ခဲ့တဲ့ သုံးနှစ်မှာတော့ ဘိန်းစိုက်ခင်းဆီပဲ ပြန်ရောက်သွားတော့ပါတယ်။

“ဘိန်းဟာ ကျွန်တော်တို့ တိုင်းပြည်အတွက် မကောင်းဘူးဆိုတာကို ကျွန်တော်တို့ သိပါတယ်။”လို့ တောင်စောင်းတစ်ခွင်က ခရမ်းရောင်ဘိန်းခင်းကြီးကို ငေးမျှော်ရင်း ၎င်းက ဆိုပါတယ်။

“ဒါပေမယ့် ကျွန်တော်တို့မှာ ရွေးချယ်စရာ မရှိဘူး။ ဘာကြောင့်လည်းဆိုတော့ အခြားသီးနှံတွေ စိုက်ပျိုးရင် ဝမ်းရေးအတွက် ဒုက္ခရောက်နေရလို့ပဲ ဖြစ်တယ်။”လို့ ၎င်းက ပြောခဲ့ပါတော့တယ်။

Mizzima Weekly