မကွေး၌ ဆူပူရမ်းကားမှုကို သွားတားသော ရဲတပ်ဖွဲ့ဝင်များ ထိုးကြိတ်ခံရ

.

မကွေး၊ သြဂုတ်လ ၁၇ ။          ။ မကွေးမြို့ရှိ စားသောက်ဆိုင် တစ်ဆိုင်ရှေ့တွင် ဆူပူရမ်းကားနေကြောင်း ဖုန်းဆက်သဖြင့် သွားရောက်ခဲ့သော ရဲတပ်ဖွဲ့ဝင်များကိုလူငယ် ၅ ဦးက ဝိုင်းဝန်းရိုက်နှက်မှုဖြစ်ပွားခဲ့သည်။

ဖြစ်စဉ်မှာ ယမန်နေ့ သြဂုတ်လ ၁၆ ရက်၊ ည ၉ နာရီ ၂ဝ မိနစ်ခန့်တွင် မကွေးမြို့၊ သိင်္ဂါရပ်ကွက်၊ မြို့ရှောင်လမ်း ဘေးရှိ MT စားသောက်ဆိုင်မှ ဆိုင်မန်နေဂျာက လူငယ် ၅ ဦး မူးယစ်ဆူပူသောင်းကျန်းနေကြောင်း ဖုန်းဆက်အကြောင်းကြားသဖြင့် နယ်ထိန်းခေါင်းဆောင် ရဲအုပ်ကျော်မင်းထွဋ် အပါအ၀င် ရဲတပ်ဖွဲ့ဝင် ၅ ဦး တို့က စားသောက်ဆိုင်သို့ သွားရောက်ခဲ့ကြကြောင်း သိရသည်။

ဆိုင်သို့ ရောက်ရှိချိန်တွင် ဆူပူသောင်းကျန်းမှုမပြုရန် တားမြစ်ခဲ့ရာ လူငယ်တစ်ဦးက ရဲတပ်သား ကျော်သူငြိမ်း ကို လက်သီးဖြင့် စတင်ထိုးခဲ့ပြီး ရဲအုပ်ကျော်မင်းထွဋ်၊ ရဲတပ်သား အောင်မျိုးသန့်တို့က ထပ်မံတားမြစ်ရာ လူငယ် ၅ ဦးက ရဲတပ်ဖွဲ့ဝင်များကို ဝိုင်းဝန်းထိုးကြိတ်ခဲ့ကြသည်။

“ ဖြစ်စဉ်ကမှန်တယ်။ အရိုက်ခံရတာပေါ့ဗျ။ လက်သီးနဲ့အထိုးခံရတယ်။ ၅ ယောက်ပြောတယ်။ ၅ ယောက်ကို ၃ ယောက်ဖမ်းထားတယ်။ ၂ ယောက်ကျန်သေးတယ်။ သုံးယောက်မိထားပြီ။ မကွေးက ကောင်တွေပဲ။ မကွေး အမှတ် ၁ အပိုင်မှာ”ဟု မကွေးတိုင်းဒေသကြီးရဲတပ်ဖွဲ့မှူးရုံး ဒုရဲမှူးမျိုးတင့်က မဇ္ဈိမသို့ အတည်ပြုပြောသည်။

ဝိုင်းဝန်းထိုးကြိတ်ခံခဲ့ရသဖြင့် နယ်ထိန်း ရဲအုပ်ကျော်မင်းထွဋ်မှာ ဝဲမျက်ခုံး၊ ဝဲနဖူးပေါက်ပြဲ၊ ဝဲပါး/နားထင်၊ မေးစေးပွန်းပဲ့၊ အောက်အံ့သွားနဲ့ ဒဏ်ရာရရှိခဲ့ပြီး ရဲတပ်သား အောင်မျိုးသန့်မှာ နှာခေါင်းနာကျင်ဒဏ်ရာ၊ ရဲတပ်သား ကျော် သူငြိမ်းမှာ အောက်နှုတ်ခမ်းပေါက်ပြဲ၊ ယာလက်ချောင်းပွန်းပဲ့ဒဏ်ရာတို့ရရှိခဲ့သည်။

ရဲများအား ရိုက်နှက်ခဲ့သူ ၅ ဦးအနက် အသက် ၂၇ နှစ်အရွယ် နိုင်လင်းထွန်း၊ ဇော်မျိုးဦး(ခ)ဂဏန်း၊ အခြား တစ်ဦးတို့အား ဖမ်းဆီးရမိခဲ့ကြောင်း၊ လက်ရှိတွင် ၂ ဦးလွတ်မြောက်နေကြောင်း ဒုရဲမှူးမျိုးတင့်က မဇ္ဈိမသို့ အတည်ပြုပြောသည်။

လက်ရှိတွင် ရိုက်နှက်ခဲ့သူ ၅ ဦးအား မကွေးမြို့မရဲစခန်းတွင် (ပ) ၉၁၂/၂ဝ၁၈၊ ရာဇသတ်ကြီးဥပဒေပုဒ်မ- ၃၃၃ ဖြင့် အမှုဖွင့်ထားကြောင်းသိရသည်။