ရန်ကုန်၊ ဧပြီလ ၁၁ ။ ။ ထောင်ဒဏ် ၁၄ နှစ်ထိ ပြစ်ဒဏ်ချမှတ်နိုင်သော အစိုးရလျှို့ဝှက်ချက်များ အက်ဥပဒေ ပုဒ်မ- ၃ ဖြင့် တရားစွဲ စစ်ဆေးခံနေရသော ရိုက်တာ သတင်းထောက် ၂ ဦးကို စွဲချက်မတင်မီ အမှုမှလွှတ်ပေးရန် လျှောက်ထားမှု ပယ်ချခံရသည်။
ယနေ့ ဧပြီလ ၁၁ ရက်၊ ရန်ကုန်မြောက်ပိုင်းခရိုင်တရားရုံးတွင် ရိုက်တာသတင်းထောက် ကိုဝလုံးနှင့် ကိုကျော် စိုးဦးတို့ကို ၁၃ ကြိမ်မြောက်ရုံးထုတ်ခဲ့ပြီး ရန်ကုန်မြောက်ပိုင်းခရိုင်တရားသူကြီးက ပယ်ချခဲ့ခြင်း ဖြစ်သည်။
" ဒီနေ့ ကျွန်တော်တို့ ၂၅၃(၂)အရ လျှောက်ထားချက်ကို တရားရုံးကအမိန့်ချလိုက်တယ်။ အမိန့်ချတော့ ကျွန်တော်တို့လျှောက်ထားချက်ကို ပယ်တယ်ပေါ့ဗျာ။ ပယ်တယ်ဆိုတော့ ကျန်တဲ့ရုံးချိန်းတွေမှာ ဆက်ပြီးတော့ ကျန်သက်သေတွေကိုစစ်သွားမှာပါ။ ဘာကြောင်ပယ်လည်းဆိုတော့ သက်သေ ၈ ယောက်စစ်ဖို့ကျန်သေးတယ်။ နောက်တစ်ခါ ကျွန်တော်တို့ပြောဆိုသလို အခြေအမြစ်မရှိဘူးဆိုတာကလည်းမဟုတ်သေးဘူးပေါ့နော်။ ဒါကြောင့်သက်သေစစ်ဆေးဖို့ကျန်တယ်ဆိုပြီးပယ်တာပါ"ဟု သတင်းထောက်နှစ်ဦးဘက်မှ လိုက်ပါဆောင်ရွက်သူ တရားလွှတ်တော်ရှေ့နေ ဦးသန်းဇော်အောင်က ပြောသည်။
ရာဇဝတ် ကျင့်ထုံး- ၂၅၃(၂) အရ ရိုက်တာသတင်းထောက် ၂ ဦးဘက်မှ လိုက်ပါဆောင်ရွက်ပေးနေသည့် တရားလွှတ်တော်ရှေ့နေက သတင်းထောက် ၂ ဦးကို စွဲချက်မတင်မီ အမှုမှ တရားရှင် လွှတ်ပေးရန် ပြီးခဲ့သည့် မတ်လ ၂၈ ရက်နေ့က တရားခွင်တွင် လျှောက်ထားခဲ့ခြင်းဖြစ်သည်။
ရိုက်တာသတင်းဌာနမှ ကိုဝလုံး(ခ)ကိုသက်ဦးမောင်နှင့် ကိုကျော်စိုးဦး(ခ)ကိုမိုးအောင်တို့ကို မောင်တောမြို့နယ် လုံခြံုရေးရဲတပ်ဖွဲ့ အစီရင်ခံစာမိတ္တူတချို့တွေ့ရှိခဲ့ခြင်းကြောင့် ၂ဝ၁၇ ခုနှစ်၊ ဒီဇင်ဘာ ၁၂ ရက်၊ ည ၉ နာရီခန့် အချိန်တွင် အစိုးရလျှို့ဝှက်ချက်များ အက်ဥပဒေ ပုဒ်မ- ၃ ဖြင့် ဖမ်းဆီးခဲ့ခြင်းဖြစ်ပြီး အဆိုပါ ပုဒ်မဖြင့် ခရိုင်တရား ရုံးတွင် တရားစွဲတင်ကာ စတင်စစ်ဆေးနေခြင်းဖြစ်သည်။
သတင်းထောက် ၂ ဦးအား အဆိုပါ စာရွက်စာတမ်းများကို လုံခြံုရေးရဲတပ်ဖွဲ့ခွဲမှ ဒုတိယရဲမှူး မိုးရန်နိုင်နှင့် ရဲတပ် ကြပ်ကြီး ခင်မောင်လင်းတို့ ၂ ဦးက ပေးအပ်ခဲ့ခြင်းဖြစ်သည်။