မေ ၆ ။ ။ ရန်ကုန်တိုင်းဒေသကြီးအတွင်း ဓာတ်အားလိုင်းသစ်ကြိုးအသစ်များကို မေလ ၈ ရက်နှင့် ၁၀ ရက်များတွင် လှဲလှယ်တပ်ဆင်မည် ဖြစ်၍ လျှပ်စစ်မီးယာယီပြတ်တောက်နိုင်ကြောင်း မြန်မာ့လျှပ်စစ်ကော်ပိုရေးရှင်း (YESC )မှ ထုတ်ပြန်ထားသည်။
ရေရှည်ဓာတ်အားတည်ငြိမ်ပြည့်ဝစွာပေးနိုင်ရေးအတွက် ဟောင်းနွမ်း၍ ဝန်အားမနိုင်တော့သော (၁၁)ကေဗွီဓာတ်အားလိုင်းကြိုးများအား လျှပ်ကာပါသော ဓာတ်အားလိုင်းကြိုးအသစ်များဖြင့် လဲလှယ်ခြင်းလုပ်ငန်းများကို မေလ ၈ ရက်နှင့် ၁၀ ရက်တို့တွင် နံနက် ၉:၀၀)နာရီမှ နေ့လည် ၁၂ နာရီအချိန်အထိ လုပ်ဆောင်သွားမည်ဟု သိရသည်။
ထို့ကြောင့် ရန်ကုန်တိုင်းဒေသကြီးအတွင်းရှိ အင်းစိန်၊ မင်္ဂလာဒုံ၊ လှိုင်သာယာ၊ ရွှေပြည်သာ၊ လှည်းကူး၊ မှော်ဘီ၊ တိုက်ကြီး၊ ထောက်ကြန့် ၊ ဥက္ကံ၊ ဒါးပိန်၊ ဖောင်ကြီး၊ အင်းတိုင်၊ မြောင်းတကာ၊ ရွှေလင်ပန်း၊ ထန်းတပင်၊ မြောက်ဥက္ကလာ၊ ရွှေပေါက္ကံ၊ တွံတေး၊ ဒလ၊ ကော့မှူး၊ ကွမ်းခြံကုန်း၊ သန်လျင် မြို့နယ်များတွင် အချိန်ပိုင်း လျှပ်စစ်မီးပြတ်တောက်မည် ဖြစ်သည်။
အဆိုပါကိစ္စနှင့်ပတ်သက်ပြီး ဓာတ်အားပြတ်တောက်မှုလျော့နည်းစေရန်အတွက် ကြိုတင်ပြင်ဆင်ဆောင်ရွက်ရခြင်းဖြစ်ပါသဖြင့် ယာယီဓာတ်အားပြတ်တောက်ရခြင်းအတွက် လူမှုရေးအခက်အခဲများ ပေါ်ပေါက်လာနိုင်မှုအပေါ် နားလည်ခွင့်လွှတ်ပေးပါရန် ရန်ကုန်လျှပ်စစ်ဓာတ်အားပေးရေးကော်ပိုရေးရှင်းမှ မေလ ၄ ရက်က အသိပေးပန်ကြားထားသည်။
ဧပြီလ ၁၇ ရက်က ပြောကြားသော နိုင်ငံတော်သမ္မတ၏ မိန့်ခွန်းတွင် လာမည့် ၃ နှစ်အတွင်း လျှပ်စစ်ပမာဏ နှစ်ဆတိုးမြှင့်ထုတ်သွားမည်ဖြစ်ပြီး ဓာတ်အားလိုင်းကို တိုးချဲ့ဖြန့်ဖြူးပေးမည်ဟု ပြောကြားထားသည်။