ရန်ကုန်တိုင်းဒေသကြီး၊ လှိုင်သာယာမြို့နယ်၊ ထိန်ပင်သုဿန်အနီးရှိ အမှိုက်ပုံမီးလောင်မှုအား တပ်မတော်သားများအပါအဝင် လူအင်အား ၆၀၀ ဝန်းကျင်ဖြင့် မီးငြှိမ်းသတ်နေကြောင်း သိရသည်။
ဧပြီလ ၂၅ ရက်နေ့တွင် လှိုင်သာယာအမှိုက်ပုံမီးလောင်ကျွမ်းနေသောနေရာတွင် ရန်ကုန်တိုင်းမီးသတ်ဦးစီးမှူး ဦးမျိုးဝင်းက ပြောခဲ့ခြင်းဖြစ်သည်။
၅ ရက်ခန့် ကြာမြင့်နေပြီဖြစ်သော အဆိုပါမီးလောင်မှုကို သန္ဓေမီးသတ်တပ်ဖွဲ့ဝင် ၃၀၆ ဦး၊ အရန်မီးသတ်တပ်ဖွဲ့ဝင် ၁၅၀ ဦး၊ တပ်မတော်သား ၁၅၀ ဦး စုစုပေါင်း အင်အား ၆၀၀ ကျော်ဖြင့် ငြှိမ်းသတ်နေသည်။
ရန်ကုန်တိုင်းဒေသကြီး လှိုင်သာယာမြို့နယ်၊ ထန်းတပင်၊ မြောက်ဥက္ကလာမြို့နယ်၊ ကြည့်မြင်တိုင်မြို့နယ်၊အလုံမြို့နယ်၊ ကျောက်တံတား၊ တာမွေ၊ တောင်ဥက္ကလာ၊ ဒဂုံမြို့သစ်မြောက်ပိုင်းမြို့နယ်များမှ မီးသတ်တပ်ဖွဲ့ဝင်များက အလှည့်ကျစနစ်ဖြင့် လာရောက်ငြိှမ်းသတ်နေခြင်း ဖြစ်သည်။
"တပ်ဖွဲ့ဝင်တွေကို အလှည့်ကျစနစ်နဲ့ တစ်ဖွဲ့ဝင်၊ တစ်ဖွဲ့နား အဲဒီလိုမျိုးနဲ့ Man Power မကျသွားအောင် ဆောင်ရွက်ပေးလျက်ရှိပါတယ်"ဟု ရန်ကုန်တိုင်းမီးသတ်ဦးစီးမှူး ဦးမျိုးဝင်းက ဆိုသည်။
မီးငြှိမ်းသတ်ရာတွင် သန္ဓေမီးသတ်တပ်ဖွဲ့ဝင်များတွင် ကျန်းမာရေးထိခိုက်မှုမရှိဘဲ လူနေရပ်ကွက်များတွင် မီးခိုးမွှန်မှုများကြားမိသည်ဟု ဦးမျိုးဝင်က ပြောသည်။
မီးသတ်တပ်ဖွဲ့ဝင်များအပြင် တပ်မတော်မှလည်း မီးငြှိမ်းသတ်ရန်အတွက် ယာဉ် ၁၄ စီး အပါအဝင် ယာဉ်အစီးရေ ရ၃ စီး၊ အပေါ့စားရေစုပ်စက် အလုံး ၃၀ တို့ဖြင့် လုပ်ကိုင်နေကြောင်း သိရသည်။
"ဒီဘက်ခြမ်းမှာဒါက ဟိုဘက်မှာဆိုရင်မီးသတ်တပ်ဖွဲ့ ဒီဘက်ကနေပြီးတော့မှ ဝိုင်းပြီးအားလုံးမီးသတ်ပေးတာပေါ့"ဟု လှိုင်သာယာမြို့နယ် ရန်ကုန်တိုင်းစစ်ဌာနချုပ်မှ ဗိုလ်မှူးဇေယျက ပြောသည်။
လက်ရှိအချိန်တွင် ရန်ကုန်မြို့တော်စည်ပင်၏ ဘတ်ဂျက်ငွေဖြင့် မီးခိုးထွက်မှုနှင့် ပြန်လည်လောင်ကျွမ်းမှုမဖြစ်စေမည့် Class A အမျိုးအစား Bio Form ဂါလန် ၁၈၀၀ ကို နိုင်ငံခြားမှ မှာယူထားသည်ဟု သိရသည်။
မီးစတင်လောင်ကျွမ်းခဲ့သည့် ဧပြီ ၂၁ ရက်နေ့မှ ဧပြီ ၂၅ ရက် အတွင်း မီးငြှိမ်းသတ်ရန်အသုံးပြုခဲ့သည့် ရေဂါလန်ပမာဏမှာ မရေတွက်နိုင်ကြောင်း၊ အမှိုက်ပုံအနီးရှိ ချောင်းများ၊ ကန်များမှ ရေများကိုပါ လက်ရှိအချိန်တွင်ရယူနေရသည့်အတွက် နောင်တစ်ချိန်မီးလောင်မှုများအတွက် ရေရရှိရန်အရင်းမြစ်များ ထားရှိရန်အတွက် သင်ခန်းစာဖြစ်ကြောင်မီးသတ်ဦးစီးမှူးက ဆိုသည်။
ရန်ကုန်တိုင်းဒေသကြီး လှိုင်သာယာမြို့နယ်ရှိ ဧက ၁၅၀ အကျယ် အမှိုက်ပုံသည် ဧပြီလ ၂၁ ရက်နေ့မှ စတင်လောင်ကျွမ်းခဲ့ပြီးတွင် လက်ရှိတွင် ဧက ၁၀၀ ခန့် လောင်ကျွမ်းလျှက် ရှိသည်။