ရန်ကုန်၊ ဒီဇင်ဘာ ၅ ။              ။ ဒီမိုကရေစီအကျိုးပြုကရင်တပ်မတော်(DKBA) ဖွဲ့စည်းခြင်း (၂၄) နှစ်မြောက်အထိမ်းအမှတ်ပွဲကို မြဝတီခရိုင်၊ ဆုံဆည်းမြိုင်ဒေသ၊ ဆုံပေါင်းမြိုင်ကွင်းတွင် ကျင်းပသွားမည်ဖြစ်ကြောင်း သိရသည်။

DKBA ဖွဲ့စည်းခြင်း၂၄ နှစ်မြောက်သည့် ဒီဇင်ဘာ ၂၁ ရက် မနက် ၅ နာရီခန့်တွင် စစ်ရေးပြအခမ်းအနား များဖြင့် ပြုလုပ်သွားမည်ဖြစ်ကြောင်းလည်း သိရသည်။

“ အစီအစဉ်တွေကတော့ ကျွန်တော်တို့ DKBA တပ်မတော် စစ်ရေးပြလမ်းလျှောက်မယ်ပေါ့။ ၂၁ ရက်နေ့ မနက် ၅နာရီ၊ ၅နာရီခွဲပေါ့။ လက်ဝှေ့ပွဲလည်းရှိတယ်” ဟု DKBA (မြဝတီ) မှပြောခွင့်ရပုဂ္ဂိုလ် ဦးဇော်မင်း ကဆိုသည်။

အဆိုပါအခမ်းအနားကို တိုင်းရင်းသားလက်နက်ကိုင်အဖွဲ့အစည်းများအပြင် အစိုးရနှင့် တပ်မတော်မှ တာဝန်ရှိ သူများကိုလည်းဖိတ်ကြား သွားမည်ဖြစ်ကြောင်း ၄င်းကပြောသည်။ ထိုပွဲတွင် ဖျော်ဖြေရေးအစီအစဉ်များအပြင် ရိုးရာလက်ဝှေ့ပွဲကိုအခမ်းအနားနေ့မတိုင်မှီ ဒီဇင်ဘာ ၁၉ ရက်နေ့ကတည်းက ကျင်းပသွားမည်ဖြစ်ပြီး ၂၄ နှစ်မြောက်သည့် ဒီဇင်ဘာ ၂၁ တွင် နောက်ဆုံးပွဲစဉ်များကိုကျင်းပသွားမည်ဖြစ်ကြောင်းလည်းသိရသည်။

DKBA သည် ပြီးခဲ့သည့် ၁၉၉၄ ခုနှစ်က ကရင်အမျိုးသားအစည်းအရုံး(KNU) မှခွဲထွက်၍ အဖွဲ့အစည်း တည်ထောင်ခဲ့သည့်နေ့ကို အခမ်းအနားအဖြစ် နှစ်စဉ်ကျင်းပလာခဲ့ခြင်းလည်းဖြစ်သည်။ဒီမိုကရေစီအကျိုးပြု ကရင်တပ်မတော်(DKBA) သည် ၂၀၁၅ ခုနှစ်က အစိုးရနှင့် တစ်နိုင်ငံလုံးအပစ်ရပ်စာချုပ် (NCA) ရေးထိုး ထားသည့် ကရင်လက်နက် ကိုင်အဖွဲ့တစ်ခုလည်းဖြစ်သည်။