အမေရိကန်နာမည်ကြီးဒီဂျေသမားများဖြစ်သည့် The Chainsmokers မှ ဦးဆောင်အဆိုတော်နှင့် သီချင်းရေး ဆရာဖြစ်သူ ဒရူးတက်ဂါ့တ်သည် အမေရိကန်တေးရေးဆရာ၊ စာရေးဆရာနှင့် ထုတ်ဝေသူများအဖွဲ့အစည်း (ASCAP) မှ ဂုဏ်ပြုချီးမြှင့်သော တစ်နှစ်တာအကောင်းဆုံး သီချင်းရေးဆရာဆုကို ဆွတ်ခူးခဲ့သည်။

“တကယ့်ကိုရူးလောက်ပါတယ်။ ဒီဆုပေးကိုပေးအပ်တဲ့သူတွေထဲမှာ ကျနော်အရမ်းကို လေးစားအားကျရတဲ့၊ အတုယူရတဲ့ အိုင်ဒေါလ်ကြီးတွေပါ၀င်ပါတယ်” ဟု ဒရူးက ဆုလက်ခံရယူစဉ်တွင် ပြောကြားခဲ့သည်။

သူသည် ဆုလက်ခံရယူစဉ်တွင် အခြားနာမည်ကြီးသီချင်းရေးဆရာများဖြစ်ကြသော မက်စ်မာတင်နှင့် စတိဗ် မက်တို့ကိုလည်း နှုတ်ဆက်ခဲ့သလို အမေရိကန်တေးရေးဆရာ စတာရာကိုလည်း ချီးကျူးစကားပြောဆိုခဲ့ သည်။

“ခင်ဗျားတို့သိလား။ ဒီလိုမျိုးတေးရေးဆရာဆုကို ဆွတ်ခူးလိုက်ချိန်မှာ ကျနော်ဟာ တေးရေးခြင်းနဲ့ပက်သက်လို့ ထူးချွန်မယ်လို့တော့ ထင်နေကြပါလိမ့်မယ်။ တကယ်တော့ ကျနော်ဟာ ဘာမှကိုပြည့်ပြည့်စုံစုံမသိသေးပါဘူး” ဟုလည်း သူက နှိမ့်ချပြောဆိုခဲ့သည်။

“ကျနော်ဖန်တီးလိုက်တဲ့ သီချင်းတိုင်းနဲ့ပက်သက်လို့ အားပေးမှုရပါ့မလားလို့ ကြောက်စိတ်ဝင်ခဲ့ဖူးပါတယ်။ အောင်မြင်မယ့်၊ ပေါက်သွားမယ့် သီချင်းတွေကို ကျနော်ဆက်လက်ဖန်တီးနိုင်ဦးမလားတော့ မသိပါဘူး။ ဒါပေမယ့် ကျနော်နဲ့ ကျနော့်ရဲ့ဘော်ဒါကြီး အဲလက်စ်ပယ်လ်တို့ဟာ သီချင်းတွေတော့ ဆက်လက်ဖန်တီးနေဦး  မှာပါ။ ဒါအရိုးသားဆုံးပြောတာပါ” ဟု ဒရူးက ဆိုခဲ့သည်။

ဒါ့အပြင် ဒရူးသည် Don’t Let Me Down ၊ Sick Boy နှင့် Everybody Hates Me တို့ကဲ့သို့သော ပေါက်သီချင်း များကို ကူညီရေးသားပေးခဲ့သည့် အခြားတေးရေးဆရာမတစ်ဦးဖြစ်သည့် အမ်မလီဝါရန်ကိုလည်း ကျေးဇူးတင် စကားပြောကြားခဲ့သည်။

ဒရူးက သူသည် အမ်မလီကြောင့် မိမိတွင် ကိုယ်ပိုင်တေးသီချင်းများ ရေးစပ်နိုင်သည့်စွမ်းရည်ရှိသည်ဟု ယုံကြည်မှုရရှိခဲ့ကြောင်းနှင့် လမ်းကြောင်းမှန်ပေါ်ကို ရောက်ရှိခဲ့ခြင်းဖြစ်သည်ဟု ပြောခဲ့သည်။

Ref: Billboard