လူငယ်နဲ့ စကားပြေအရေးအသား အမှားပြဿနာ

လူငယ်နဲ့ စကားပြေအရေးအသား အမှားပြဿနာ

 

ကဲ ဒီကနေ့တော့ စကားပြေအရေးအသားကိစ္စ ဆက်ပြီးဆွေးနွေးသွားဖို့ ရှိပါတယ်။

စကားပြေအရေးအသား ရှေ့ပိုင်းမှာ နောက်ဆုံးထားဆွေးနွေးခဲ့တာက ၀ါကျဖွဲ့စည်း စည်းရုံုးမှုအဆင့်ဆင့်ကို ဆွေးနွေးခဲ့ပါတယ်။ ဒီကနေ့တော့ အဲဒီ စကားပြေအရေးအသားအမှားပြဿနာကို ပြန်လည်ဆွေးနွေးတဲ့အခါ သွေးပြန်နှိုးတဲ့သဘောအနေနဲ့ စကားလုံး ဝေါဟာတချို့အကြောင်း ဆွေးနွေးသွားချင်ပါတယ်။

မြန်မာစကားလုံးဝေါဟာရတွေမှာ အသံအဖိအပေါ်မူတည်ပြီး အနက်အဓိပ္ပါယ် ကွဲပြားခြားနားသွားကြတာမျိုး ရှိတဲ့အပြင် စကားလုံးတစ်လုံးတည်းကိုပဲ အသုံးပြုတာမှန်ပေမယ့် အဲဒီစကားလုံးရဲ့ ရှေ့နဲ့နောက် စကားအဆက်အစပ်ပေါ်မူတည်ပြီး အဓိပ္ပါယ်အမျိုးမျိုး ဖြစ်ပေါ်စေတာမျိုးလည်း ရှိပါတယ်။

ဥပမာပေးပြီးပြောခဲ့တာရှိတယ်။ ဆိုပါတော့ “ဖေဖေ” ဆိုတဲ့စကားလုံးဆိုပါတော့ အသံအဖိအဖေါ့အပေါ်မူတည်ပြီး အဓိပ္ပါယ်ပြောင်းလဲသွားစေတာမျိုးပေါ့။ စိတ်ဆိုးတဲ့အခါ “ဖေဖေ” ဆိုပြီးခေါ်တဲ့အခါအသံထွက်က ဖိပြီးနင်းပြီးဆောင့်ပြီးခေါ်တဲ့အသံထွက်ဖြစ်တယ်၊ တခါ ချစ်ခင်ကြင်နာမှုလေးစားမှုနဲ့ခေါ်တဲ့အခါ “ဖေဖေ” လို့ အသံကိုဖေါ့ပြီးခေါ်တာဖြစ်လို့ အဓိပ္ပါယ်ကွာသွားတာ တွေ့ကြရမှာပါ။ ဒါက ဖေဖေဆိုတဲ့စကားလုံးကိုသုံးပြီးခေါ်တာဖြစ်ပေမယ့် အသံ အဖိအဖေါ့အပေါ်မူတည်ပြီး အဓိပ္ပါယ်ကွဲသွားစေတာတွေ့ကြရမှာပါ။ ဒါကို ကျနော် အရင်က ဆွေးနွေးခဲ့ပါတယ်။

အခု နောက်ထပ် စကားလုံးတစ်လုံးထဲကိုပဲ အသုံးပြုတာမှန်ပေမယ့် အဲဒီစကားလုံးရဲ့ ရှေ့နောက်ဆက်စပ် စကားလုံးတွေကြောင့် အဓိပ္ပါယ်ကွာဟသွားတာတချို့ ထပ်ပြောချင်ပါသေးတယ်။

မခင်မေအေးသည် မောင်လှအောင်ကို “ယုံ” သည်။

မခင်မေအေးသည် ဗုဒ္ဓဘာသာကို “ယုံ” သည်။

မခင်မေအေးသည် တစ္ဆေသရဲကို “ယုံ” သည်။

ဒီစာကြောင်းသုံးကြောင်းမှာ “ယုံ” ဆိုတဲ့စကားလုံးကို အသုံးပြုပြီး အခြေခံအားဖြင့် ယုံကြည်မှုကို ပြဆိုလိုကြောင်း တွေ့ကြရမှာပါ။ ဒါပေမယ့် အဲဒီ “ယုံ” သုံးယုံရဲ့ရှေ့က တဆက်တည်းရှိနေတဲ့ စကားလုံးတွေကြောင့် ယုံတစ်ခုချင်းစီရဲ့အဓိပ္ပါယ် ကွာဟသွားတာ တွေ့နိုင်ပါတယ်။ ပထမစာကြောင်းမှာပါတဲ့ “ယုံ” က စိတ်ချလက်ချဖြစ်ခြင်းကို ပြဆိုလိုပါတယ်။ ဒုတိယစာကြောင်းမှာပါတဲ့ “ယုံ” က လက်ခံခြင်းကိုပြပါတယ်။ တတိယစာကြောင်းမှာပါတဲ့ “ယုံ” ကြတော့ တကယ်ရှိသည်ဟု ခံယူခြင်းကို ပြပါတယ်။ ဒါကိုကြည့်ရင်  “ယုံ” တစ်လုံးတည်းကို သုံးထားသည်မှာ မှန်သော်လည်း အဲဒီ “ယုံ” ရဲ့ရှေ့မှာကပ်ပါလာတဲ့စကားလုံးတွေကြောင့် အဓိပ္ပါယ် ကွဲသွား ကွာဟသွားတာတွေ့ကြရမှာပါ။

စကားလုံးတွေဟာ စကားပြောတယ်ဆိုတာ သိဖို့လိုပါတယ်။ လေ့လာထားဖို့လည်း အရေးကြီးပါတယ်။ ဘာကြောင့်လည်းဆိုတော့ ၀ါကျတွေချရေးတဲ့အခါ စကားလုံးတွေနဲ့ပဲ ၀ါကျတွေကိုဖွဲ့စည်းရတာပါ။ စကားလုံးတွေကို နားလည်ကျွမ်းကျင်မှ၊ စကားလုံုးတွေအကြောင်း အခြေခံကျကျ သိထားမှ ၀ါကျဖွဲ့တဲ့အခါ မှန်ကန်မှာ အားကောင်းမှာ လှမှာဖြစ်ပါတယ်။

နောက်တစ်ခု ဆွေးနွေးချင်ပါသေးတယ်။ ဒါကတော့ ဆရာကြီး မောင်ခင်မင်ရဲ့ ဆွေးနွေးချက်ကို ကိုးကားတင်ပြလိုက်တာပါ။

ပြင်စည်မင်းသားကြီးရဲ့ “ပန်းမြိုင်လယ် ယိုးဒယားဖိန်းချားကြီး”မှာ ညာနန်းနတ်ကယ်သွင် လေယာဉ်ပျံ တိမ်ယံတောင်စွယ်၊ မိိုးလယ်ဝေယံဖျား ဆိုတဲ့အထဲမှာပါတဲ့ “လေယာဉ်ပျံ” ဆိုတဲ့စကားလုံးက ခုခေတ် ကောင်းကင်မှာပျံလို့ရတဲ့ စက်တပ်ယာဉ်ကို ဆိုလိုတာမဟုတ်ဘဲ ဒသဂီရိက မယ်သီတာကို တင်ယူခေါ်ဆောင်သွားတယ်ဆိုတဲ့ “ရထားပျံ” ကိုသာဆိုလိုတာပါ။ ပြင်စည်မင်းသားကြီးတဲ့ခေတ်က ကမ္ဘာပေါ်မှာ အဲဒီစက်တပ်ယာဉ်က မပေါ်သေးပါဘူး။ နောက်တော့မှ ကောင်းကင်မှာပျံလို့ရတဲ့စက်တပ်ယာဉ်တွေ ကမ္ဘာပေါ်မှာပေါ်ပေါက်လာတဲ့အခါကြတော့ ပြင်စည်မင်းသားကြီး အသုံးပြုခဲ့တဲ့ “လေယာဉ်ပျံ” ဆိုတဲ့စကားလုံးကို ယူငှင်သုံးစွဲပြီး “လေယာဉ်ပျံ” ရယ်လို့ရေးသားပြောဆိုအသုံးပြုကြတာပါ။ ဒီခေတ်မှာတော့ “လေယာဉ်ပျံ” လို့ပြောလိုက်ရင် ဒသဂီရိ အသုံးပြုခဲ့တဲ့ “ရထားပျံ” ဆိုတာကြီး လို့ဘယ်သူမှမမြင်တော့ပါဘူး။ ဒါက ဘာကိုပြဆိုသလဲဆိုတော့ စကားတွေဟာ ခေတ်တွေပြောင်းလဲသွားတဲ့အခါ သူ့နဂိုလ်မူလစွမ်းအင်နဲ့ထိရောက်မှုအပေါ်မူတည်ပြီး အဓိပ္ပါယ်ပြောင်းလဲလာတတ်တာကို ပြောချင်တဲ့သဘောပါပဲ။

နောက်ထပ် စိတ်ဝင်စားဖို့ကောင်းတဲ့စကားလုံးတချို့ရှိပါသေးတယ်။ အဲဒီစကားလုံးတွေက လူ့ခန္ဓာကိုယ်အစိတ်အပိုင်းတွေကို တခြားရုပ်ဝတ္ထုပစ္စည်းတွေမှာတွဲသုံးလို့ ရှိလာဖြစ်လာတဲ့စကားလုံးတွေလည်း ရှိပါသေးတယ်။ လူရဲ့ ခေါင်း၊ ခြေထောက်၊ နှုတ်သီး၊ လက်တံ၊ လျှာ အစရှိတဲ့စကားလုံးတွေကို အခြားရုပ်ဝတ္ထုပစ္စည်းတွေမှာ ဥပမာအနေနဲ့တင်စားပြီးအသုံးပြလာကြတဲ့ စကားလုံးတွေဖြစ်ပါတယ်။ “ရေနွေးခရားနှုတ်သီး၊ ကုတင်ခြေထောက်၊ နာရီလက််တံ၊ ပုလင်းလည်ပင်း၊ ချိန်ခွင်လျှာ” ..အစရှိတဲ့စကားလုံးတွေပါပဲ။

ဒီစကားလုံးတွေဟာ တိုးတက်ပြောင်းလဲဖြစ်ပေါ်လာနေတဲ့ ရုပ်ဝတ္ထုအနေအထားတွေအပေါ်မူတည်ပြီး တီထွင်ကြံဆအသစ်ထွင်ရေးသားရင်းက အတည်ဖြစ်လာရတဲ့ စကားလုံးဝေါဟာရတွေပါပဲ။

ကျနော်တို့ဟာ စကားပြေကောင်းကောင်း ရေးတတ်ဖို့ ဦးစွာပထမ နားလည်ထားဖို့က စကားလုံးတွေအကြောင်းပါပဲ။ စကားလုံးတွေအကြောင်း ကောင်းကောင်းနားလည်ထားသူဖြစ်ရင် အဲဒီသူဟာ စကားပြေချရေးတဲ့အခါ အခက်အခဲတစ်ဝက်လောက် ဖြတ်ကျော်ပြီးသူလို့တောင်မှပြောလို့ရမယ်ထင်ပါတယ်။

ကဲ ဒီကနေ့တော့ ဒီလောက်နဲ့ ရပ်နားလိုက်ပါဦးမယ်။

နောက်နေ့တွေမှာ ဆက်ပြီး ပြောကြဆွေးနွေးကြသေးတာပေါ့။

လူငယ်များ စကားပြေအရေးအသား မှန်ကန်ကြွယ်ဝ လှပနိုင်ကြပါစေဗျား။

 

နောက်ဆုံးရသတင်းတွေကို နေ့စဉ် အခမဲ့ဖတ်ရှုနိုင်ဖို့ သင့် အီးမေးလ်ကို ဒီနေရာမှာ စာရင်းသွင်းလိုက်ပါ။

* indicates required

Mizzima Weekly