မန္တလေးမြို့ အောင်မြေသာစံမြို့နယ် ဧရာဝတီမြစ်ကမ်းနား ၁၉ လမ်း နှင့် ၂၂ ကြားရှိ မူးယစ်ဆေးဝါး ဖြန့်ဖြူး ရောင်းချသည်ဟု ကျော်ဇောနေသော အဆောက်အဦ (၈) လုံး ကို ရဲတပ်ဖွဲ့က ဇွန်လ ၅ ရက်နေ့ နေ့လည်ပိုင်းတွင် ရှင်းလင်းမှုများပြုလုပ်ခဲ့သည် ။
"မူးယစ်ဆေးဝါးရောင်းဝယ်နေတယ်လို့ ကျော်ဇောလို့ပါ ။ တရားခံတော့ မမိဘူး ။ မူးယစ်ဆေးဝါး အသုံးပြုတဲ့ ဆက်စပ်ပစ္စည်းနည်းနည်းပဲတွေ့ရတယ်" ဟု မန္တလေးခရိုင်ရဲတပ်ဖွဲ့မှူးရုံး မှ တာဝန်ရှိသူတစ်ဦးက ပြောသည် ။
ထိုသို့ရှင်းလင်းရာတွင် မြန်မာနိုင်ငံရဲတပ်ဖွဲ့နှင့် စည်ပင်ဝန်ထမ်းများ ပူးပေါင်း၍ လုပ်ဆောင်ခြင်းဖြစ်ပြီး အဖွဲ့များခွဲ၍ မူးယစ်ဆေးဝါးရောင်းဝယ်မှုပြုလုပ်၍ အသုံးပြုနေသည်ဟု ကျော်ဇောနေသော နေအိမ်များမှ အလုံပိတ်အကာအရံများကို ဖယ်ရှားခြင်းဖြစ်သည် ။
ထိုသို့ ရှင်းလင်းခြင်းကို ဇွန်လ (၂) ရက်နေ့က ပုသိမ်ကြီးမြို့နယ်အတွင်းရှိ ဇီးအုပ်ကျေးရွာ ကွက်သစ်နှင့် ကံကြီးကုန်းကျေးရွာ ကွက်သစ်အတွင်း စတင်ပြုလုပ်ခဲ့ရာ နေအိမ်အလုံး (၃၀) အထိ ရှင်းလင်းနိုင်ခဲ့ပြီး သုံးစွဲသူ (၇) ဦးသာဖမ်းဆီးရမိထားကာ ရောင်းဝယ်သူများကို ဖမ်းဆီးရမိခြင်းမရှိခဲ့ကြောင်း သိရသည် ။
