ရုရှားသမ္မတရွေးကောက်ပွဲ၌ ပူတင် သောင်ပြိုကမ်းပြိုအနိုင်ရရှိ

ရုရှားသမ္မတရွေးကောက်ပွဲ၌ ပူတင် သောင်ပြိုကမ်းပြိုအနိုင်ရရှိ

 

မော်စကို၊ ရုရှား၊ မတ် ၁၉ ။             ။ တနင်္ဂနွေနေ့က ကျင်းပခဲ့သော ရုရှားသမ္မတရွေးကောက်ပွဲတွင် လက်ရှိသမ္မတ ဗလာဒီမာပူတင်သည် သက်သောင့်သက်သာအနိုင်ရရှိခဲ့ပြီး ရုရှားနိုင်ငံအား နောက်ထပ် ၆ နှစ်ခန့် ထပ်မံအုပ်ချုပ်ခွင့် ရရှိခဲ့ပြီဖြစ်သည်။

ရုရှားနိုင်ငံအား ဆယ်စုနှစ် ၂စုနီးပါးခန့် အုပ်ချုပ်ခဲ့သော ပူတင်သည် ပဏာမမဲရလာဒ်အရ စုစုပေါင်းမဲအရေ အတွက်၏ ၇၅ ရာခိုင်နှုန်းခန့်ကိုရရှိခဲ့ပြီး သူ၏ပြိုင်ဘက်များကိုကျော်ဖြတ်ကာ သောင်ပြိုကမ်းပြို အနိုင်ရရှိခဲ့ခြင်း ဖြစ်သည်။

သို့သော်လည်း အတိုက်အခံများက ယင်းရွေးကောက်ပွဲသည် မျှတမှုမရှိကြောင်း ပြင်းပြင်းထန်ထန် ဆန့်ကျင် ပြောဆိုနေကြသည်။

ရုရှားနိုင်ငံအား သမိုင်းဝင် ၄ ကြိမ်မြောက် အုပ်ချုပ်ခွင့်ရရှိခဲ့ပြီဖြစ်သော ပူတင်သည် လက်ရှိသမ္မတရွေးကောက်ပွဲ ၌ အခြားပြိုင်ဘက်ကိုယ်စားလှယ်လောင်း ၇ ဦးနှင့်အတူ ယှဉ်ပြိုင်ခဲ့ရခြင်းဖြစ်သည်။ သို့သော်လည်း ပူတင်ကို အဓိကယှဉ်ပြိုင်နိုင်သော အတိုက်အခံခေါင်းဆောင်တစ်ဦးဖြစ်သူ အလက်ဇီနေဗယ်လ်နီမှာမူ အချို့သော တရားရေးရာကိစ္စများကြောင့် ရုရှားသမ္မတရွေးကောက်ပွဲ၌ ပါဝင်ယှဉ်ပြိုင်ခွင့်မရှိသည့်အတွက် ပူတင်က ခြွင်းချက်မရှိ အနိုင်ရရှိခဲ့ခြင်းဖြစ်သည်ဟု အများက ယူဆလျက်ရှိသည်။

“မဲရလာဒ်ကိုကြည့်ချင်းအားဖြင့် ကျုပ်တို့ပြည်သူတွေရဲ့ မျှော်လင့်ချက်နဲ့ ယုံကြည်မှုတွေကို တွေ့မြင်နေရပါတယ် ကျုပ်တု့ိရဲ့အတွေးအမြင်တွေဟာ ကျုပ်တို့ရဲ့ကြီးမြတ်လှတဲ့နိုင်ငံကြီးနဲ့ ကျုပ်တို့ရင်သွေးတွေရဲ့ အနာဂတ်ကို ပြောင်းလဲပေးနိုင်မှာဖြစ်ပါတယ်” ဟု ပူတင်က ရွေးကောက်ပွဲ၌ အနိုင်ရရှိခဲ့အပြီးတွင် ကရင်မလင်နန်းတော် အနီးရှိရင်ပြင်၌ သူ့ကိုထောက်ခံသူများအား မိန့်ခွန်းပြောကြားစဉ်တွင် ထည့်သွင်းပြောဆိုခဲ့သည်။

ယခုသမ္မတရွေးကောက်ပွဲသို့ ရုရှားပြည်သူ ၁၀၇ သန်းခန့် လာရောက် မဲပေးခဲ့ကြကြောင်း ဗဟိုရွေးကောက်ပွဲ ကော်မရှင်အဖွဲ့က ထုတ်ပြန်ကြေညာခဲ့သည်။

ယင်းကော်မရှင်၏အဆိုအရ စုစုပေါင်းမဲအရေအတွက်၏ ထက်ဝက်ခန့်ကို ရေတွက်ပြီးချိန်တွင် ပူတင်သည် မဲအရေအတွက်၏ ၇၅ ရာခိုင်နှုန်းခန့်ကိုရရှိထားခဲ့ပြီး သူ့ကိုအနီးစပ်ဆုံးယှဉ်ပြိုင်နိုင်သူမှာ မဲအရေအတွက် ၁၃.၂ ရာခိုင်နှုန်းရရှိခဲ့သော ကွန်မြူနစ်ပါတီမှ ကိုယ်စားလှယ်လောင်းဖြစ်သူ ပေဗယ်လ်ဂရူဒီနင်ဖြစ်သည်ဟု သိရသည်။

နောက်ဆုံးရသတင်းတွေကို နေ့စဉ် အခမဲ့ဖတ်ရှုနိုင်ဖို့ သင့် အီးမေးလ်ကို ဒီနေရာမှာ စာရင်းသွင်းလိုက်ပါ။

* indicates required

Mizzima Weekly