ရန်ကုန်၊နိုဝင်ဘာ ၉ ။ ။ ငြိမ်းချမ်းစွာ အတူယှဉ်တွဲနေထိုင်မှုများကို ပုံရိပ်စစ်များအဖြစ် ခံစားရမည့် ဗဟုလူမှုရပ်ဝန်းမှ ပြုလုပ်သည့် ဓာတ်ပုံပြပွဲကို ရန်ကုန်မြို့ ဖန်တီးရာအနုပညာပြခန်းတွင် ကျင်းပပြုလုပ်ခဲ့သည်။
ယင်းပြပွဲကို နိုဝင်ဘာလ ၈ ရက်နေ့မှ ၉ ရက်နေ့အထိ နှစ်ရက်ကြာ ကျင်းပခဲ့ခြင်းဖြစ်ပြီး၊ မတူကွဲပြားသော ဘာသာပေါင်းစုံ ချစ်ချစ်ခင်ခင်နှင့် ငြိမ်းချမ်းစွာ အတူလက်တွဲနေထိုင်ရန်အတွက် ရည်ရွယ်ကြောင်း ပြပွဲ စီစဉ်သူများက ဆိုသည်။
"အဓိကရည်ရွယ်ချက်ကတော့ Peace ကိုပဲ ဦးတည်ပြီးသွားတာပဲ။ ဘာသာပေါင်းစုံတွေ ချစ်ချစ်ခင်ခင်နဲ့ လူကိုလူသားတစ်ယောက်လို့မြင်ပြီးတော့ ချစ်ချစ်ခင်ခင်မြင်ကြဖို့ပါ။" ဟု ဓာတ်ပုံဆရာ ကိုညီသစ်ကို ပြောသည်။
ပြပွဲတွင် ပြသထားသည့် ဓာတ်ပုံများကို မန္တလေးမှဓာတ်ပုံဆရာ ၃ ဦးက ရိုက်ကူးထားတာဖြစ်ပြီး ဟိန္ဒူ လူမျိုးများ၏ ရိုးရာဓလေ့ အကြောင်းများ အပါအဝင် ဘာသာမတူသော်လည်း ၀ါသနာတူသည့် လူနှစ်ဦး အကြောင်းကို ဇာတ်လမ်းအဖြစ် ရိုက်ကူးထားခြင်းကိုလည်း တွေ့ရသည်။
" တစ်ခုကကျတော့ ဘုန်းကြီးတစ်ပါးနဲ့ အစ္စလမ်တစ်ယောက်နဲ့ အဂ္ဂိရအတူတူထိုးကြတယ်။ နောက်တစ်ခုက ကျတော့ ဟိန္ဒူလူမျိုးတွေရဲ့ ဟူလီပွဲတော်အကြောင်းရိုက်ထားတာပါ။ " ဟု ဓာတ်ပုံဆရာကိုညီမျိုးစက်က ဆိုသည်။
အဆိုပါပြပွဲတွင် ဓာတ်ပုံပေါင်း ၃၁ ပုံကို ပြသထားပြီး ဘာသာပေါင်းစုံ အတူတကွယှဉ်တွဲနေထိုင်မှု ပုံရိပ်များနှင့် ဘာသာမတူသော လူများ၏လှုပ်ရှားဆောင်ရွက်မှုများကို ပုံဖော်ထားသည့် ဓာတ်ပုံများဖြင့် ခင်းကျင်းပြသ ခဲ့သည်။
