ကြံစိုက်တောင်သူများနှင့် သကြားစက်ရုံပိုင်ရှင်တို့အကြား ဈေးနှုန်းအငြင်းပွားမှု ဖြစ်ပွား

.

 

 

မုံရွာ၊ သြဂုတ် ၁၀။         ။ စစ်ကိုင်းတိုင်းဒေသကြီး ထီးချိုင့်မြို့နယ်တွင် ကြံစိုက်တောင်သူများနှင့် သကြားစက်ရုံတို့အကြား ဈေးနှုန်း အငြင်းပွားမှုဖြစ်ပွားနေကြောင်း၊ စစ်ကိုင်းတိုင်းဒေသကြီးလွှတ်တော် စိုက်ပျိုးရေး၊ မွေးမြူရေး၊ သယံဇာတနှင့် သဘာဝပတ်ဝန်းကျင်ထိန်း သိမ်းရေးဆိုင်ရာ ကော်မတီမှ သိရသည်။

အဆိုပါ ကိစ္စအတွက် စစ်ကိုင်းတိုင်းဒေသကြီးလွှတ်တော် စိုက်ပျိုးရေး၊ မွေးမြူရေး၊ သယံဇာတနှင့် သဘာဝပတ်ဝန်းကျင်ထိန်း သိမ်းရေးဆိုင်ရာကော်မတီထံသို့ တိုင်ကြားစာများ ရောက်ရှိလာသဖြင့် သြဂုတ်လ ၃ ရက်နေ့တွင်  ကော်အတီအစည်းအဝေးပြုလုပ်ခဲ့ကြောင်း သိရသည်။

"ဒီနေ့ညနေပဲ ကွင်းဆင်းစစ်ဆေးမှုတွေပြုလုပ်သွားမှာဖြစ်ပါတယ်။ နှစ်ဦးနှစ်ဖက်လုံးက အပြန်အလှန်တိုင်ကြား ထားတာဖြစ်ပါတယ်။ ဈေးနှုန်း အငြင်းပွားမှုပါ" ဟု စိုက်ပျိုးရေး၊ မွေးမြူရေး၊သယံဇာတနှင့်သဘာဝ ပတ်ဝန်းကျင် ထိန်းသိမ်းရေးဆိုင်ရာကော်မတီ ဥက္ကဋ္ဌ ဦးမြင့်ဦးက သြဂုတ်လ ၁၀ ရက်နေ့က ပြောသည်။

ထီးချိုင့်မြို့နယ်ရှိ ဂရိတ်ဝေါသကြားစက်သည် ကြံစိုက်တောင်သူများထံမှ ကြံဝန်ယူရာ၌ တောင်သူများကို ခေါ်ယူတွေ့ဆုံညှိနှိုင်းခြင်းမရှိပဲ ဈေးနှိမ်ဝယ်ယူသည်ဟုဆိုကာ ဇွန် ၂၀ ရက်က တောင်သူ ၁၅၀၀ ကျော်မှ ဆန္ဒပြခဲ့ကြသည်။

သကြားစက်မှ ကြိတ်ဝါးကြံများဝယ်ယူရာ၌ ကြံစိုက်တောင်သူများ၊ လွှတ်တော်ကိုယ်စားလှယ်များ၊ အထွေထွေ အုပ်ချုပ်ရေးမှူး၊ ကုမ္ပဏီတာဝန်ရှိသူများ တွေ့ဆုံ၍ ကြံ(၁)တန်လျှင် ၄၅၀၀၀ ကျပ်ဖြင့် ဝယ်ယူမည်ဟု ဆိုခဲ့သော်လည်း လက်တွေ့ဝယ်ယူရာ၌ ၄၃၀၀၀ ကျပ်ကိုသာပေးချေခဲ့သည်ဟု တောင်သူများ၏ တိုင်ကြားစာ၌ ဖော်ပြထားကြောင်း အဆိုပါကော်မတီအဖွဲ့ဝင်တစ်ဦးက ရှင်းပြသည်။

ယခုကဲ့သို့ ဈေးနှိမ်ကာဝယ်ယူခြင်းကို လွှတ်တော်ကိုယ်စားလှယ်များနှင့်၊ အထွေထွေအုပ်ချုပ်ရေးမှူးတို့မှ ၂၀၁၈ ခုနှစ် မေလအတွင်း၌ ကြားဝင်ညှိနှိုင်းခဲ့သော်လည်း ကုမ္ပဏီဘက်မှငြင်းဆန်ခဲ့သဖြင့် ဇွန် ၂၀ ရက်တွင် ကြံစိုက် တောင်သူများက ဆန္ဒပြခဲ့ကြခြင်း ဖြစ်သည်။

 ထီးချိုင့်မြို့နယ်ရှိ မောင်းကုန်း၊ ငါးအိုး။ ယင်းခဲ၊ ကြက်တကောင်၊ အေးချမ်းလွင်၊ အင်းရွာ စသည့်ကျေးရွာ တို့သည် ကြံစိုက်ပျိုးရေးကို ၁၉၉၃ ခုနှစ်မှ စတင်ကာ မိရိုးဖလာကြံစိုက်ပျိုးလာခဲ့ကြောင်း သိရသည်။