ရန်ကုန်၊ ဧပြီလ ၃ဝ ။ ။ FDA ဝန်ထမ်း ဒုတိယဦးစီးမှူး အမျိုးသမီး အဓမ္မပြုကျင့်သတ်ဖြတ်ခံခဲ့ရသည့် အမှုတွင် တရားရင်ဆိုင်နေရသည့် မျိုးဇော်ဦး(ခ) ဆီဒိုးနားဆိုသူအား ယနေ့ ဧပြီလ ၃ဝ ရက်နေ့ ရုံးချိန်းတွင် သေဒဏ်ထိ ပြစ်ဒဏ်ချမှတ်နိုင်သော ပုဒ်မဖြင့် စွဲချက်တင် အမိန့်ချလိုက်သည်။
ယနေ့ ဧပြီလ ၃ဝ ရက်၊ ရန်ကုန်အရှေ့ပိုင်းခရိုင်တရားရုံးတွင် မျိုးဇော်ဦး(ခ) ဆီဒိုးနားဆိုသူအား ၁၁ ကြိမ်မြောက် ရုံးထုတ်စစ်ဆေးခဲ့ပြီး ယင်းအမှုနှင့် ပတ်သက်၍ မျိုးဇော်ဦးအား ခရိုင်တရားသူကြီးက ရာဇသတ်ကြီးဥပဒေပုဒ်မ- ၃ဝ၂ (၁)(ဂ)ဖြင့် စွဲချက်တင်ကြောင်း အမိန့်ချမှတ်ခဲ့ခြင်းဖြစ်သည်။
ထိုသို့ သေဒဏ်ထိ ပြစ်ဒဏ်ချမှတ်နိုင်သော ပုဒ်မ- ၃ဝ၂ (၁)(ဂ)ဖြင့် စွဲချက်တင်ခဲ့ခြင်းမှာ တရားပြသက်သေများ စစ်ဆေးချက်နှင့် ဆေးစစ်ချက်အရ မျိုးဇော်ဦးဆိုသူက FDA ဝန်ထမ်းအမျိုးသမီးထံမှ လက်ဝတ်လက်စားများ လုယက်ခဲ့သည့်အပြင် ဓမ္မတာနှင့်ဆန့်ကျင်သည့် မုဒိန်းမှုအားကျူးလွန်နေစဉ် လူသတ်မှုကိုပါ ကျူးလွန်ခဲ့သည်ဟု ယုံကြည်သည့်အတွက် ခရိုင်တရားသူကြီးက စွဲချက်တင်အမိန့်ချမှတ်ခဲ့ခြင်းဖြစ်ကြောင်း သိရသည်။
ထိုသို့ စွဲချက်တင် အမိန့်ချမှုနှင့်ပတ်သက်ပြီး မျိုးဇော်ဦး(ခ)ဆီဒိုးနားဆိုသူက ငြင်းဆိုခဲ့သည့်အတွက် လာမည့် မေလ ရ ရက်နေ့တွင် တရားလိုပြသက်သေ ဒုရဲအုပ် ယာချမ်းမြေ့အောင်ကို ပြန်ခေါ်သက်သေအဖြစ်စစ်ဆေးရန် တရားရုံးမှ ပြန်လည်ချိန်းဆိုလိုက်သည်။
အဆိုပါ အမှုနှင့် ပတ်သက်ပြီး ပြီးခဲ့သည့် ဧပြီလ ၂ ရက်နေ့က မြောက်ဥက္ကလာပဆေးရုံမှ မှုခင်းဆရာဝန်ကြီး၊ အထူးကုဆရာဝန် ဒေါက်တာထွန်းလင်းထွန်းက လာရောက်ထွက်ဆိုခဲ့ရာတွင် ဆေးစစ်ချက်အရ အမျိုးသမီး အင်္ဂါအတွင်း ထိုးသွင်းထားသောလက္ခဏာ ရှိသော်လည်း သုက်ပိုးမတွေ့ရကြောင်း တရားခွင်တွင် ထွက်ဆို ခဲ့သည်။
မျိုးဇော်ဦးဆိုသူကိုလည်း ဇန်နဝါရီလ ၂၆ ရက်နေ့တွင် ခေါ်ယူ ဆေးစစ်ချက်အရ မျိုးဇော်ဦး ခန္ဓာကိုယ်ပေါ်၌ ပြင်ပဒဏ်ရာများ တွေ့ရှိရပြီး အမျိုးသားသုက်ပိုးကိုမှု တွေ့ရှိခြင်းမရှိကြောင်း မှုခင်းဆရာဝန်က ထွက်ဆိုခဲ့သည်။ FDA ဝန်ထမ်းအမျိုးသမီး သေဆုံးရခြင်း အဓိကအချက်မှာ မှုခင်းဆရာဝန်ထွက်ဆိုချက်အရ လည်ပင်းပတ် လည်အား တင်းကြပ်အောင် ဖိနှိပ်ခံထားရသည့်အတွက် လည်ပင်းအရှေ့ဘက် အရိုးငယ်ကျိုးတဲ့ဒဏ်ရာ၊ လည်ပင်းကြွက်သားတွင် သွေးသွန်၊ သွေးခြေဥ၊ ဖူးရောင်မှုများ တွေ့ရှိရကြောင်း သိရသည်။
ထို့ပြင် ရင်ဘတ် ဖူးရောင်ဒဏ်ရာများ တွေ့ရကာ ရင်ညွှန့်မှာ ကျိုးနေသည့်အတွက် လည်ပင်းနှင့် လည်ပင်း အောက်ရှိ အသက်ရှုပြွန်များပိတ်ဆို့နေပြီး အသက်မရှုနိုင်ခြင်း၊ အဆုတ်နှင့် ရင်ခေါင်းကြွက်သားများ အလုပ်မလုပ်နိုင်ခြင်းကြောင်း သေဆုံးခဲ့ခြင်းဖြစ်သည်။