ထရမ့်ကိုသာ သမ္မတအဖြစ်မဲပေးဖြစ်မည်ဟု ပြောဆိုခဲ့မှုအတွက် အဆိုတော် ရှနိုင်းယားတွိန်း တောင်းပန်

ထရမ့်ကိုသာ သမ္မတအဖြစ်မဲပေးဖြစ်မည်ဟု ပြောဆိုခဲ့မှုအတွက် အဆိုတော် ရှနိုင်းယားတွိန်း တောင်းပန်

ကနေဒါနာမည်ကြီးအဆိုတော် ရှနိုင်းယားတွိန်းက သူမအနေဖြင့်မဲပေးခွင့်ရှိခဲ့လျှင် လွန်ခဲ့သော ၂၀၁၆ခုနှစ် သမ္မတရွေးကောက်ပွဲတွင် ဒေါ်နယ်ထရမ့်ကိုသာ မဲပေးဖြစ်လိမ့်မည်ဟု ပြောဆိုခဲ့မှုအတွက် ပြန်လည်တောင်းပန် ခဲ့ရသည်။

အမေရိကန်၌မဲပေးခွင့်မရှိသော နာမည်ကြီးကနေဒါအဆိုတော်က သူမသည် ဒေါ်နယ်ထရမ့်၏ ရိုးသားမှုကို အသိအမှတ်ပြု သဘောကျသောကြောင့် အခွင့်အရေးရပါက မဲပေးမည်ဟု ဂါးဒီးယန်းသတင်းစာသို့ ပြောခဲ့ခြင်း ဖြစ်သည်။

“သူ့ကိုပဲ ကျမ မဲပေးဖြစ်ပါလိမ့်မယ်။ ဘာလို့လဲဆိုတော့ သူရဲ့အပြုအမူတွေဟာ စိတ်အနှောင့်အယှက်ဖြစ်စရာ ဆိုပေမယ့်လည်း သူက ရိုးသားပုံပေါ်ပါတယ်။ ရှင်တို့အနေနဲ့ ရိုးသားဖြောင့်မတ်တာကို ကြိုက်လား၊ ယဉ်ကျေး တာကို သဘောကျသလား” ဟု သူမက ပြောဆိုခဲ့ခြင်းဖြစ်သည်။

ထိုပြောဆိုမှုသည် လူမှုမီဒီယာပေါ်၌ ဂယက်ထသွားခဲ့ပြီးနောက်တွင် သူမက ထိုမှတ်ချက်စကားများသည် သူမ၏တန်ဖိုးကို ကိုယ်စားပြုသော စကားများမဟုတ်ကြောင်း ပြန်လည်တုံ့ပြန်ခဲ့သည်။ သူမသည် ဂါဒီးယန်းနှင့် အတူ လွန်ခဲ့သော ၂၀၀၂ ခုနှစ်က သူမ၏ ပထမဦးဆုံး နယ်လှည့်ဖျော်ဖြေမှုအား အဓိကထား၍ အင်တာဗျူးခဲ့ ခြင်းဖြစ်သည်။ သို့သော်လည်း သမ္မတထရမ့်နှင့်ပက်သက်၍ ပြောဆိုခဲ့သော သူမ၏မှတ်ချက်အား မီဒီယာများက အဓိကပစ်မှတ်ထား၍ ဖော်ပြခဲ့ကြခြင်းဖြစ်သည်။

ရှနိုင်းယားတွိန်းက “ကျမကြောင့် စိတ်အနှောင့်အယှက်ဖြစ်ခဲ့ရသူတွေကို တောင်းပန်ပါတယ်။ မမျှော်လင့်ပဲ မေးလိုက်တဲ့မေးခွန်းအပေါ် ကျမရဲ့ဖြေကြားခဲ့မှုအတွက် နောင်တရမိပါတယ်။ ကျမဖြေရှင်းဖို့ ကြိုးစားခဲ့ပါတယ်။ ကျမရဲ့အဖြေဟာ ကသိကအောက်ဖြစ်စေခဲ့မယ်ဆိုရင် တောင်းပန်ပါတယ်” ဟု သူမ၏တွစ်တာ၌ ရေးသားကာ တောင်းပန်ခဲ့သည်။

အသက် ၅၂ အရွယ်ရှိ ၀ါရင့်အဆိုတော်ကြီး၏ မှတ်ချက်သည် လစ်ဘရယ်ဝါဒီများကို အံ့သြမှင်သက်စေခဲ့သလို အမျက်ထွက်စေခဲ့သော်လည်း ကွန်ဆာဗေးတစ်ဝါဒီများကမူ ကြိုဆိုခဲ့ကြသည်။

ရှနိုင်းယားတွိန်းသည် You’re Still The One အပါအဝင် ပေါက်သီချင်းများစွာကိုသီဆိုခဲ့သော နာမည်ကြီး အဆိုတော်တစ်ဦးဖြစ်သည်။

Ref: BBC

နောက်ဆုံးရသတင်းတွေကို နေ့စဉ် အခမဲ့ဖတ်ရှုနိုင်ဖို့ သင့် အီးမေးလ်ကို ဒီနေရာမှာ စာရင်းသွင်းလိုက်ပါ။

* indicates required