နိုဝင်ဘာ ၁၄ ။ ။ မြန်မာနိုင်ငံ၏ စီးပွားရေးရေရှည်ဖွံ့ဖြိုးတိုးတက်နိုင်ရေးနှင့် ကျေးလက်ဒေသဖွံ့ဖြိုးရေးအတွက် ဂျာမနီအစိုးရမှ ယူရို ၃၄ ဒသမ ၅ သန်း ထောက်ပံ့ရန် ကတိကဝတ် ပြုခဲ့သည်။
မြန်မာ-ဂျာမနီ နှစ်နိုင်ငံဖွ့ံဖြိုးမှုဆိုင်ရာ ပူးပေါင်းဆောင်ရွက်ရေးစကားဝိုင်းကို နေပြည်တော်တွင် ကျင်းပခဲ့ပြီး နောက် စီးပွားရေးရေရှည်ဖွံ့ဖြိုးတိုးတက်နိုင်ရေးနှင့် ကျေးလက်ဒေသဖွံ့ဖြိုးရေး စသည့် အစားအသောက်နှင့် အာဟာရဖူလုံရေးကဏ္ဍ ၂ ခု အတွက် အမေရိကန်ဒေါ်လာ ၃၉ သန်းနှင့် ညီမျှသော ယူရိုငွေကြေး ထောက်ပံ့ပေးရန် ကတိပြုခဲ့ခြင်း ဖြစ်သည်။
ဂျာမနီအနေဖြင့် မြန်မာနိုင်ငံ၏ ဒီမိုကရေစီ အကူးပြောင်းကာလတွင် ထောက်ပံ့ပေးရန် အမြဲအဆင်သင့်ရှိပါ ကြောင်း မြန်မာနိုင်ငံဆိုင်ရာ ဂျာမနီသံအမတ်ကြီး H.E Dorothee Janetzke Wenzel က ပြောကြားခဲ့သည်။
အဆိုပါ စကားဝိုင်းတွင် ရခိုင်ပြည်နယ်အရေးနှင့် ပတ်သက်ပြီး အကျပ်အတည်းကိုရင်ဆိုင်ရန်နှင့် ရခိုင်အကြံပေးကော်မတီ၏ အကြံပြုချက်များကို အကောင်အထည်ဖော်ရန် ဂျာမနီမှ တိုက်တွန်းခဲ့သည်။
ထို့ပြင် နှစ်နိုင်ငံအစိုးရ၏ ပြီးမြောက်အောင်မြင်ခဲ့သည့်မှတ်တိုင်များနှင့် နှစ်နိုင်ငံ ဖွံ့ဖြိုးမှု ပူးပေါင်းလုပ်ကိုင်နေစဉ် ရင်ဆိုင်ခဲ့ရသည့် စိန်ခေါ်မှုများအကြောင်း ဆွေးနွေးခဲ့ကြသည်။
၂၀၁၂ ခုနှစ်မှ စတင်ပြီး ဂျာမနီသည် မြန်မာနိုင်ငံ၏ စိုက်ပျိုးရေး၊ သက်မွေးဝမ်းကြောင်းလုပ်ငန်းများတွင် ထောက်ပံ့မှု ပေးခဲ့ပြီး ပုဂ္ဂလိက ကဏ္ဍ၊ ဘဏ္ဍာရေးနှင့် ဘဏ်လုပ်ငန်းများ၊ စီးပွားရေးလုပ်ငန်းများတွင် အထောက်အပံ့ပေးခဲ့ကာ ၂၀၁၄ မှ စတင်ကာ ကျေးလက်ဒေသ ဖွံ့ဖြိုးရေးကဏ္ဍများတွင် စိုက်ပျိုးရေးနှင့် မွေးမြူရေးကဏ္ဍများကို ဆောင်ရွက်ပေးခဲ့သည်။
၂၀၁၈ ခုနှစ်အတွင်း ရခိုင်၊ ကချင် နှင့် ရှမ်းပြည်နယ်တို့ရှိ စီမံကိန်း ၄ ခုအတွက် စုစုပေါင်း ယူရို ၁၂ ဒသမ ၉ သန်း ၊ လူ့အခွင့်အရေးဆိုင်ရာ အစီအစဉ်များအတွက် ယူရို ၆ ဒသမ ၁ သန်း ထောက်ပံ့ပေးခဲ့သည်။