ရန်ကုန်၊ သြဂုတ် ၈ ။ ။ ရှစ်လေးလုံးအရေးတော်ပုံ နှစ် ၃၀ ပြည့်အခမ်းအနားကို ပထမဆုံးအကြိမ်အဖြစ် ရန်ကုန်တက္ကသိုလ်တွင် သြဂုတ်လ ၆ ရက်မှ ၈ ရက်နေ့အထိ ၃ ရက်ကြာကျင်းပခဲ့သည်။
မ.ဆ.လ စနစ်ကိုရုပ်သိမ်း၍ ပါတီစုံဒီမိုကရေစီစနစ်ကိုတောင်းဆိုရာမှ ၁၉၈၈ ခုနှစ် သြဂုတ်လ ၈ ရက်နေ့တွင် ရှစ်လေးလုံးအရေးတော်ပုံကြီး စတင်ဖြစ်ပွားခဲ့ခြင်းလည်းဖြစ်သည်။
“ ပြည်သူလူထုအများစုတစ်ခဲနက် အုံကြွမပါဝင်ဘဲ ကြီးမားတဲ့အပြောင်းအလဲကိုမရပါဘူး။ အထူးသဖြင့် အာဏာရှင် စနစ်ဆိုးရဲ့အောက်မှာပါ။ မနေ့ကလည်းဆွေးနွေးကြပါတယ်။ အရှေ့ဥရောပနိုင်ငံတွေထက် ကျွန်တော်တို့က တာထွက်စောတယ်။ ဒါပေမယ့် နောက်ကျကျန်ရစ်တာကိုတော့ ဝန်ခံရလိမ့်မယ် “ ဟု ၈၈ မျိုးဆက်ကျောင်းသားခေါင်းဆောင်ဟောင်း ဦးမင်းကိုနိုင် ကပြောသည်။
အဆိုပါ အခမ်းအနားတွင် ရှစ်လေးလုံးအရေးတော်ပုံ နှစ် ၃၀ ပြည့်ကာလအား ပြန်လည်သုံးသပ်သည့် ဆွေးနွေးပွဲများကိုပြုလုပ်ခဲ့ပြီး ဒီမိုကရေစီအရေး နှစ် ၃၀ ခရီး၊ တိုင်းရင်းသားများတန်းတူရေးနှင့် ဖက်ဒရယ် ပြည်ထောင်စု၊ မြန်မာ့နိုင်ငံရေးနှင့် စစ်အာဏာရှင်စနစ်ဆိုသည့် ခေါင်းစဉ် ၃ ခုကိုအစိုးရနှင့် လွှတ်တော်ထံ ဆွေးနွေးအကြံပြုခဲ့ကြသည်။
ယခုကဲ့သို့ အထိမ်းအမှတ်ပွဲကျင်းပခြင်း ဆွေးနွေးပွဲကျင်းပနေခြင်းသည် အတိတ်ကာလကိုနာကျဉ်း၍ မဟုတ်ဘဲ ၈၈ ကာလ၏ ဖြစ်ရပ်များကို လူငယ်များ သိစေချင်သောကြောင့် ကျင်းပခြင်းဖြစ်ကြောင်း သိရသည်။
“ ဒီနှစ် ၃၀ ခရီးတစ်လျှောက်မှာ ကျွန်တော်တို့အခုဒီနေရာမှာပြန်ဆုံတော့ ပိုင်ရှင်မဲ့ ကစဉ့်ကလျား ဖိနပ်ကလေးတွေ၊ စာသင်ခန်းထဲကထိုင်ခုံလွတ်ကလေးတွေ၊ လွယ်အိပ်စုတ်ကလေးတွ၊ အဲ့တာတွေဟာ ရုပ်ဝတ္ထုတွေမဟုတ်ပါဘူး။ ကျွန်တော်တို့သမိုင်းရဲ့တကယ့်အဖြစ်အပျက်တွေပါ။ ဒဏ်ရာ ဒဏ်ချက် တွေပါ။ ဒါတွေကိုနောက်မျိုးဆက်တွေကို လက်ဆင့်မကမ်းချင်တော့ဘူး “ ဟု ၈၈ မျိုးဆက်ကျောင်းသား ခေါင်းဆောင်ဟောင်း ဦးကိုကိုကြီးကပြောသည်။
ရှစ်လေးလုံးနှစ် ၃၀ပြည့် အခမ်းအနားကို ရန်ကုန်တိုင်းဝန်ကြီးချုပ်နှင့် အစိုးရအဖွဲ့ဝင်များ၊ လွှတ်တော် အမတ်များ၊ နိုင်ငံရေးအကျဉ်းသားဟောင်းများ၊ ၈၈ မျိုးဆက်များတက်ရောက်ခဲ့ကြပြီး ပြည်ထောင်စုလွှတ်တော်၊ အမျိုးသားလွှတ်တော်ဥက္ကဋ္ဌများနှင့်တခြားသက်ဆိုင်ရာအဖွဲ့စည်းများမှသဝဏ်လွှာများလည်း ပေးပို့ခဲ့ကြသည်။
