အအေးမိတုပ်ကွေးရောဂါပိုးကို ကြိုတင်ကာကွယ်ဖို့ ထိရောက်တဲ့နည်းလမ်းတစ်ခု

.

ရေးသားသူ Yun Sandi Nan Mon
ဆေးပညာပိုင်းဆိုင်ရာတည်းဖြတ်သူ Dr. Thurein Hlaing Win.

ဟတ်ချိုး ဟတ်ချိုးနဲ့ နှာချေသံထွက်လာပြီး နှာရည်ပါကျလာပြီ၊ နေလို့မကောင်းတော့ဘူးဆိုရင် ဖျားတော့မယ်လို့ သိကြတယ်။ ရာသီကြောင့်အအေးမိဝေဒနာဖြစ်တာလား၊ တုပ်ကွေးဖြစ်တော့မှာလား စိုးရိမ်ရပါပြီ။

သာမန်အအေးမိဝေဒနာပဲဖြစ်ဖြစ် တုပ်ကွေးပဲဖြစ်ဖြစ် နှာစေး၊ နှာပိတ်၊ လည်ချောင်းနာ၊ချောင်းဆိုး၊ ကိုယ်ပူ စတဲ့လက္ခဏာတွေထဲမှာ လည်ချောင်းနာက ခံရအခက်ဆုံးပါ။ အသက်ရှူလမ်းကြောင်းပိုးဝင်ခြင်းလို့ ဆေးပညာအရခေါ်ကြတဲ့ အအေးမိဝေဒနာမှာ ရောဂါပိုးတွေက ပုံမှန်အားဖြင့် လည်ချောင်းနဲ့ခံတွင်းမှာ ရှိနေတတ်ပါတယ်။

ဒီဝေဒနာတွေစပြီးခံစားလာရတဲ့အခါ ဒါမှမဟုတ် ဖြစ်ဖို့အစပျိုးနေပြီလို့ခံစားရရင် နာမကျန်းတဲ့အဆင့်မရောက်အောင် ဘယ်လိုကာကွယ်လို့ရမလဲ။ ကိုယ့်အတွက်တင်မကဘဲ ကိုယ့်မိသားစု၊ ကိုယ့်သားသမီး၊ ကိုယ်ချစ်ခင်ရသူတွေမှာ ဘယ်လိုဂရုစိုက်ပေးနိုင်မလဲ။ ကြိုတင်ကာကွယ်နိုင်တဲ့အလွယ်ဆုံးနည်းက အားရှိအောင်ကျွေး၊ အာဟာရပြည့်ဝအောင်ဂရုစိုက်ပေးပြီး ကိုယ်ခံအားကိုမြှင့်တင်ပေးရမှာပါ။

ဒါပေမယ့် ဗိုင်းရပ်စ်နဲ့ဘက်တီးရီးယားပိုးတွေကြောင့်ဖြစ်လာရတဲ့ ဒီဝေဒနာတွေအတွက်က ဒီလောက်နဲ့မလုံလောက်ပါဘူး။ ပဋိဇီဝဆေးတွေသုံးစရာမလိုဘဲ ကြိုတင်ကာကွယ်ပေးမယ့်၊    ဖြစ်လာခဲ့ရင်တောင် ဝေဒနာသက်သာအောင် ကူညီပေးမယ့် အရာတစ်ခုရှိတယ်။ အဲဒါကတော့ ခံတွင်းသန့်ဆေးရည်ပါ။

ခံတွင်းသန့်ဆေးရည်နဲ့ပလုပ်ကျင်းပေးရင် ရောဂါပိုးမွှားတွေကို ရှင်းလင်းဖယ်ရှားပေးနိုင်ပြီး ခံတွင်းကျန်းမာရေးကိုကောင်းမွန်စေပါလိမ့်မယ်။ ရောဂါပိုးတွေသေစေနိုင်တဲ့ခံတွင်းသန့်ဆေးရည်နဲ့ဆို လည်ချောင်းနာတာလိုမျိုး အအေးမိလက္ခဏာတွေကို သက်သာစေပြီး ဝေဒနာခံစားရတဲ့ရက်တွေကို တိုစေနိုင်ပါတယ်။

လည်ချောင်းထဲက ပိုးမွှားတွေ၊ဗိုင်းရပ်စ်တွေကို ရှင်းလင်းပေးတဲ့ ခံတွင်းသန့်ဆေးရည်က အအေးမိဝေဒနာတွေကိုသက်သာစေရုံမက ထပ်ပြီးဖြစ်မလာအောင်လည်းတားဆီးပေးတဲ့အတွက် ကြိုတင်ကာကွယ်ဖို့လည်း သုံးလို့ရပါတယ်။ စစချင်း လည်ချောင်းယားတာ၊လည်ချောင်းစပ်တာစတဲ့ လက္ခဏာတွေကတည်းက ခံတွင်းသန့်ဆေးရည်နဲ့ ပလုပ်ကျင်းပေးရင် ဝေဒနာတချို့တဝက် သက်သာစေနိုင်ပါတယ်။ စက္ကန့် ၃၀ လောက်ပဲအချိန်ပေးပြီး ပလုပ်ကျင်းလိုက်ရုံနဲ့ လွယ်ကူထိရောက်တဲ့ ကာကွယ်မှုကို ရရှိနိုင်ပါတယ်။

အများအားဖြင့်ခံတွင်းသန့်ဆေးရည်ရဲ့အကျိုးကျေးဇူးတွေကတော့ –

  •     ခံတွင်းရှင်းစေတယ် –  ခံတွင်းသန့်ဆေးရည်က ခံတွင်းနံ့ဆိုးထွက်စေတဲ့ဘက်တီးရီးယားတွေကို သေစေတဲ့အတွက် ခံတွင်းနံ့ဆိုးတွေကို သက်သာလျော့ပါးစေပါတယ်။
  •     သွားမှာအညစ်အကြေးတွေမကပ်ငြိအောင်ကာကွယ်ပေးတယ်-  သွားဖုံးနဲ့သွားကြားမှာ သွားချေးတွေကပ်ငြိမနေအောင်ကာကွယ်ရှင်းလင်းပေးပါတယ်။
  •     အမှုန်အမွှားတွေကို ဖယ်ရှားပေးတယ် – အများစုက ခံတွင်းသန့်ဆေးရည်ကို သွားတိုက်ပြီးမှပဲ သုံးကြပါတယ်။ ဒါလည်းကောင်းတယ်ဆိုပေမယ့် သွားမတိုက်ခင် အမှုန်အမွှားတွေကို ခံတွင်းကနေ ဆေးထုတ်နိုင်ဖို့ ဆေးရည်နဲ့အရင်ပလုပ်ကျင်းပေးလို့ရပါတယ်။
  •     သွားပေါက်မဖြစ်အောင်၊ သွားပိုးမစားအောင် ကာကွယ်ပေးတယ် – ခံတွင်းသန့်ဆေးရည်ကို ပုံမှန်သုံးပေးရင် သွားပိုးစားခြင်း၊ သွားအခေါင်းပေါက်ဖြစ်ခြင်းကို ကာကွယ်ပေးနိုင်ပါတယ်။
  •     လည်ချောင်းနာသက်သာစေတယ်-  လည်ချောင်းနာဖြစ်စေတဲ့ ရောဂါပိုးမွှားတွေကို ဖယ်ရှားသန့်စင်ပေးတယ် ။

နေမကောင်းဖြစ်နေချိန် အထူးသဖြင့် အအေးမိတုပ်ကွေးရောဂါလက္ခဏာတွေ ခံစားနေရချိန်မှာ နှာစေး၊ချောင်းဆိုးဖြစ်နေမှာပဲဆိုတော့ လည်ချောင်းထဲက၊ ခံတွင်းထဲက ကပ်ကျန်နေတဲ့ ချွဲသလိပ်အစအနတွေကို ခံတွင်းသန့်ဆေးရည်နဲ့ဆေးကြောရှင်းထုတ်နိုင်ပါတယ်။ နောက်ထပ်ထိရောက်တဲ့အကျိုးကျေးဇူးကတော့ အအေးမိလက္ခဏာတွေကို ကြိုတင်ကာကွယ်နိုင်ပြီး ဖြစ်လာခဲ့ရင်လည်း အချိန်တိုတိုနဲ့အမြန်သက်သာစေတာပါပဲ။

ဤဆောင်းပါးကို Mizzima ၏ မိတ်ဘက် ကျန်းမာရေးနှင့် ဆေးပညာဝက်ဘ်ဆိုဒ် hellosayarwon.com မှ ကူးယူဖော်ပြပါသည်။