ရန်ကုန်၊ နိုဝင်ဘာလ ၂၃ ။ ။ ဧရာဝတီတိုင်းဒေသကြီး၊ ငပုတောမြို့နယ်၊ ဒီပါလွင်ပြင်ကျေးရွာ၊ မြစ်တစ်ရာသစ်တောကြိုးဝိုင်း အကွက်အမှတ် ၂၉ဝ ရှိ စပါးခင်းအတွင်း ဝမ်းဗိုက်ရောင်ကာ သေဆုံးနေသည့် တောဆင်ရိုင်းတစ်ကောင်ကို တွေ့ရှိခဲ့ကြောင်း ပြန်ကြားရေးဝန်ကြီးဌာနမှ သိရသည်။
သေဆုံးနေရှိသည့် တောဆင်ရိုင်းမှာ အသက် ၁၃ နှစ်ခန့်ရှိပြီး အမြင့် ၆ ပေ၊ လုံးပတ် ၉ ပေခွဲ၊ နှာမောင်း အရှည် ၄ ပေ၊ အမြီးအရှည် ၂ ပေခွဲရှိ ဟိုင်းဆင်အထီး ၁ ကောင်ဖြစ်ကြောင်း ပြန်ကြားရေးဝန်ကြီးဌာနမှ နိုဝင် ဘာလ ၂၃ ရက်၊ ညနေပိုင်းတွင် သတင်းထုတ်ပြန်ထားသည်။
အဆိုပါ ဆင်အား နိုဝင်ဘာလ ၂၂ ရက်နေ့ ညနေ ၃ နာရီအချိန်၌ ကျောကုန်းတွင် အနက် ၄ လက်မခန့် မြှား ဒဏ်ရာ ၁ ချက်နှင့် ဝမ်းဗိုက်ရောင်ကာ သေဆုံးနေသည်ကို တွေ့ရှိခဲ့ခြင်းဖြစ်ပြီး စစ်ဆေးရာ စပါးများအလွန် ကျွံစားသောက်ပြီး ရေသောက်သဖြင့် ဝမ်းဗိုက်ရောင်ရမ်းကာ သေဆုံးရခြင်းဖြစ်ကြောင်းနှင့် မီးရှို့ဖျက်ဆီး မည်ဖြစ်ကြောင်း ထုတ်ပြန်ချက်တွင် ပါရှိသည်။
တောဆင်ရိုင်း ကာကွယ်စောင့်ရှောက်ရေး အခြေစိုက်စခန်း အမှတ်(၁)၊ သစ်တောလုံခြုံရေးရဲတပ်ဖွဲ့မှ တပ်ဖွဲ့ ဝင်များ၊ တောင်ကလေးရဲကင်းစခန်းမှ တပ်ဖွဲ့ဝင်များ၊ တိရစ္ဆာန်ဆရာဝန် ဒေါက်တာ လင်းလင်းထွန်းပါ ပူးပေါင်း အဖွဲ့တို့မှစစ်ဆေးခဲ့ခြင်းဖြစ်ကြောင်း သိရသည်။
