‘သာကူး’ မဟုတ်ဘူးလို့ သူရဦးရွှေမန်း တုံ့ပြန်

‘သာကူး’ မဟုတ်ဘူးလို့ သူရဦးရွှေမန်း တုံ့ပြန်
ဥပဒေရေးရာနှင့် အထူးကိစ္စရပ်များ လေ့လာဆန်းစစ်သုံးသပ်ရေးကော်မရှင် ဥက္ကဌ သူရဦးရွှေမန်း (ဓာတ်ပုံ- မင်းမင်း/မဇ္ဈိမ)
 

နေပြည်တော်(ဇွန်လ ၁၄ရက်၊ ၂၀၁၈ခုနှစ်)။ ။ နိုင်ငံတော်အတိုင်ပင်ခံပုဂ္ဂိုလ်၊ ဒေါ်အောင်ဆန်းစုကြည်နှင့် သူမ၏ NLD ပါတီအတွက် အလုပ်လုပ်နေခြင်းမဟုတ်ဘဲ တိုင်းပြည်အကျိုး၊ ပြည်သူ့အကျိုးအတွက်သာ လုပ်ဆောင်နေခြင်းကြောင့် ဝေဖန်၊ စွပ်စွဲနေကြသလို ‘သာကူး’ မဟုတ်ကြောင်း ဥပဒေရေးရာနှင့် အထူးကိစ္စရပ်များ လေ့လာဆန်းစစ်သုံးသပ်ရေးကော်မရှင်၊ ဥက္ကဌဖြစ်သူ သူရဦးရွှေမန်းက တုံ့ပြန်ပြောကြားလိုက်သည်။

“လူတစ်ယောက်အတွက် မဟုတ်ဘူး။ အဖွဲ့အစည်း တစ်ခုအတွက် မဟုတ်ဘူး။ ရှင်းရှင်းပြောမယ်ဆိုရင် အဲ့ဒီ ‘အမ’(ဒေါ်အောင်ဆန်းစုကြည်)အတွက်လည်း မဟုတ်ဘူး။ အဲ့ဒီပါတီအတွက်လည်း မဟုတ်ဘူး” ဟု တပ်မတော်တွင် ဗိုလ်ချုပ်ကြီးအဆင့်အထိ တာဝန်ယူခဲ့သူ သူရဦးရွှေမန်းက ပြောသည်။

သူ့ကို ‘သာကူး’ တင်မကဘဲ နွားများကို ရည်ညွှန်းသုံးနှုန်းသော ‘ခြံခုန်တယ်’ ဟုပင် ပြောဆိုမှုများရှိသော်လည်း ကိုယ့်အကြောင်း ကိုယ်သိကြောင်း နေပြည်တော်တွင် ဇွန်လ ၁၄ရက်က ပြုလုပ်သည့် ပထမအကြိမ် ပြည်ထောင်စုလွှတ်တော်ကာလအတွင်း နိုင်ငံတော်ဖွဲ့စည်းပုံအခြေခံဥပဒေဆိုင်ရာ ခုံရုံးအဖွဲ့ နှုတ်ထွက်ခြင်းဆိုင်ရာ လေ့လာတွေ့ရှိချက် စာအုပ်မိတ်ဆက်ပွဲတွင် သူရဦးရွှေမန်းက ထိုသို့ ပြောကြားခဲ့ခြင်း ဖြစ်သည်။

သူရဦးရွှေမန်းက “အမ ဒေါ်အောင်ဆန်းစုကြည်နဲ့ စပြီးတော့ ရင်းနှီးလာတဲ့အချိန်မှာ ကျွန်တော်တို့များ နိုင်ရင် အမက ထိုက်တန်တဲ့နေရာမှာ လာပြီးတော့ ကူပြီးတော့ တာဝန်ယူပေးပါ။ ဒီလိုပဲ ပြောခဲ့ပါတယ်။ ကျွန်တော်ရှုံးခဲ့ရင်တော့ အမသဘောပဲ။ သဘောက ရှုံးမှာကြောက်လို့လည်း သွားခိုတာလည်း မဟုတ်ဘူး။ သာကူးလည်း မဟုတ်ဘူး” ဟု ဆိုသည်။

သမ္မတရုံးဝန်ကြီးဟောင်း ဦးစိုးသိန်းရေးသားသည့် “ဒီမုုိကရေစီနုုိင်ငံတော်သစ်နှင့် သမ္မတဦးသိန်းစိန်” စာအုပ်တွင် သူရဦးရွှေမန်းဟု အတိအကျ ရည်ညွှန်းမထားသော်လည်း ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီ၏ ထိပ်တန်းခေါင်းဆောင်လည်းဖြစ်၊ တပ်မတော် အဆင့်မြင့်ခေါင်းဆောင်အဖြစ် တာဝန်ယူခဲ့သူတချို့သည် အကြောင်းမျိုးစုံပြ၍ NLD ခေါင်းဆောင်အောက် လက်နက်ချပြီး မိမိ ကိုယ်ကျိုးစီးပွားကာကွယ်ရေးအတွက် သာကူးများ၊ မြေခွေးများ၊ ထမင်းကျွေးသောလက်ကို ပြန်ကိုက်သူများဟု ရေးသားထားသည်။

ဦးစိုးသိန်း ရေးသားသည့် စာအုပ်တွင် “တကယ်တော့ လာမည့် ရွေးကောက်ပွဲတွင် မိမိတုုိ့ပါတီအောင်နုုိင်မည့် ပုုံမပေါ်တော့သဖြင့် မိမိပါတီအတွက် အလံရှူးများအဖြစ်သာ ဟန်ဆောင်ကြပါတော့သည်။ ပုုဂ္ဂိုလ်တော်တော်များများ အနုုိင်ရရှိနုုိင်သည့် အမျိုးသားဒီမုုိကရေစီအဖွဲ့ချုပ် ခေါင်းဆောင်အောက် အကြောင်းမျိုးစုုံပြ၍ လက်နက်ချလိုုက်ကြပါတော့သည်။ ပြောပြန်လ ျှင်လည်း ပြောသူလွန်ရာကျပေမည်။ နုုိင်ငံတော်နှင့် နုုိင်ငံသားများ အကျိုးငှာ မည်သည့်ပါတီနှင့်မဆုုိ ပူးပေါင်း ဆောင်ရွက်မည်ဟုု ဆုုိကြသော်လည်း အခြားတစ်ဖက်က ပြောရလ ျှင် နှစ်ပေါင်း ၄၀ ခန့် တပ်မတော်သား အဆင့်မြင့်ခေါင်းဆောင်များနှင့် ပြည်ထောင်စုုကြံ့ခုုိင်ရေးနှင့်ဖွံ့ဖြိုးရေးပါတီ ထိပ်တန်းခေါင်း ဆောင်များအဖြစ် တာဝန်အမျိုးမျိုးခံစား၊ စံစားပြီးမှ သစ္စာဖောက်သွားကြသည်။ သာကူးများဟုု ဆိုုနုုိင်ပါသည်။ အများအမြင်တွင်တော့ အယောင်ဆောင်ကောင်းလှသော မြေခွေးများပင်”

“အချို့က ပြောကြသည်မှာ ထမင်းကျွေးသော လက်ကုုိ ကိုုက်ကြသူများဟုု ကြားရပြန်သည်။ နုုိင်ငံရေး နတ်ပူးပြီဆိုုရင် သူရဲကောင်းတွေ လည်း ဂန်ဒူးဖြစ်တတ်ပါတယ်လိုု့ တစ်ဦးက ဆုုိပြန်ပါရော၊ စိတ်မကောင်းပါ။ အမှန်တော့ ၎င်းတုုိ့၏ မယိုုင်မလဲသော မူဝါဒမှာ မိသားစုုကုုိယ်ကျိုးစီးပွား ကာကွယ်ရေးဝါဒသာဖြစ်ကြောင်းကိုု နောင်တစ်ချိန်တွင် သမုုိင်းက သက်သေပြပါလိမ့်မည်” ဟူ၍ စာမျက်နှာ ၂၉၅တွင် ဖော်ပြထားသည်။

ဦးစိုးသိန်း၏ ရေးသားချက်များနှင့်ပတ်သက်ပြီး သူရဦးရွှေမန်းက “ဦးစိုးသိန်း(ကျွန်တော့သူငယ်ချင်း)ကနေ ပြောဆို၊ စွပ်စွဲတယ် ဆိုတာလည်း သူ့ရဲ့ စေတနာနဲ့ သူ့ရဲ့ အရည်အချင်း အားလုံး စဉ်းစားကြည့်ပေါ့ဗျာ။ သူ့စေတနာ ဘယ်လိုရှိလဲ။ သူ့ရဲ့ အရည်အချင်းက ဘယ်လိုရှိလဲ” ဟု ဆိုသည်။

 

နောက်ဆုံးရသတင်းတွေကို နေ့စဉ် အခမဲ့ဖတ်ရှုနိုင်ဖို့ သင့် အီးမေးလ်ကို ဒီနေရာမှာ စာရင်းသွင်းလိုက်ပါ။

* indicates required

Mizzima Weekly