ရန်ကုန် ၊ ဇွန် ၂၈ ။ ။ ရှမ်းပြည်နယ်မြောက်ပိုင်း ကွတ်ခိုင်မြို့နယ် မန်နိမ်အွမ်ရွာအတွင်းသို့ လက်နက်ကြီးကျည် ကျရောက်ခဲ့ခြင်း ကြောင့် အသက်(၈)နှစ်အရွယ် ကလေးငယ်တစ်ဦးသေဆုံးပြီး ခုနှစ်ဦး ဒဏ်ရာရရှိခဲ့သည်ဟု TNLA ဘက်မှ စုံစမ်းသိရှိရသည်။
ယနေ့ ဇွန်လ ၂၈ ရက်နေ့ နံနက်ပိုင်း ၆ နာရီခန့်တွင် မန်နိမ်အွမ်ကျေးရွာအတွင်းသို့ လက်နက်ကြီး ၈ လုံး ကျရောက်ပေါက်ကွဲခဲ့ခြင်းလည်း ဖြစ်သည်။
ကျေးရွာအတွင်းသို့ ကျရောက်ခဲ့သည့် လက်နက်ကြီးကျည်များကြောင့် ရွာသား (၈) ဦး ထိခိုက်ဒဏ်ရာရရှိခဲ့ပြီး ယင်း(၈)ဦးထဲမှ အသက်(၈)နှစ်အရွယ် ကလေးငယ်တစ်ဦးသည် ဒဏ်ရာပြင်းထန်သောကြောင့် ကွတ်ခိုင်သို့ ဆေးကုရန် ပို့ဆောင်စဉ် လမ်းခရီး၌ သေဆုံးခဲ့ခြင်းဖြစ်သည်။
အဆိုပါဒေသ၌ တပ်မတော် ၊ တအာဝ်းလွတ်မြောက်ရေးအဖွဲ့(TNLA) နှင့် ပြည်သူ့စစ်အဖွဲ့များ လှုပ်ရှားနေသည့် ဒေသလည်းဖြစ်သည်။
တအာဝ်းလွတ်မြောက်ရေးအဖွဲ့(TNLA)ပြောရေးဆိုခွင့်ရှိသူ ဗိုလ်မှူး တာအိုက်ကျော်က “တပ်မတော်နဲ့ တိုက်ပွဲမဖြစ်တာ နှစ်ပတ်ကျော်ပြီ။ တပ်မတော်က ရွာထိပ်စေတီကုန်းကနေ မနက် ၆ နာရီလောက်မှာ ပစ်တယ်။ ရွာထဲကျတော့ ရွာသားတွေ ထိတယ်” ဟု မဇ္စျိမသို့ ပြောသည်။
အဆိုပါပစ်ခတ်ခဲ့သည့် လက်နက်ကြီးကျည်ကို မည်သည့်ဘက်က ပစ်ခတ်ခဲ့သနည်း ဆိုသည့်ကိစ္စနှင့် ပတ်သက်ပြီး မဇ္စျိမအနေမှ သီးခြားအတည်ပြုချက် ရရှိထားခြင်းမရှိပေ။
ယင်းကိစ္စနှင့် ပတ်သက်ပြီး တပ်မတော်သတင်းမှန်ပြန်ကြားရေးအား ဖုန်းဖြင့်ဆက်သွယ်မေးမြန်းသော်လည်း ဆက်သွယ်၍ ရရှိခဲ့သလို တပ်မတော်ကာကွယ်ရေးဦးစီးချုပ်ရုံးက သတင်းထုတ်ပြန်ထားခြင်းမရှိကြောင်း တွေ့ရသည်။
