ရခိုင်တိုက်ပွဲကြောင့် ဒေသခံများ၏ နေအိမ်တချို့ ပျက်စီးဆုံးရှုံးမှု ရှိနေ

ရခိုင်တိုက်ပွဲကြောင့် ဒေသခံများ၏ နေအိမ်တချို့ ပျက်စီးဆုံးရှုံးမှု ရှိနေ

စစ်တွေ၊ ဇန်နဝါရီ ၆ ။              ။ ရခိုင်ပြည်နယ်၊ ဘူးသီးတောင်မြောက်ပိုင်းရှိ ခထီးလှ နယ်ခြားစောင့် ရဲတပ်ဖွဲ့စခန်းတွင်ဖြစ်ပွားခဲ့သော တိုက်ပွဲကြောင့် ခထီးလှရွာမှ အိမ်ခြေအနည်းဆုံး ၇ လုံးထိ ပျက်စီးဆုံးရှုံးခဲ့ရကြောင်း ဒေသခံရွာသားများက အခင်းဖြစ်ပွားရာသို့ ရောက်ရှိနေသည့် မဇ္စျိမသတင်းထောက်သို့ ပြောသည်။

“ အေးချမ်းမှုကိုလိုချင်တာပေါ့။ ကျွန်တော်တို့မှာလုပ်ကိုင်စားသောက်စရာလည်း တောင်ယာလည်းမသွားရဆိုတော့။ တော၊ တောင်ရှာ ဖွေစားသောက်ဖို့ရာ အခုတောကိုလည်း မသွားရပါ။ ကျွန်တော်တို့မှာ အခက်ခဲ အများကြီးပါဗျာ။ အခုတော့ နေ့လည်စာ စားစရာမရှိ။ ညစာလည်း စားစရာမရှိ အဲ့လိုဖြစ်နေပါတယ်။” ဟု နေအိမ်ဆုံးရှုံးခဲ့ရသည့် ခထီးလှရွာသား ဦးမြင့်အောင်က ဆိုသည်။

ဇန််နဝါရီ ၄ ရက်နေ့တိုက်ပွဲမှာ ခထီးလှရွာတွင် နံနက် ၆ နာရီခန့်မှ စတင်ဖြစ်ပွာခဲ့ခြင်းဖြစ်ပြီး နံနက် ၈ နာရီကျော်ခန့်တွင် နေအိမ်များ လက်နက်ကြီးထိကာ မီးလောင်ပျက်စီးသည်ကို ကြားသိရကြောင်းလည်း ၄င်းက ဆိုသည်။

အဆိုပါနေရာသို့ ၂ ရက်ကြာသည်အထိ သက်ဆိုင်ရာတာဝန်ရှိသူများအပြင်၊ ပရဟိတအလှူရှင်များလည်း လာရောက်ခြင်းမရှိ သေးသောကြောင့် အဆင်ပြေသလို နေထိုင်စားသောက်နေရကြောင်းလည်း ရွာသားများက မဇ္စျိမသတင်းထောက်သို့ ပြောသည်။

“ ရွာကထောက်ပံ့ပေးတယ်။ လောလောဆယ်တော့ ဆန်တစ်ဗူးနိုင်၊ နှစ်ဗူးနိုင်။ စပါးပါတယ်။ ရွှေ၊ ငွေတွေရော တစ်ခါတည်း အကုန်လုံးပါသွားတာ။ ဘာမှမရှိတော့ဘူး ကျွန်တော်တို့မှာ “ ဟု နေအိမ်ဆုံးရှုံးခဲ့ရသည့် ဦးအောင်လှအောင်က ပြောသည်။

ထို့ကြောင့် နေအိမ်ဆုံးရှုံးခဲ့ရသည့် ရွာသားများက လက်နက်ကိုင်တိုက်ပွဲများကို အလိုမရှိဘဲ ယခင်လို အတည်တကျ နေထိုင်စားသောက်ချင်ကြောင်းလည်း ဆိုသည်။

ထို့အပြင် နောက်နောင်တွင် တိုက်ပွဲများမဖြစ်ပွားကြဖို့နှင့် ၄င်းတို့ ဆုံးရှုံးခဲ့ရသည့် နေအိမ်များ၊ စပါးများ ကိုလည်း ပြန်လိုချင်ကြောင်း နှစ်ဖက်လက်နက်ကိုင်အဖွဲ့များဖြစ်ကြသည့် တပ်မတော်နှင့် ရက္ခိုင့်အဖွဲ့(AA) တို့ကိုလည်း မေတ္တာရပ်ခံလိုက်သည်။

“ ဘာမှမတောင်းဆိုချင်ဘူး။ အရင်တုန်းကအိမ်လိုပဲနေချင်တယ်။ သမီးတို့က “ ဟု ခထီးလှရွာသူ မသင်းသင်းအေး မဇ္စျိမသို့ ပြောသည်။

တိုက်ပွဲကြောင့် ဒေသခံများထိခိုက်မှု မရှိခဲ့သော်လည်း လက်နက်အသံများကြောင့် နေအိမ်များတွင် မနေထိုင်ရဲ၍ ရွာရှိ စာသင်ကျောင်းတွင် တိုက်ပွဲပြီးသည့်အထိ ပုန်းခိုခဲ့ကြောင်းလည်း ၄င်းက ဆိုသည်။

အဆိုပါတိုက်ပွဲကြောင့် ခထီးလှ ရဲကင်း စခန်းမှ ၂ ဦးကျဆုံး၊ ၃ ဦး ဒဏ်ရာရရှိခဲ့ပြီး တိုက်ခိုက်ခံခဲ့ရသည့် ရဲကင်းစခန်း ၄ ခုလုံးမှ လက်နက်ငယ်မျိုးစုံ အလက် ၄၀၊ ခဲယမ်းမျိုးစုံ ၁၆၁၁၁ တောင့်၊ လက်ကိုင်စကားပြောစက် ၁ လုံးဆုံးရှုံးခဲ့ ကြောင်း အစိုးရဘက်က ထုတ်ပြန်ကြေညာထားသည်။

ဇန်နဝါရီ ၄ ရက်နေ့ တိုက်ပွဲများကြောင့် အနီးအနားရွာများမှ အိမ်ထောင်စု ၅၀ ကျော်၊ လူဦးရေအားဖြင့် ၂၀၀ ကျော်ခန့် စစ်ဘေးရှောင်ခဲ့ရကြောင်းလည်း သိရသည်။

ထို့အပြင် ရခိုင်ပြည်နယ်အတွင်း ၂၀၁၈ ခုနှစ်နှောင်းပိုင်းနှင့် ၂၀၁၉ ခုနှစ် ဇန်နဝါရီလအတွင်း ဖြစ်ပွားခဲ့ရသည့် တိုက်ပဲဲွများကြောင့် ဒေသခံ ၁၀၀၀ ကျော် ထွက်ပြေးတိမ်းရှောင်ခဲ့ရကြောင်းလည်း အစိုးရဘက်မှ ထုတ်ပြန်ချက်များ အရသိရသည်။

နောက်ဆုံးရသတင်းတွေကို နေ့စဉ် အခမဲ့ဖတ်ရှုနိုင်ဖို့ သင့် အီးမေးလ်ကို ဒီနေရာမှာ စာရင်းသွင်းလိုက်ပါ။

* indicates required

Mizzima Weekly