ရန်ကုန်၊ ဇူလိုင် ၂၁ ။                    ။ ပြည်တွင်းခရီးစဉ် ပြေးဆွဲမှုများနှင့် လေယာဉ်စင်းလုံးငှား ဝန်ဆောင်မှုများကို လုပ်ကိုင်လျှက်ရှိသည့် FMI လေကြောင်းလိုင်းသည် လေကြောင်းလိုင်းပြေးဆွဲမှုကို ယာယီရပ်ဆိုင်းသွားမည်ဖြစ်ကြောင်း ဇူလိုင်လ ၂၀ရက်နေ့၌ ကြေညာသည်။

FMI လေကြောင်းလိုင်းယာယီရပ်ဆိုင်းမှုကြောင့် ဝန်ထမ်းပေါင်း ၁၃၄ ဦးသည် အလုပ်မှ ရပ်နားရမည်ဖြစ်ပြီး ဝန်ထမ်းများကို လုပ်ငန်းစုအတွင်း အခြားဌာနများသို့ ပြောင်းရွှေ့ပေးသွားရန်နှင့် အလုပ်သမားဥပဒေနှင့်အညီ ကြိုတင်အသိပေးမှု၊ လျော်ကြေးပေးအပ်မှုများ ဆောင်ရွက်သွားမည်ဟု ဇူလိုင်လ ၂၀ရက်နေ့ FMI ၏ ထုတ်ပြန်ချက်တွင် တွေ့ရသည်။

"မြန်မာ့လေကြောင်းလိုင်းကဏ္ဍတွင် စီးပွားရေးစိန်ခေါ်မှုများစွာရှိနေပြီး အဖန်ဖန် ဆင်ခြင်သုံးသပ်မှုများ ပြုလုပ်ပြီးနောက်တွင် ကျွန်တော တို့သည်FMI လေကြောင်းလိုင်း၏ အကျိုးစီးပွားကိုရှေးရှု၍ လုပ်ငန်းလည်ပတ်မှုများကို ခေတ္တရပ်ဆိုင်းထားရန် ဆုံးဖြတ်ခဲ့သည်" ဟု FMI လေကြောင်းလိုင်း၏ ဥက္ကဋ္ဌ ဦးသိမ်းေ၀ (ခေါ်) Mr. Serge Pun က ပြောသည်။

လေကြောင်းလိုင်းရပ်ဆိုင်းမှုကြောင့် ဇူလိုင်လ ၂၀ ရက်နေ့နောက်ပိုင်း ကြိုတင်လက်မှတ်ဝယ်ယူ ထားသော ခရီးသည်များကို လေယာဉ်လက်မှတ်ခများ ပြန်လည်ပေးအပ်သွားမည်ဖြစ်ပြီး ဇူလိုင်လ ၂၃ ရက်နေ့နောက်ပိုင်းတွင် လေယာဉ်စင်းလုံးငှား ဝန်ဆောင်မှုကိုလည်း ယာယီရပ်ဆိုင်းသွားမည်ဖြစ်သည်။

FMI လေကြောင်းလိုင်းသည် ၂၀၁၂ ခုနှစ်တွင် လေကြောင်းဝန်ဆောင်မှုလုပ်ငန်းစတင်လုပ်ကိုင်ခဲ့ကာ ရန်ကုန်၊ နေပြည်တော်၊ ထားဝယ်၊ မြိတ်၊ ကော့သောင်းနှင့် သံတွဲ ခရီးစဉ်များကို ပြေးဆွဲနေသည့် လေကြောင်းလိုင်းဖြစ်သည်။