ရန်ကုန်၊ ဇူလိုင် ၉ ။ ။ ရခိုင်ပြည်နယ်၊ မောင်တောခရိုင်၊ အင်းဒင်ကျေးရွာမှ လူသတ်မှုကို ဖော်ထုတ်ခဲ့သော ရိုက်တာသတင်းထောက် ကိုဝလုံးနှင့် ကိုကျော်စိုးဦးတို့ကို အမြင့်ဆုံးပြစ်ဒဏ် ထောင်ဒဏ် ၁၄နှစ်ထိချမှတ်နိုင်သော မြန်မာနိုင်ငံအစိုးရ လျှို့ဝှက်ချက်များအက်ဥပဒေပုဒ်မ ဖြင့် စွဲချက်တင်လိုက်သည်။
ရိုက်တာသတင်းထောက် ၂ ဦးကို ယနေ့ ဇူလိုင်လ ၉ ရက်နေ့၊ ရန်ကုန်မြောက်ပိုင်းခရိုင်တရားရုံးတွင် ၂၉ ကြိမ်မြောက်ရုံးထုတ်ခဲ့ပြီး ခရိုင်တရားသူကြီးက မြန်မာနိုင်ငံအစိုးရ လျှို့ဝှက်ချက်များအက်ဥပဒေပုဒ်မ ၃ (၁)(ဂ)ဖြင့် သတင်းထောက် ၂ ဦးကိုစွဲချက်တင်ကြောင်း အမိန့်ချမှတ်ခဲ့ခြင်းဖြစ်သည်။
မြန်မာနိုင်ငံအခြေစိုက် ရိုက်တာသတင်းဌာနမှ သတင်းထောက် ကိုလုံးဝနှင့် ကိုကျော်စိုးဦးတို့မှာ ပြီးခဲ့သည့် ၂ဝ၁၇ ခုနှစ်၊ သြဂုတ်လအတွင်းက ရခိုင်ပြည်နယ်၊ မောင်တောခရိုင်၊ အင်းဒင်ကျေးရွာတွင် လုံခြံုရေးတပ် ဖွဲ့ဝင်များက အမျိုးသား ၁ဝ ဦးကို ဥပဒေမဲ့သတ်ပစ်ခဲ့သည်ဆိုသော သတင်းအား စုံစမ်းရင်း ၂ဝ၁၇ ခုနှစ်၊ ဒီဇင်ဘာလ ၁၂ ရက်၊ ညပိုင်းတွင် ဖမ်းဆီးခံခဲ့ရခြင်းဖြစ်သည်။
ဖမ်းဆီးပြီးနောက်သတင်းထောက်နှစ်ဦးကို မင်္ဂလာဒုံမြို့နယ်၊ ထောက်ကြန့်နယ်မြေရဲစခန်းတွင် (ပ)၁၂၉၈/ ၂ဝ၁၇၊ ၁၉၂၃ ခုနှစ်၊ မြန်မာနိုင်ငံအစိုးရ လျှို့ဝှက်ချက်များအက်ဥပဒေပုဒ်မ ၃ (၁)(ဂ) ဖြင့် အမှုဖွင့်တရားစွဲခဲ့ပြီး ရန်ကုန်မြောက်ပိုင်းခရိုင်တရားရုံးတွင် ရာဇသတ်ကြီးအမှုအမှတ်- ၄/ ၂ဝ၁၈ ဖြင့် အမှုစွဲတင်စစ်ဆေးနေခြင်းဖြစ်သည်။
ထိုသို့ ခရိုင်တရားရုံးတင် စစ်ဆေးခဲ့ရာတွင် ရဲသက်သေအပါအဝင် တရားလိုပြသက်သေလိုပြသက်သေ ၂၂ ဦးထိ စစ်ဆေးပြီးနောက် ရိုက်တာသတင်းထောက်နှစ်ဦးကို ယခုကဲ့သို့ လျှို့ဝှက်ချက် အက်ဥပဒေပုဒမဖြင့် စွဲချက်တင်ကြောင်းအမိန့်ချလိုက်ခြင်းဖြစ်သည်။
မြန်မာနိုင်ငံအစိုးရ လျှို့ဝှက်ချက်များအက်ဥပဒေပုဒ်မ ၃ (၁)(ဂ)မှာ ပြစ်မှုထင်ရှားပါက အမြင့်ဆုံးပြစ်ဒဏ် ထောင်ဒဏ် ၁၄ နှစ်ထိပြစ်ဒဏ်ချမှတ်နိုင်သော ပုဒ်မဖြစ်သည်။
အဆိုပါ အမှုကိစ္စနှင့် ပတ်သက်ပြီး နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကလည်း ဂျပန်နိုင်ငံ၊ တိုကျိုအခြေစိုက် NHK သတင်းဌာနနှင့် အင်တာဗျူးတစ်ခုတွင် ရိုက်တာသတင်းထောက်နှစ်ဦးမှာ ရခိုင်ပြည်နယ် အရေးကိစ္စများအား ဖော်ထုတ်ခဲ့သဖြင့် ဖမ်းဆီးခံရခြင်းမဟုတ်ဘဲ နိုင်ငံတော်၏ လျှို့ဝှက်ချက်ကို ချိုးဖောက်ခဲ့သည့်အတွက် ဖမ်းဆီးခံခဲ့ရခြင်းဖြစ်ကြောင်း ဖြေဆိုထားသည်ကို NHK သတင်းဌာန၏ ပြီးခဲ့သည့်ဇွန်လ ၈ ရက်နေ့ သတင်းတွင် ဖော်ပြပါရှိသည်။
အဆိုပါအမှုနှင့်ပတ်သက်ပြီး စစ်ဆေးပြီးစီးခဲ့သည့် တရားလိုုပြ ၂၂ ဦးတွင်ပါဝင်သော ဒုရဲမှူးဟောင်း မိုးရန်နိုင်က ရိုက်တာသတင်းထောက်နှစ်ဦးကို ထောင်ချောက်ဆင်ဖမ်းဆီးခဲ့ခြင်းဖြစ်ကြောင်း၊ ထိုသို့ ဖမ်းဆီးရန်အတွက် ရဲမှူးချုပ်တင်ကိုကိုက ဦးစီးကွပ်ကဲခဲ့တာဖြစ်ကြောင်း ပြီးခဲ့သည့် ဧပြီလ ၂ဝ ရက်နေ့က တရားလိုပြသက်သေအဖြစ် ထွက်ဆိုမှုများရှိခဲ့သည်။