မန္တလေးမြို့ပေါ်ရှိ ဈေးများကို ခွင့်မပြုဓာတုဆိုးဆေးကင်းစင်သော ဈေးများအဖြစ် ကြေညာနိုင်ရန် စစ်ဆေး

.

မန္တလေးမြို့ပေါ်ရှိ ဈေးများအားလုံးကို ခွင့်မပြုဓာတုဆိုးဆေးကင်းစင်သော ဈေးများအဖြစ် ကြေညာနိုင်ရန် ဇူလိုင်လနောက်ဆုံးအပတ်မှ စတင်၍ စစ်ဆေးဆောင်ရွက်လျက်ရှိကြောင်း အစားအသောက်နှင့် ဆေးဝါး ကွပ်ကဲရေးဦးစီးဌာန (မန္တလေးဌာနခွဲ)မှ သိရသည်။

မန္တလေးမြို့တွင် ဈေးပေါင်း (၄၀)ကျော်ရှိပြီး အဆိုပါ ဈေးများထဲမှ သတ်မှတ်စည်းကမ်းနှင့်အညီ ရောင်းချသော ဈေးများကို ခွင့်မပြုဓာတုဆိုးဆေးကင်းစင်သော ဈေးများအဖြစ် ကြေညာပေးနိုင်ရန် ဆောင်ရွက်နေခြင်း ဖြစ်သည်။

'' မန္တလေးမြို့ပေါ်မှရှိတဲ့ ဈေးအားလုံးကို ခွင့်မပြုဓာတုဆိုးဆေးကင်းစင်သော ဈေးအဖြစ် ကြေညာနိုင်ဖို့ မန္တလေးမြို့တော်စည်ပင်သာယာရေးကော်မတီ နဲ့ အစားအသောက်နှင့် ဆေးဝါးကွပ်ကဲရေးဦးစီးဌာန (မန္တလေးဌာနခွဲ) ပူးပေါင်းပြီး ဇူလိုင်လ နောက်ဆုံးအပတ်ကစပြီး စစ်ဆေးဆောင်ရွက်နေပါတယ်၊ ပြည်သူတွေ အနေနဲ့ ပူးပေါင်းပါဝင် ဆောင်ရွက်ပေးစေချင်ပါတယ် '' ဟု အစားအသောက် နှင့် ဆေးဝါးကွပ်ကဲရေးဦးစီးဌာန (မန္တလေးဌာနခွဲ) ဒုတိယညွန်ကြားရေးမှူး ဒေါက်တာ ကျော်ကျော်က ပြောသည်။

(၁) ပြည်သူလူထု၏နေ့စဉ်စားသုံးနေသော အစားအသောက်များ ဘေးအန္တရာယ်ကင်းရှင်းရေး၊ အရည်အသွေး ပြည့်ဝမှုရှိစေရေး (၂) မန္တလေးဈေးချိုတော်အား ဆိုးဆေးကင်းစင်သော စံပြဈေးတစ်ခုဖြစ်ပေါ်လာစေရေး (၃) မန္တလေးမြို့ပေါ်ရှိအခြားဈေးများတွင်လည်း ဆိုးဆေးများကင်းစင်လာရေး၊ (၄) အစားအသောက်များတွင် ဆိုးဆေးများ ကင်းစင်လာသည်နှင့်အမျှ ပြည်သူများ၏ လူသက်တမ်းပိုမိုတိုးတက်လာချိန်တွင် ဈေးသည်များ၏ စီးပွားရေးလည်း ပိုမိုကောင်းမွန်လာရေး စသည့် ရည်မှန်းချက်များဖြင့် အကောင်အထည် ဆောင်ရွက်လျက်ရှိ ကြောင်း သိရသည်။

မန္တလေး ဈေးချိုတော်ကို ခွင့်မပြုဓာတုဆိုးဆေးကင်းစင်သော ဈေးအဖြစ် ကြေညာနိုင်ရေးအတွက် အစိုးရသစ် လက်ထက် (၂၀၁၆) မတ်လမှ စတင်၍ စီမံချက်တစ်ရပ်ရေးဆွဲကာ အကောင်အထည်ဖော်ခဲ့ပြီး (၂၀၁၈)ခုနှစ် ဇူလိုင်(၂၅)ရက်တွင် မြန်မာနိုင်ငံတွင် ပထမဆုံး ခွင့်မပြုဓာတုဆိုးဆေးကင်းစင်သော ဈေးအဖြစ် ဈေးချိုတော်ကို ကြေညာနိုင်ခဲ့ကြောင်း သိရသည်။