အစားအစာ လေလွင့်မှုပြဿနာ ဖြေရှင်းနိုင်ရေး အင်ဒိုနီးရှား ကြိုးပမ်း

.

ဇွန် ၂၃ ။           ။ နိုင်ငံမှာ နှစ်စဉ်နှစ်တိုင်း မစားသုံးလိုက်ရဘဲ အစားအစာတွေ အလဟသ လေလွင့်ဆုံးရှုံးနေမှု ပြဿနာကို ဖြေရှင်းနိုင်ဖို့ အင်ဒိုနီးရှားအစိုးရက ကြိုးပမ်းလုပ်ဆောင်နေပြီ ဖြစ်ပါတယ်။

အစားအစာ လေလွင့်မှု ပြဿနာကို တစ်စိတ်တစ်ပိုင်း ရှင်းလင်းနိုင်ဖို့အတွက် ယခုအခါ Blessing to Share လို့ ခေါ်တဲ့ ပရိုဂရမ်သစ်တစ်ခုကို အင်ဒိုအစိုးရက ထုတ်ဖော်လိုက်ပါတယ်။

ယင်း အစီအစဉ်ရဲ့ အောက်မှာတော့ မြို့တော် ဂျကာတာမှာ လူဂုဏ်ထံအထက်တန်းလွှာတို့ရဲ့ မင်္ဂလာဆောင်အခမ်းအနားတွေအပါအ၀င် အခြားပွဲလမ်းသဘင်တွေမှာ တည်ခင်းတဲ့ အစားအသောက်ကောင်းတွေ ပိုလျှံနေတဲ့အခါမျိုးမှာ ယင်းတို့ကို အလဟသမဖြစ်စေဘဲ မြို့တွင်း ဆင်ခြေဖုံးရပ်ကွက်တွေက ဆင်းရဲသားပြည်သူတွေကို ပေးဝေစားသောက်စေခြင်း ဖြစ်ပါတယ်။

အဆိုပါ အစီအစဉ်ကြောင့် ယခုအခါ အင်ဒိုနီးရှားရဲ့ ဆင်းရဲသားပြည်သူတွေအနေနဲ့ လူချမ်းသာတွေ စားသုံးနေတဲ့ အစားအသောက်ကောင်းတွေရဲ့ အရသာကို မြည်းစမ်းထိတွေ့ခွင့် ရတော့မှာဖြစ်ပါတယ်။

ယခုလို လူချမ်းသာတွေ ပြုလုပ်တဲ့ ပွဲအခမ်းအနားတွေမှာ မကုန်လို့ ပိုလျှံနေတဲ့ အစားအသောက်တွေကို ဆင်းရဲသားတွေကို ပေးစားသုံးစေတဲ့ အစီအစဉ်ကိုတော့ လာမယ့်ကာလတွေမှာ အခြားမြို့ကြီးတွေဆီကိုလည်း ဖြန့်ကျက်လုပ်ဆောင်သွားမယ်လို့ သိရပါတယ်။

စစ်တမ်းတွေအရ အင်ဒိုနီးရှားက နိုင်ငံသား သန်း ၂၆၀ ခန့်တို့ရဲ့ တစ်ဦးချင်းစီတိုင်းဟာ နှစ်စဉ်နှစ်တိုင်း ပျမ်းမျှ အစားအစာ ကီလို ၃၀၀ (ပေါင် ၆၆၀) နီးပါးလောက်ကို အလဟလ လွှင့်ပစ်နေကြလျက်ရှိတယ်လို့ ဆိုထားပါတယ်။ ယင်း ပမာဏဟာ အမေရိကန်လို နိုင်ငံထက်တောင် ပိုများနေတာဖြစ်ပါတယ်။

ကမ္ဘာတစ်ဝန်းမှာ ဆိုရင်လည်း နှစ်စဉ်နှစ်တိုင်း စိုက်ပျိုးထုတ်လုပ်လိုက်တဲ့ အစားအစာတွေရဲ့ ၃၀ ရာခိုင်နှုန်းခန့် ဖြစ်တဲ့ တန်ချိန် ၁ ဒသမ ၃ ဘီလီယံလောက်ဟာ မစားမသောက်လိုက်ရဘဲ အလဟသ လေလွင့် ဆုံးရှုံးနေတယ်လို့ သိရပါတယ်။ ယင်းဟာ စီးပွားရေးအရ ကန်ဒေါ်လာ ၁ ထရီလီယံမျှအထိ ဆုံးရှုံးနေရတာနဲ့အတူတူပဲဖြစ်တယ်လို့ ကုလသမဂ္ဂ စားနပ်ရိက္ခာနဲ့ စိုက်ပျိုးရေးအဖွဲ့ က ထုတ်ပြန်ပါတယ်။