ရန်ကုန်၊ ဇူလိုင် ၂၇ ။           ။ မြန်မာနိုင်ငံအတွင်း မီးရထားလမ်းရေကျော်မှုများကြောင့် ရန်ကုန်-မန္တလေးစာပို့အမြန်ရထားနှင့် မော်လမြိုင်ရထားများ  ပြေးဆွဲမှုကို ဇူလိုင်လ ၂၇ ရက်နေ့မှစ၍ မြန်မာ့မီးရထားမှ ယာယီရပ်ဆိုင်းခဲ့သည်။

မိုးသည်းထန်စွာရွာသွန်းမှုများကြောင့် ပဲခူးတိုင်းဒေသကြီး ရထားလမ်းပိုင်း ၃ နေရာတွင် သံလမ်းအထက် ၁၁ လက်မ ရေကျော်မှုများရှိနေပြီး မွန်ပြည်နယ် ရထားလမ်းပိုင်း ၃ နေရာတွင် သံလမ်းအထက် ၁၄ လက်မ ရေကျော်မှုများရှိခဲ့ကာ ရထားလမ်းရေတိုက်စားမှုများလည်း ဖြစ်ပေါ်ခဲ့သည်။

ထို့အတွက်ကြောင့် ၎င်းရထားလမ်းပိုင်းများကို ဇူလိုင်လ ၂၇ ရက်နေ့ နေ့လည် ၁၂ နာရီ အချိန်မှစတင်ကာ ယာယီပိတ်သိမ်းခဲ့ရသည်။

ရထားလမ်းရေကျော်မှုများကြောင့် ရန်ကုန်မှထွက်ခွာမည့် အမှတ် ၉အဆန် (ရန်ကုန်-သာစည်)၊ ၅အဆန် ၃အဆန် (ရန်ကုန်-မန္တလေး)၊ ၇အဆန် (ရန်ကုန်-နေပြည်တော်) တို့အပြင် နောက်နေ့တွင်ထွက်ခွာမည့် ၁အဆန် ၁၁အဆန်၊ ၃၂ အဆန်၊ ၉ အဆန် ရထားများနှင့် ရန်ကုန်မှ မွန်ပြည်နယ်သို့ ထွက်ခွာမည့် ၃၅ အဆန် ၈၉ အဆန်ရထားများ ပြေးဆွဲမှုယာယီ ရပ်ဆိုင်းထားသည်။

မန္တလေး၊ သာစည် နှင့် နေပြည်တော်ဘူတာများမှ ၆ အစုန်၊ ၄ အစုန်၊ ၁၀ အစုန်၊ ၈ အစုန်၊ ၁၂ အစုန်၊ ၂ အစုန် နှင့် ၃၂ အစုန်ရထားများ ယာယီရပ်နားခဲ့သည်။

အလားတူ မော်လမြိုင်မှထွက်မည့် ၃၆အစုန်၊ ၉၀အစုန်ရထားများ ထားဝယ်အထိပြေးဆွဲသည့် ၁၇၅ အဆန်/၁၇၆ အစုန် ရထားများကို ယာယီဖျက်သိမ်းထားသည်။

ခရီးစဉ်ယာယီ ရပ်ဆိုင်းမှုများကြောင့် လက်မှတ်ဝယ်ယူထားသူများကို မြန်မာ့မီးရထားမှ လက်မှတ်ခများပြန်လည်ထုတ်ပေးသွားမည်ဖြစ်သည်။

ယခုကဲ့သို့ ရထားလမ်းရေကျော်မှုများ ယခင်ကကြုံတွေ့ဖူးကြောင်း မြန်မာ့မီးရထား တိုင်း(၇) သွားလာရေးအထွေထွေမန်နေဂျာ ဦးဇော်လွင်က ပြောသည်။

လက်ရှိအချိန်တွင် မြန်မာ့ရထားမှ ဦးဆောင်ညွှန်ကြားရေးမှုးနှင့် ရုံးချုပ်အဆင့်ဌာနအကြီးအကဲ တာဝန်ရှိသူများအနေဖြင့် ရေကျော်သည့်နေရာများသို့ သွားရောက်ကာ ရေကျချိန်၌ ရထားလမ်းပြန်ဖွင့်နိုင်ရန် ဆောင်ရွက်နေသည်။