ပညာရေးကောလိပ်၏ စွန့်လွှတ်ယာမြေများရရှိရေး အတော်ကြိုးစားခဲ့ရဟု မကွေးဝန်ကြီးချုပ်ဆို

.

သြဂုတ် ၁၆ ။         ။ ပညာရေးဌာနပိုင် ယာမြေဧက ၅၀ ကျော်ကို စွန့်လွှတ်မြေအဖြစ်ရရှိရေးအတွက် အတော်ကြိုးစားခဲ့ရကြောင်း မကွေးတိုင်း ဒေသကြီးအစိုးရအဖွဲ့ဝန်ကြီးချုပ် ဒေါက်တာအောင်မိုးညိုက ပြောသည်။

“ပညာရေးဝန်ကြီးဌာနက ပြန်မစွန့်လွှတ်ချင်ဘူး။ ကျွန်တော်တို့ကလည်း လယ်သမား၊ ယာသမား စားဝတ်နေရေးအတွက် ပြန်ရရှိဖို့ တာဝန်ရှိသူတွေအားလုံး တော်တော်ကြိုးစားခဲ့ရပါတယ်”ဟု မကွေးတိုင်း ဒေသကြီးအစိုးရအဖွဲ့ဝန်ကြီးချုပ် ဒေါက်တာအောင်မိုးညိုက ပြောသည်။

မကွေးတိုင်းဒေသကြီးအစိုးရ၏ ကြိုးစားမှုကြောင့်ပညာရေးကောလိပ်(မကွေး)မှ ပြန်စွန့်လွှတ်သည့် ယာမြေ ဧက ၅၀ ကျော်အား ယာယီလုပ်ကိုင်ခွင့်ပြုလက်မှတ် ပုံစံ ၃ များကို ယနေ့ သြဂုတ်လ ၁၆ ရက်နေ့က မကွေးမြို့နယ်၊ မကြီးကန်ကျေးရွာရှိ အေးစေတီဘုရားဓမ္မာရုံတွင် မူလတောင်သူများထံ ပေးအပ်ခဲ့သည်။

ပညာရေးကောလိပ်(မကွေး)မှ မကွေးမြို့နယ် မကြီးကန်အုပ်စု နွားကူးကျေးရွာမှတောင်သူများနှင့် ဆားရွှေကင်း ရပ်ကွက်မှတောင်သူများ၏ ယာမြေများကို ၁၉၉၈ ခုနှစ်က ဧက(၁၀၀ ဒဿမ၃၁) ကို သိမ်းဆည်းခဲ့ပြီး ယခု အချိန်တွင် ပညာရေးဝန်ကြီးဌာနမှ အမှန်တစ်ကယ်အသုံးပြုထားသည့် ဧက ၅၀ ကိုသာ အသုံးပြု၍ ကျန်သည့် ယာမြေဧက(၅၀ဒဿမ၃၁) ဧကကို တောင်သူများထံ ပြန်လည်စွန့်လွှတ်ကြောင်း မကွေးတိုင်းဒေသကြီး စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီး ဦးဝင်မော်ဌေးက ပြောသည်။

အဆိုပါယာယီလုပ်ပိုင်ခွင့်လက်မှတ်ပုံစံ(၃)ပေးမည့် ယာမြေဧက (၅၀ဒဿမ၃၁ဧက)ကို တောင်သူ(၂၇)ဦး အားပေးအပ်သွားမည်ဖြစ်သော်လည်း (၆ ဒဿမ ၆၃ဧက)မှာ တောင်သူသုံးဦးအငြင်းပွားမှုရှိနေသဖြင့် တရားရုံးတွင် ရင်ဆိုင်နေကြောင်း ကျောင်းအတွင်းလမ်းများအသုံးပြုမြေမှာ(၂ဒဿမ ၁၁ဧက) အသုံးပြု ထားသောကြောင့် (၄၁ ဒဿမ ၅၇ ဧက)ကို တောင်သူ (၂၄) ဦးထံ ယာယီလုပ်ပိုင်ခွင့်လက်မှတ် များပေး အပ်ကြောင်း သိရသည်။

ယာယီလုပ်ပိုင်ခွင့်ရတောင်သူတစ်ဦးက “သိမ်းဆည်းပြီး အချိန်ကအတိုင် အခုချိန်ထိတော့ ပိုလျှံတဲ့ ယာမြေပေါ်မှာ လုပ်ပိုင်ခွင့်ပေးပါတယ်။ ကိုယ့်ယာမြေ ကိုယ်လုပ်တာကို တစ်ဧက ၆၀၀၀ ကျပ် ပေးဆောင်ပြီး လုပ်ခဲ့ရတာပါ။ လုပ်နေတဲ့အချိန်မှာလည်း အခု လုပ်လုပ်၊ အခု မလုပ်နဲ့ မလုပ်နဲ့ နဲ့ စိတ်အေးလက်အေး လုပ်ခဲ့ရတာ မရှ်ိပါဘူး။ အခု တိုင်းအစိုးရက ယာယီလုပ်ပိုင်ခွင့် ပြန်ပေးပြီး နောက်ပိုင်းမှာလည်း ပုံစံ(၇) လုပ်ပေးမယ်ဆိုတော့ ဝမ်းသာရပါတယ်”ဟု ပြောသည်။

လက်ရှိတွင် ယာယီလုပ်ကိုင်ခွင့်ပေးခြင်း ဖြစ်သော်လည်း သားစဉ်မြေးဆက် လုပ်ကိုင်ခွင့် ရရှိစေရန် ဆောင်ရွက်ပေးမည်ဟု သိရသည်။

“အခုက ယာယီလုပ်ပိုင်ခွင့်လက်မှတ်ပုံစံ (၃) ပေးတာပါ။ နောက်ပိုင်းကျရင် သားစဉ်မြေးဆက် ယာမြေ လုပ်ပိုင်ခွင့် အာမခံချက်ရရှိဖို့ ပုံစံခွန်တွေပေးအပ်ဖို့ဆောင်ရွက်ပေးသွားမှာပါ”ဟု မကွေးတိုင်းဒေသကြီး အစိုးရအဖွဲ့စိုက်ပျိုးရေး၊မွေးမြူရေးနှင့် ဆည်မြောင်းဝန်ကြီး ဦးဝင်းမော်ဌေးက ပြောသည်။

အဆိုပါ ယာယီလုပ်ကိုင်ခွင့်ပြုလက်မှတ် ပုံစံ(၃)ပေးအပ်ပွဲတွင် မကွေးတိုင်းဒေသကြီးအစိုးရအဖွဲ့ဝန်ကြီး ဒေါက်တာ အောင်မိုးညို ၊မကွေးတိုင်းဒေသကြီး အစိုးရအဖွဲ့ စိုက်ပျိုးရေးမွေးမြူရေးနှင့်ဆည်မြောင်းဝန်ကြီး ဦးဝင်းမော်ဌေး မကွေးတိုင်းဒေသကြီး လွှတ်တော်ကိုယ်စားလှယ်များ၊ တိုင်းအဆင့် ဌာနဆိုင်ရာအကြီးအကဲများ မြို့နယ်အဆင့် ဌာနဆိုင်ရာ အကြီးအကဲများ၊ ပညာရေးဌာနမှ ဆရာ၊ဆရာမများ တောင်သူများတက်ရောက်ခဲ့ သည်။