မန္တလေးမြစ်ကြီးနား ရထားလမ်းပိုင်း ၂ နေရာ မိုင်းခွဲခံရ

မန္တလေးမြစ်ကြီးနား ရထားလမ်းပိုင်း ၂ နေရာ မိုင်းခွဲခံရ
(ဓာတ်ပုံ၊မြန်မာ့မီးရထား)

မန္တလေး မေ ၁၆ ။            ။ မေလ ၁၅ ရက်၊ည ၁၁ နာရီကျော်က မန္တလေး၊မြစ်ကြီးနား ရထားလမ်းပိုင်း ၂ နေရာ မိုင်းခွဲဖျက်ဆီးခံခဲ့ရခြင်းကြောင့် တိုက်ကင်းရထား အနည်းငယ် ပျက်စီးခြင်းနှင့် သံလမ်းများပျက်စီးသွားကြောင်း မြန်မာ့မီးရထား၊အထက်မြန်မာပြည်အထွေထွေမန်နေဂျာ ဦးမျိုးဝင်းက ပြောသည်။

ခရီးသည်များဘေးကင်းလုံခြံုရေးအတွက် ခရီးသည်ရထားများ မထွက်ခွာမီ  ရှေ့ပြေးမောင်းနှင်သည့် တိုက်ကင်းရထားခုတ်မောင်းစဉ် ထိုပူးဘူတာနှင့် မိုးကောင်းဘူတာအကြား၊တံတားအမှတ် ၆၆၂ တွင်ပေါက်ကွဲမှုဖြစ်ခဲ့သည် ။ တစ်ဖန် မရမ်းဘူတာနှင့် နမ္မတီးဘူတာကြား၊တံတားအမှတ် ၆၈၁ တွင်လည်း ပေါက်ကွဲမှုဖြစ်ပွားခဲ့သည်။

မြစ်ကြီးနား - ဟိုပင် တွဲ ၅ တွဲပါ APT မိုင်းရှင်းရထားသည် မိုင်းပေါက်ကွဲမှု ဖြစ်ပွားသဖြင့် မိုင်းရှင်းရထား၏ ၃ တွဲမြောက် သံချပ်ကာတွဲနှင့် ၄ တွဲမြောက် မိုင်းခံတွဲတို့မှာ ၄၅ ဒီဂရီစောင်းသွားခဲ့ပြီး သံလမ်းပျက်စီး၍ လူထိခိုက်ဒဏ်ရာရရှိမှုမရှိကြောင်း သတင်းနှင့်ပြန်ကြားရေးမှ ထုတ်ပြန်ချက်အရ သိရသည်။

အထက်မြန်မာပြည် အထွေထွေမန်နေဂျာ ဦးမျိုးဝင်းထံက"ထိခိုက်ဒဏ်ရာ ရတာမရှိပါဘူး။ရထားက အမြန်ရထားသုံးစင်းအနက် မိုးညှင်းတွင်တစ် စင်းရပ်ထားတယ်။ ဟိုပင်မှာ ၂ စင်းရပ်ထားတယ်။အဲဒီသုံးစင်းက ခရီးသည်တွေဒုက္ခမရောက်အောင် မြစ်ကြီးနားကို တစ်ယောက်မကျန် ကားနဲ့ပို့နေတယ်။"ဟုပြောသည်။

မိုးညှင်းဘူတာတွင်ရပ်ထားသည့် အမှတ် ၅၅အဆန် အမြန်ရထားနှင့်ဟိုပင်ဘူတာတွင်ရပ်ထားသည့် အမှတ် ၅၇နှင့်၃၇ အမြန်ရထားတို့မှ ခရီးသည်များအတွက် စားသောက်ရေးနှင့်လိုအပ်သည်များကို မြန်မာ့မီးရထားမှ စီစဉ်ဆောင်ရွက်ပေးလျှက်ရှိနေပြီး ၎င်းခရီးသည်များကို မြစ်ကြီးနားမြို့သို့ ကားများဖြင့် ပို့ဆောင်ပေးသွားမည်ဟု ဦးမျိုးဝင်းကဆိုသည်။

ထိုသို့ရထားလမ်းဖောက်ခွဲခံထားရသော်လည်း ရထားခရီးစဉ်များကို ပုံမှန်အတိုင်း ပြန်လည်ပြေးဆွဲပေးသွားမည်ဖြစ်ကြောင်းသိရသည်။

နောက်ဆုံးရသတင်းတွေကို နေ့စဉ် အခမဲ့ဖတ်ရှုနိုင်ဖို့ သင့် အီးမေးလ်ကို ဒီနေရာမှာ စာရင်းသွင်းလိုက်ပါ။

* indicates required