မန်ချက်စတာယူနိုက်အသင်းဟာ “ဥရောပရဲ့ အကောင်းဆုံး လူငယ်နောက်ခံလူ” ဒီယာဂို ဒါလော့ကို အပြီးသတ် ခေါ်ယူနိုင်ခဲ့တယ်လို့ နည်းပြ ဟိုဆေးမော်ရင်ဟိုက ပြောပါတယ်။
မန်ယူအသင်းဟာ အသက် ၁၉ နှစ်အရွယ် ပေါ်တူဂီလူငယ်နောက်ခံလူကို ပြောင်းရွှေ့ကြေး ပေါင် ၁၉ သန်းနဲ့ ၅ နှစ်စာချုပ်ပြီး ပေါ်တိုအသင်းကနေ ခေါ်ယူခဲ့တာဖြစ်ပါတယ်။
ဒါလော့ဟာ ပေါ်တူဂီ လူငယ်အသင်း ယူ ၁၅ နှစ်အောက်မှ ယူ ၂၁ နှစ်အောက်အသင်းတွေမှာ ကစားခဲ့ပြီး ပေါ်တိုအသင်းနဲ့ ပွဲဦးထွက်ကိုမူ အောက်တိုဘာလက ကစားခဲ့ပါတယ်။
ဒါလော့ဟာ ပြီးခဲ့တဲ့ ချန်ပီယံလိဂ် ရှုံးထွက် ၁၆ သင်းအဆင့် လီဗာပူးလ်ကို ၀-၀ ဂိုးနဲ့ သရေကျတဲ့ပွဲမှာ ပေါ်တိုအသင်းအတွက် ဘယ်နောက်ခံလူ နေရာကနေ ပါဝင်ကစားခဲ့ပါတယ်။
သူဟာ မန်ယူမှာ အသင်းခေါင်းဆောင် အန်တိုနီယို ဗလင်စီယာနဲ့ နေရာ အပြိုင်လုရဖွယ်ရှိနေတယ်လို့ ခန့်မှန်းထားပါတယ်။
ဒါလော့ဟာ ဘရာဇီးလ်ကစားသမား ဖရက်ဒ်ပြီးနောက် မန်ယူအသင်း ဒုတိယမြောက်ခေါ်ယူတဲ့ ကစားသမားလည်းဖြစ်ပါတယ်။
Ref; BBC