ဘာလင်မြို့လယ်တွင် ဒုတိယကမ္ဘာစစ်ကျန် ဗုံးတွေ့၍ လူအများအပြား ဘေးလွတ်ရာ ရွှေ့ပြောင်းပေးထား

ဘာလင်မြို့လယ်တွင် ဒုတိယကမ္ဘာစစ်ကျန် ဗုံးတွေ့၍ လူအများအပြား ဘေးလွတ်ရာ ရွှေ့ပြောင်းပေးထား

 

ဘာလင်၊ ဧပြီ ၂၀ ။             ။ ဒုတိယကမ္ဘာစစ် လက်ကျန်ဗုံး တွေ့ရှိ၍ ဘာလင်က အချက်အခြာ ရထားဘူတာရုံ ပတ်လည်ရှိ လူထောင်ပေါင်းများစွာကို ဧပြီ ၂၀ ရက်က ဂျာမနီရဲများက ဘေးလွတ်ရာသို့ ရွှေ့ပြောင်းပေးမှုများ စတင်လုပ်ဆောင်နေသည်။

ဆောက်လုပ်ရေးလုပ်ကွက်တစ်ခုအတွင်း ဒုတိယကမ္ဘာစစ်ကျန် ဗုံးတစ်လုံး တွေ့ရှိခြင်းဖြစ်ပြီး ဗုံးရှင်းလင်းရေး ပညာရှင်များက စနစ်တံ ဖြုတ်ရေး ပြင်ဆင်လုပ်ဆောင်လျက်ရှိခြင်းကြောင့် ယခုကဲ့သို့ လူများကို ဘေးလွတ်ရာ ရွှေ့ပြောင်းပေးနေရခြင်း ဖြစ်သည်။

စစ်ပြီး နှစ် ရ၀ ကျော်အကြာတွင် တွေ့ရှိသည့် ဗြိတိန်လုပ် ပေါင် ၁၁၀၀ ဗုံးကို ရှင်းလင်းဖယ်ရှားေတော့မည့် လုပ်ငန်းစဉ်ကို ရဲဌာနက အသံချဲ့စက်များဖြင့် ပြောဆိုကြေညာလျက်ရှိနေရာ ရထားများ၊ ဓာတ်ရထားများနှင့် ဘတ်စ်ကားများ ရပ်နားထားခြင်း၊ လမ်းကြောင်းပြောင်း ပြေးဆွဲခြင်းများ ဖြစ်ပွားသည်။

ပုံမှန်ရက်တိုင်း တစ်နေ့ကို ခရီးသည် သုံးသိန်းအထိ ရှိတတ်သည့် သယ်ယူပို့ဆောင်ရေး အချက်အခြာ ဘာလင်ဘူတာကြီး၏ မြောက်ဖက် ဗုံးတွေ့ရှိရာ ဆောက်လုပ်ရေးလုပ်ကွက်၏ ပတ်လည် အချင်း မီတာ ၈၀၀ အဝန်းအဝိုင်းကို အထူးဇုန်အဖြစ် အာဏာပိုင်များက သတ်မှတ်ကြေညာထားသည်။

အဆိုပါ အထူးဇုန်အတွင်း ရထားဘူတာရုံ၊ စစ်ဆေးရုံတစ်ရုံ၊ စီးပွားရေးဝန်ကြီးဌာန၊ ပန်းချီပြခန်းနှင့် ပြတိုက်တစ်ခုတို့ပါ ရှိနေပြီး BND ထောက်လှမ်းရေးဌာန၏ ရုံးချုပ်သစ်ပါ ရှိနေခြင်း ဖြစ်သည်။

ဗုံးအား ရှင်းလင်းပြီးချိန်အထိ ဘေးလွတ်ရာ အရပ်တွင် မြို့နေများနှင့် အလုပ်သမားများ နေရဦးမည်ဖြစ်ပြီး ရဲက အလုံးစုံ ရှင်းလင်းကြောင်း ကြေညာချက်ထုတ်ပြီးမှ ပြန်ကြရမည်ဖြစ်သည်။

ဗုံးရှင်းလင်းရေး ပညာရှင်များ၏ လုပ်ငန်းစဉ် မစတင်မီ အထူးဇုန်အတွင်း လူသူလေးပါး ရှိမရှိကို ရဲက တစ်အိမ်တက်ဆင်း စစ်ဆေးသွားမည်ဖြစ်သည်။ ထိုသို့ ရွှေ့ပြောင်းပေးရသူများအတွက် ယာယီခိုလှုံရေးစခန်းများကိုလည်း ဖွင့်လှစ်ထားပြီး ဖြစ်သည်။

Mizzima Weekly