ကာရာကတ်စ်၊ မေ ၁၆ ။            ။ ဗင်နီဇွဲလားနိုင်ငံတွင် လာမည့် မေ ၂၀ ရက်တွင် ကျင်းပမည်ဖြစ်သော ရွေးကောက်ပွဲအတွက် စစ်တပ်က ပြင်ဆင်လျက် ရှိနေသည်။

အဆိုပါ ရွေးကောက်ပွဲကို ဒီမိုကရေ မကျဟုဆိုကာ ပယ်ဖျက်ပစ်ရေးအတွက် လီမာအုပ်စုနိုင်ငံများက သမ္မတ နီကိုလပ်စ်မာဒူရိုကို တွန်းတိုက်လျက်ရှိသည်။

မေ ၂၀ ရက်တွင် ကျင်းပရန် ရှိသော အထွေထွေရွေးကောက်ပွဲများကို ဗင်နီဇွဲလားအနေဖြင့် ဆိုင်းငံ့ထားရန် လီမာအုပ်စုနိုင်ငံများက တိုက်တွန်းကြောင်း မက္ကဆီကို နိုင်ငံခြားရေးဝန်ကြီး ဗီဒီဂါရေးက မက္ကဆီကိုစီးတီးတွင် လီမာအုပ်စုနိုင်ငံများ အစည်းအဝေးအပြီး သတင်းစာရှင်းလင်းပွဲ၌ ပြောခဲ့သည်။

မြောက်နှင့် တောင်အမေရိက ၁၂ နိုင်ငံအုပ်စု၏ ကိုယ်စား ထုတ်ပြန်ချက်ကို ဗီဒီဂါရေးက ဖတ်ကြားရာတွင် “ယခု ရွေးကောက်ပွဲများသည် ဗင်နီဇွဲလားက အားလုံးသော နိုင်ငံရေးသမားများ မပါ၀င်ခြင်း၊ လွတ်လပ်သော နိုင်ငံတကာစောင့်ကြည့်မှု မရှိခြင်းနှင့် လွတ်လပ်သော၊ ပွင့်လင်းမြင်သာသော၊ ဒီမိုကရေစီကျသော လိုအပ်သည့် အာမခံချက်များ မပေးနိုင်ခြင်း။”စသည်တို့ ရှိနေသည့် ရွေးကောက်ပွဲများပဲ ဖြစ်ကြောင်း ဆိုထားသည်။

အစောပိုင်း ရွေးကောက်ပွဲများကိုလည်း ဗင်နီဇွဲလား အတိုက်အခံဖက်က သပိတ်မှောက်ထားပြီး နိုင်ငံတကာအသိုက်အဝန်းအများစုကလည်း တရားမဝင်ဟု ရှုတ်ချထားသည်။

လက်ဝဲသဘောထားတင်းမာသူ ဟူဂိုချာဗက်ဇ်၏ အရိုက်အရာကို ဆက်ခံသော သမ္မတ မာဒူရိုလက်ထက်တတွင် တစ်ချိန်က ရေနံကြောင့် ကြွယ်ဝသည့် ဗင်နီဇွဲလား စီးပွားရေးမှာ ချွတ်ခြံုကျနေသည်။

လီမာအုပ်စုနိုင်ငံများကို ပြီးခဲ့သည့်နှစ်က အာဂျင်တီးနား၊ ဘရာဇီး၊ ကနေဒါ၊ ချီလီ၊ ကိုလံဘီယာ၊ ကိုစတာရီကာ၊ ဂွါတီမာလာ၊ ဟွန်ဒူးရပ်စ်၊ မက္ကဆီကို၊ ပနားမား၊ ပရာဂွေးနှင့် ပီးရူးနိုင်ငံများက စတင်ဖွဲ့စည်းတည်ထောင်ခဲ့ခြင်း ဖြစ်သည်။