ရန်ကုန်၊ ဧပြီလ ၅ ။ ။ ကချင်ပြည်နယ်၊ ဗန်းမော်ခရိုင်၊ ဗန်းမော်မြို့နယ်၊ စင့်ကင်ကျေးရွာမြောက်ဘက် ၇ မိုင်ခန့်အကွာရှိ နေရာမှ တရားမဝင် ထုတ်လုပ်ထားသည့် ကျွန်းခွဲသား ၂၂ တန်ကျော်အား ဖမ်းဆီးရမိခဲ့ကြောင်း သစ်တောဦးစီးဌာနမှ ယနေ့ ဧပြီလ ၅ ရက်တွင် သတင်းထုတ်ပြန်သည်။
ဗန်းမော်မြို့နယ်၊ သစ်တောဦးစီးဌာနမှ သစ်တောဝန်ထမ်းများအဖွဲ့က ဧပြီလ ၂ ရက်နေ့တွင် သစ်များကို တရားမဝင်ထုတ်လုပ်နေမှုများအား ရှာဖွေဖမ်းဆီးခဲ့ရာမှ အဆိုပါ ကျွန်းသစ်များကို ဖမ်းဆီးရမိခဲ့ခြင်းဖြစ်ကြောင်း သိရသည်။
အဆိုပါ စင့်ကင်ကျေးရွာမြောက်ဘက် ၇ မိုင်ခန့်အကွာ နေရာမှ တရားမဝင်ထုတ်လုပ်ထားသည့် အလေးချိန် ၂၂ ဒသမ ဝ၁၄၂ တန်ရှိ ကျွန်းခွဲသားဆိုဒ်စုံ ၈၈၃ ချောင်းအား ပိုင်ရှင်မဲ့ ဖမ်းဆီးရမိခဲ့ခြင်းဖြစ်သည်။
လက်ရှိတွင် ဖမ်းဆီးရမိခဲ့သည့် သစ်များနှင့် ပတ်သက်၍ ဆက်စပ်တရားခံများကို ဥပဒေနှင့်အညီ အရေးယူနိုင် ရန် စုံးစမ်းရှာဖွေလျက်ရှိကြောင်း သိရသည်။
အလားတူ ဧပြီလ ၃ ရက်နေ့ကလည်း စစ်ကိုင်းတိုင်းဒေသကြီး၊ ကသာခရိုင်၊ ကသာမြို့နယ်၊ ကျောက်ထုံးကြီး ကျေးရွာအနောက်ဘက်၊ လက်ပံဇင်ကျွန်းအနီးတွင် ၁၃ တန်ရှိ ကညင်သစ် ၁၁ လုံး ကိုပိုင်ရှင်မဲ့ဖမ်းမိခဲ့ပြီး ဧပြီလ ၂ ရက်နေ့တွင် မန္တလေးမြို့၊ အမရပူရမြို့နယ်၊ ရွှေကြက်ကျဘုရားတောင်ဘက်သဲဆိပ်အနီးတွင် Hino ၆ ဘီး ယာဉ်နှင့် Hino Ranger ၆ ဘီးယာဉ် ၂ စီးပေါ်မှ ၁ဝ တန်ကျော်ရှိ တရားမဝင်ပျဉ်းကတိုး/အင် ၅၀၀ ချောင်း အား ပိုင်ရှင်မဲ့ ဖမ်းဆီးရမိခဲ့ကြောင်း သိရသည်။
