ရန်ကုန်၊နိုဝင်ဘာ ၄ ။ ။ နိုဝင်ဘာလ ၃ ရက် က ကျင်းပခဲ့သည့် ကြားဖြတ်ရွေးကောက်ပွဲ၌ လစ်လပ်မဲဆန္ဒနယ် ၁၃ နေရာစလုံး ဝင်ရောက်ယှဉ်ပြိုင်ခဲ့သည့် အမျိုးသားဒီမိုကရေစီအဖွဲ့ချုပ်ပါတီ NLDမှ ၇ နေရာအနိုင်ရပြီး ၆ နေရာ ရှုံးနိမ့်ခဲ့သည်ဟု ပါတီပြောရေးဆိုခွင့်ရှိသူ ဒေါတာမျိုးညွန့်က မဇ္စျိမသို့ အတည်ပြုပြောဆိုသည်။
"ကျွန်တော်တို့ရရှိထားတဲ့အချက်အလက်တွေအရ ၇ နေရာ အနိုင်ပါတယ်။ ၆ နေရာ ရှုံးနိမ့်ထားပါတယ်" ဟု ဒေါက်တာမျိုးညွန့်က ဆိုသည်။
တိုင်းဒေသကြီး နှင့် ပြည်နယ်လွှတ်တော်မဲဆန္ဒ ၈ နေရာကို အုတ်တွင်း၊ သပိတ်ကျင်း၊ မင်းဘူးမြို့နယ် ၃ နေရာတွင် NLD မှ အနိုင်ရရှိခဲ့ပြီး တမူးနှင့် ဆိပ်ကမ်းမြို့နယ်တွင် USDP၊ မတူပီမြို့နယ်တွင် ချင်းအမျိုးသားဒီမိုကရေစီပါတီ၊ ရသေ့တောင်မြို့နယ်တွင် ဒေါက်တာအေးမောင်၏ သားဖြစ်သူ တသီးပုဂ္ဂလိကကိုယ်စားလှယ် ဦးတင်မောင်ဝင်းက အနိုင်ရရှိခဲ့သည်။
ပြည်သူ့ လွှတ်တော် ၄ နေရာတွင် ကန်ပက်လက်၊ တာမွေနှင့် မြင်းခြံမြို့နယ်ကို NLD မှ ရရှိခဲ့ပြီး လဲချားမြို့နယ်ကို ရှမ်းတိုင်းရင်းသားများ ဒီမိုကရေစီအဖွဲ့ချုပ် SNLD မှ အနိုင်ရရှိခဲ့သည်။
အဓိကအတိုက်အခံဖြစ်သည့် USDP ပြည်ထောင်စုကြ့ံခိုင်ဖွံ့ဖြိုးရေးပါတီက ၃ နေရာရပြီး အမျိုးသားလွှတ်တော် (၁)နေရာ မစ်ကြီးနားမြို့နယ်တွင် ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ USDPပါတီက အနိုင်ရခဲ့သည်။
မန္တလေးတိုင်း၏ ရှမ်းတိုင်းရင်းသားလူမျိုး မဲဆန္ဒနယ်နေရာတွင် NLD မှ ရှမ်းတိုင်းရင်းသားကိုယ်စားလှယ်က အနိုင်ရရှိခဲ့သည်။
"ကျွမ်တော်တို့ရှုံးနိမ့်ခဲ့တဲ့ ၆ နေရာမှာ ၅ နေရာက တိုင်းရင်းသားနယ်မြေတွေဖြစ်ပါတယ်။ဆိုတော့ တိုင်းရင်းသားတွေနဲ့ကျွန်တော်တို့ ပိုပြီးနားလည်မှုရှိအောင် ကြိုးစားရပါမယ်" ဟု ဒေါက်တာမျိုးညွန့်ကဆိုသည်။
ကြားဖြတ်ရွေးကောက်ပွဲရလဒ်များနှင့်ပတ်သက်ပြီး ပြည်ထောင်စုရွေးကောက်ပွဲကော်မရှင်က အတည်ပြုထုတ်ပြန်ထားခြင်းမရှိသေးဘဲ ယခုရရှိထားသည့် အချက်အလက်များသည်အမျိုးသားဒီမိုကရေစီ အဖွဲ့ချုပ်က ရရှိထားသည့် အချက်အလက်များသာဖြစ်သည်။
