ရန်ကုန်လမ်းလျှောက်သင်္ကြန် (၄)နေရာ ကျင်းပမည်

ရန်ကုန်လမ်းလျှောက်သင်္ကြန် (၄)နေရာ ကျင်းပမည်

ရန်ကုန်၊ ဧပြီ ။             ။ ၁၃၇၉ခုနှစ် သင်္ကြန်ပွဲတော်တွင် လမ်းလျှောက်သင်္ကြန်ကို ရန်ကုန်မြို့ နေရာ (၄)နေရာ၌ ကျင်းပသွားမည်ဖြစ်ကြောင်း ရန်ကုန်မြို့တော်စည်ပင်သာယာရေးကော်မတီ လမ်းနှင့်တံတားဌာန၏ ဌာနစုမှူး ဦးသန်းဟုတ် က ပြောပြသည်။

"ဒီနှစ်မှာအရင်နှစ်ကမရှိတဲ့ လမ်းလျှောက်သင်္ကြန်နဲ့ စတုဒီသာကျွေးမွေးတဲ့အစီစဉ်ပေါ့ ။ အစီစဉ်ကလည်း လေးနေရာလောက်သီးခြားထွက်လာတာပေါ့"ဟု ဦးသန်းဟုတ် က ဆိုသည်။

သတင်းမီဒီယာအချို့တွင် လမ်လျှောက်သင်္ကြန် နေရာ(၃) နေရာဟုဖော်ပြထားသော်လည်း နေရာ (၄)နေရာတွင်ကျင်းပမည်ဖြစ်ကြောင်း ဦးသန်းဟုတ် က အတည်ပြုပြောလိုက်သည်။

"လမ်းလျှောက်သင်္ကြန် (၄)နေရာကတော့ မဟာဗန္ဓုလပန်းခြံလမ်း၊ နောက်တစ်နေရာက ဦးဥတ္တမပန်းခြံ ဦးဥတ္တမပန်းခြံဆိုတာ အခု Happy World နေရာ၊ နောက်တစ်နေရာက ကန်တော်ကြီး၊ နောက်တစ်နေရာက ဒီအနော်ရထာလမ်း"ဟု ဦးသန်းဟုတ် က ပြောသည်။

လမ်းလျှောက်သင်္ကြန်ကျင်းပမည့်အဖွဲ့များမှာ မတူညီသလို ကန်တော်ကြီးရှိ လမ်းလျှောက်သင်္ကြန်ပွဲ၌လည်း ရန်ကုန်မြို့တော်စည်ပင်သာယာရေးအဖွဲ့မှ ပါ၀င်မည်ဖြစ်သည်ဟု ဆိုသည်။

ရန်ကုန်မြို့တွင် လမ်းလျှောက်သင်္ကြန်ကို Yangon Splash Walk အဖွဲ့မှ ၂၀၁၆ခုနှစ်သင်္ကြန်တွင် လူပေါင်း ၂၀၀၀ ပါ၀င်ဆင်နွဲကာ စတင်ခဲ့သည်။ ၄င်းအဖွဲ့မှ ၂၀၁၇ခုနှစ်သင်္ကြန်တွင် ထပ်မံပြုလုပ်ခဲ့ပြီး ယခု ၂၀၁၈ခုနှစ်တွင်လည်း ကန်တော်ကြီးအတွင်း၌ ပြုလုပ်သွားရန် စီစဉ်နေသည်။

ယခုနှစ် ၁၃၇၉ ခုနှစ်သင်္ကြန်တွင် လမ်းလျှောက်သင်္ကြန်ကို ရန်ကုန်မြို့အပြင် မန္တလေးမြို့၊ နေပြည်တော်၊ ချောက်မြို့၊ ကလေးမြို့၊ မြစ်ကြီးနား၊ မော်လမြိုင်နှင့် အခြားသောမြို့များတွင် ပြုလုပ်မည်ဖြစ်သည်။

Mizzima Weekly