ပခုက္ကူ၊ ဇန်နဝါရီ ၂၆ ။ ။ ၁၈ နှစ်မြောက် ပခုက္ကူတက္ကသိုလ် နှစ်ပတ်လည်နေ့ အထိမ်းအမှတ် ဝိဇ္ဇာ၊သိပ္ပံ ပညာရပ်ဆိုင်ရာ ပြပွဲ ကို ဇန်နဝါရီလ ၂၆ ရက်နေ့က ပခုက္ကူတက္ကသိုလ် တွင် ကျင်းပပြုလုပ်ခဲ့သည်။
ပခုက္ကူတက္ကသိုလ် ဘာသာရပ်အသီးသီးရှိ ကျောင်းသား၊ကျောင်းသူများပြုလုပ်ထားသည့် သုတေသနပညာရပ်များ ပြသခဲ့ခြင်းဖြစ်သည်။
"ကျွန်မတို့ ပခုက္ကူတက္ကသိုလ်က ကျောင်းသား၊ကျောင်းသူများ၊ ဆရာ၊ဆရာမများရဲ့ သုတေသန ရလဒ်တွေဟာ ဒေသဖွံ့ဖြိုးရေးသာမကဘဲ တိုင်းပြည်ဖွံ့ဖြိုးရေးအတွက်ပါ ပါဝင်အထောက်အကူပြုမယ်လို့ ရည်ရွယ်ချက်နဲ့ ခုလို ပြပွဲပြိုင်ပွဲကို ပြုလုပ်ခြင်းဖြစ်ပါတယ်။ အဲဒီရလဒ်တွေကို ရရှိပြီးတော့ ကျွန်မတို့ရဲ့ကလေးတွေသည် ဒေသအကျိုးပြု တိုင်းပြည်အကျိုးပြုနိုင်တဲ့ အဖက်ဖက်က ဖွံ့ဖြိုးတဲ့ တနည်းအားဖြင့် ဒေသအကျိုးပြု လူ့စွမ်းအားအရင်းအမြစ်တွေကို ပခုက္ကူတက္ကသိုလ်အနေဖြင့် မွေးထုတ်ပေးနိုင်မယ်လို့ မျှော်လင့်ရင်း ခုလို ပြပွဲပြိုင်ပွဲတွေ ပြုလုပ်ခဲ့ခြင်းဖြစ်ပါတယ် "ဟု ပခုက္ကူတက္ကသိုလ် ဒုတိယ ပါမောက္ခချုပ် ဒေါက်တာညိုညိုထွန်းက ပြောသည်။
ကျောင်းသား၊ကျောင်းသူများ၏ သုတေသနလုပ်ငန်းများကို ပြင်ပစီးပွားရေးသမားများ၏ ချိတ်ဆက်မှုများ လိုအပ်နေပြီး စီးပွားရေးလုပ်ငန်းရှင်များ စိတ်ပါဝင်စား၍ ထောက်ပံ့မှုများ ရှိပါက ပိုမိုအဆင်ပြေမည်ဟု ယုံကြည်ကြောင်း သုတေသန ပြုလုပ်နေသည့် ကျောင်းသားတစ်ဦးက ဆိုသည်။
"ကျွန်တော် ခုလုပ်နေတာဆိုရင် ဆိတ်ဖူးပင်အဆီကနေ သွားကိုက်ပျောက်ဆေးထုတ်နေတယ်။အဲ့ဒီမှာ ပြင်ပစီးပွားရေးလုပ်ငန်းရှင်က ထောက်ပံ့မယ်လို့ ပြောလာတာရှိတယ်။ခု ကျွန်တော်လုပ်ထားတဲ့ သာတေသနက အဆင်ပြေလာတယ်။ စီးပွားရေးလုပ်ငန်းရှင်က နောက်ထပ်ပြန်ပြီး ချိတ်ဆက်လာရင် ပိုပြီး အဆင်ပြေပါတယ်။ ခုလိုပွဲတွေပြုလုပ်လိုက်တဲ့အတွက် စီးပွားရေးလုပ်ငန်းရှင်တွေလည်း စိတ်ဝင်စားလာမယ်။ကျောင်းသား၊ကျောင်းသူတွေကလည်း သူတို့ရဲ့ တီထွင်မှုတွေကို ချပြခွင့်ရမယ်၊ စိတ်ဝင်စားတဲ့ လုပ်ငန်းရှင်တွေ အတွက်လည်း အဆင်ပြေပါမယ်"ဟု ပခုက္ကူတက္ကသိုလ် ဓာတုဗေဒဘာသာရပ် မဟာတန်းကျောင်းသား ကိုနန်းဆောင်က ပြောသည်။
ယခုပြုလုပ်သည့် ပညာရပ်ဆိုင်ရာ ပြပွဲသည် ပခုက္ကူတက္ကသိုလ်၌ ပထမအကြိမ် ကျင်းပပြုလုပ်ခဲ့ခြင်းဖြစ်သည်ဟု သိရသည်။
ပခုက္ကူတက္ကသိုလ်အား ၂၀၀၁ ခုနှစ်တွင် တက္ကသိုလ်အဆင့်အဖြစ် တိုးမြှင့်ခဲ့ခြင်းဖြစ်ပြီး လက်ရှိအချိန်တွင် ဘာသာရပ်ဌာန ၁၃ ခုဖြင့် ကျောင်းသား၊ကျောင်းသူ ၁ သောင်းကျော် ပညာသင်ကြားလျှက်ရှိကြသည်။
