ရန်ကုန်၊ ဇူလိုင်လ ၆ ။ ။ မူးယစ်ပုဒ်မဖြင့် ဖမ်းဆီးထားသော မြန်မာ့တိုင်းမ် ဂျာနယ် အမှုဆောင်အရာရှိချုပ်နှင့် စာတည်းမှူးချုပ်ဟောင်းဖြစ်သူ မစ္စတာ ရော့စ်ဒန်ကလေ အပါအဝင် ၉ ဦးအနက် မြန်မာ အမျိုးသား ၁ ဦးနှင့် အမျိုးသမီးတစ်ဦး လွတ်မြောက်ခဲ့သည်။
ယနေ့ ဇူလိုင်လ ၆ ရက်၊ ညနေ ၄ နာရီခန့်အချိန်တွင် မစ္စတာရော့စ်ဒန်ကလေဆိုသူအပါအဝင် ရ ဦး အား ရန်ကုန်အနောက်ပိုင်းခရိုင်တရားရုံးတွင် ပထမဆုံးအကြိမ် ရုံးထုတ်ခဲ့ပြီး စတင်တရားစွဲဆိုခဲ့ခြင်း ဖြစ်သည်။
ထိုသို့ တရားစွဲဆိုရာတွင် မစ္စတာ ရော့စ်ဒန်ကလေနေထိုင်သည့် နေအိမ်တွင် အိမ်အကူအဖြစ် လုပ်ကိုင်နေသူ ဒေါ်တင်တင်ဝင်း၊ ခြံစောင့်အဖြစ် လုပ်ကိုင်နေသူ တူးတူး (ခ) စောမတ်သူးရှလ တို့မှာ ပါဝင်ခြင်းမရှိဘဲ ၎င်းတို့နှစ်ဦးမှာ သက်သေ မခိုင်လုံသည့်အတွက် လွတ်မြောက်ခဲ့ခြင်ဖြစ်ကြောင်း သိရသည်။
" ဒီနှစ်ယောက်ကတော့ တရားစွဲဆိုဖို့သက်သေခံချက်မရှိတဲ့အတွက် ဥပဒေရုံးရဲ့အကြံပြုချက်နဲ့ တရားစွဲဆိဖို့တင်ပို့ခြင်းမရှိတာပါ။ သူတို့က ဥပဒေရုံးရဲ့အကြံပြုချက်အရ အခုတရားစွဲတင်တဲ့ အထဲမှာ မပါတဲ့အတွက် တရားခံမဟုတ်တော့ဘူး"ဟု ရန်ကုန်အနောက်ပိုင်းခရိုင်တရားရုံး၊ သတင်းနှင့်ပြန်ကြားရေးအရာရှိ ဦးဌေးအောင်က ပြောသည်။
လက်ရှိတွင် အပြည်ပြည်ဆိုင်ရာမီဒီယာ အတိုင်ပင်ခံအဖြစ် လုပ်ကိုင်နေသူ သြစတေးလျနိုင်ငံသား မစ္စတာရော့စ်ဒန်ကလေနှင့် Go မီဒီယာ မန်နေးဂျင်း ဒါရိုက်တာ ဗြိတိန်နိုင်ငံသား Mr. Johan Stuaet McKenzie နှင့်အတူ မဟန်နီစိုး၊ မဟေမန်လွင် (ခ) နန္ဒာ၊ မသူဇာ၊ မဝင်းဝင်း၊ မနှင်းအိခိုင် (ခ) သော်တာတို့ ရ ဦးအား ရန်ကုန်အနောက်ပိုင်းခရိုင်တရားရုံးတွင် ရာဇဝတ်ကြီးအမှုအမှတ် ၈၇/၂ဝ၁၈၊ မူးယစ်ဆေးဝါးနှင့် စိတ်ကိုပြောင်းလဲစေသော ဆေးဝါးများဆိုင်ရာ ဥပဒေပုဒ်မ- ၁၉ (က)/၂၁ ဖြင့် တရားစွဲတင်ခဲ့သည်။
ယင်း မူးယစ်ပုဒ်မများမှာ ပြစ်မှုထင်ရှားပါက ထောင်ဒဏ် ၁ဝ နှစ် သို့မဟုတ် နှစ်အကန့်အသတ်မရှိ ပြစ်ဒဏ်ချမှတ်နိုင်ကြောင်း ရန်ကုန်အနောက်ပိုင်းခရိုင်တရားရုံး၊ သတင်းနှင့်ပြန်ကြားရေးအရာရှိ ဦးဌေးအောင်က ပြောပြချက်အရ သိရသည်။ ယနေ့ရုံးချိန်းတွင် မစ္စတာရော့စ်ဒန်ကလေနှင့် Go မီဒီယာ မန်နေးဂျင်း ဒါရိုက်တာ ဗြိတိန်နိုင်ငံသား Mr. Johan Stuaet McKenzie တို့နှစ်ဦးဘက်မှ လိုက်ပါဆောင်ရွက်မည့် ရှေ့နေများကလည်း ကိုယ်စားလှယ်စာများ တရားခွင်အတွင်းတင်ပြခဲ့သည်။ ကျန်ရှိသူ ၅ ဦးဘက်မှ ဆောင်ရွက်မည့် ရှေ့နေများ၏ ကိုယ်စားလှယ်စာများမှာ လာမည့်ရုံးချိန်းတွင် တင်ပြကြမည်ဖြစ်ကြောင်းသိရသည်။ ယင်းအမှုနှင့်ပတ်သက်၍အနောက်ပိုင်း ခရိုင်တရားရုံးမှ လာမည့် ဇူလိုင်လ ၁၂ ရက်နေ့ကို ပြန်လည်ချိန်းဆိုလိုက်သည်။
ပြီးခဲ့သည့် ဇွန်လ ၆ ရက်နေ့တွင် နေအိမ်အတွင်း မူးယစ်ဆေးဝါးသုံးစွဲနေကြောင်း ရဲတပ်ဖွဲ့က သတင်း ရရှိသဖြင့် မစ္စတာ ရော့ဒန်ကလေနှင့်ဗြိတိန်နိုင်ငံသားတစ်ဦး နေထိုင်ရာ ဗဟန်းမြို့နယ်၊ သာသနာ့ ရိပ်သာ ရပ်ကွက်၊ စမ်းရေတွင်းလမ်းရှိနေအိမ်သို့ သွားရောက်ရှာဖွေရာမှ မူးယစ်ဆေးဝါး ဖမ်း ဆီးရမိခဲ့ခြင်းဖြစ်သည်။ အိမ်အတွင်းမှ WY ဆေးပြား ရ၉၇ ပြား၊ ဘိန်းဆီခဲ ၆ ဂရမ်၊ ဆေးခြောက် ၁၆ ဒသမ ၅ ဂရမ်၊ ဘိန်းဖြူ မှုန့် ၂ ဂရမ်၊ ICE နှင့် WY ရောကြိတ်ထားသည့် အမှုန့် ၂ ဂရမ်၊ မူးယစ်ဆေးဝါးဟု ယူဆရသော အဖြူရောင် ပုံဆောင်ခဲ ၅ ဂရမ်နှင့် ခက်ခူ ၁၉ ဂရမ်တို့ကို ရှာဖွေသိမ်းဆည်းခဲ့ကြောင်းသိရသည်။
ထိုသို့ မူးယစ်ဆေးဝါးများ ရှာဖွေတွေ့ရှိခဲ့သဖြင့် နေအိမ်အတွင်းရှိနေသည့် မစ္စတာရော့စ်ဒန်ကလေ၊ ဗြိတိန်နိုင်ငံသား Mr. Johan Stuaet McKenzie နှင့် အတူ နေအိမ်တွင် ရောက်ရှိနေသော မဟန်နီစိုး၊ မဟေမန်လွင် (ခ) နန္ဒာ၊ မသူဇာ၊ မဝင်းဝင်း၊ မနှင်းအိခိုင် (ခ) သော်တာ၊ ၄င်းအိမ်တွင် အိမ်အကူ အဖြစ် လုပ်ကိုင်နေသူ ဒေါ်တင်တင်ဝင်း၊ ခြံစောင့်အဖြစ် လုပ်ကိုင်နေသူ တူးတူး (ခ) စောမတ်သူးရှလ တို့ကို ဖမ်းဆီးကာ ဗဟန်းမြို့နယ် ရဲစခန်းမှ မယ (ပ) ၄၂/ ၂၀၁၈ ၊ မူးယစ်ဆေးဝါး နှင့် စိတ်ကို ပြောင်းလဲ စေသော ဆေးဝါးများဆိုင်ရာ ဥပဒေပုဒ်မ- ၁၉ (က)၊ ပုဒ်မ ၂ဝ (က) / ၂၁ အမှုဖွင့် စစ်ဆေးခဲ့ခြင်းဖြစ်သည်။ ယနေ့ ဇူလိုင်လ ၆ ရက်နေ့မှ ရန်ကုန်အနောက်ပိုင်းခရိုင်သို့ တရားစွဲဆို တင်ပို့ခြင်းဖြစ်သည်။
မူးယစ်ပုဒ်မဖြင့် ဖမ်းဆီးထားသော မြန်မာ့တိုင်းမ် ဂျာနယ်၌ အမှုဆောင်အရာရှိချုပ်နှင့် စာတည်းမှူးချုပ်ဟောင်းဖြစ်သူ မစ္စတာ ရော့စ်ဒန်ကလေမှာ၂ဝ၁၁ ခုနှစ်အတွင်းကလည်း အမျိုးသမီးတစ်ဦးကို ကိုယ်ထိလက်ရောက် နာကျင်စေမှုဖြင့် အဖမ်းခံရကာ ထောင်ဒဏ်တစ်လ နှင့် ငွေဒဏ် ချမှတ် ခံခဲ့ရဖူးသည်။
ရော့စ်ဒန်ကလေသည် စစ်အစိုးရအုပ်ချုပ်စဉ်ကာလက တပ်မတော်ထောက်လှမ်းရေး အရာရှိ တစ်ဦးဖြစ်သူ ဗိုလ်မှူးချုပ် (ဟောင်း) သိန်းဆွေ၏ သားဖြစ်သူ ကိုဆန်နီဆွေနှင့် ပူးပေါင်းကာ မြန်မာတိုင်း(မ်) အင်္ဂလိပ်နှင့် မြန်မာတိုင်း(မ်) မြန်မာ အပတ်စဉ်ထုတ် သတင်းစာ နှစ်စောင်ကို ထူထောင်ခဲ့ခြင်းဖြစ်သည်။ သို့သော် ၂ဝ၁၄ ခုနှစ်၊ အောက်တိုဘာလတွင် မြန်မာတိုင်း(မ်) ဂျာနယ်ကို ထွန်းကော်မာရှယ်ဘဏ် ဥက္ကဋ္ဌ ဦးသိန်းထွန်းက အပြီးတိုင်ဝယ်ယူပြီး နောက်တွင် မီဒီယာလောကတွင် ဆက်လက်လုပ်ကိုင်ခြင်း မရှိတော့ကြောင်းလည်းသိရသည်။ သြစတေးလျနိုင်ငံသား မစ္စတာ ရော့စ်ဒန်ကလေသည် ကမ္ဘောဒီးယားနိုင်ငံ ဖနွမ်းပင်ပို့စ် နှင့် မြန်မာတိုင်းမ်ဂျာနယ်ကို ထူထောင်ခဲ့သူတစ်ဦးလည်း ဖြစ်သည်။