အများနှင့်အကျုံးဝင်သော စီးပွားရေးလုပ်ငန်းများဆိုင်ရာ အလုပ်ရုံဆွေးနွေးပွဲပြုလုပ်

.

 

မတ်၁၇ ။          ။ DaNa Facility က အများနှင့်အကျုံးဝင်သော စီးပွားရေးလုပ်ငန်းများဆိုင်ရာ အလုပ်ရုံဆွေးနွေးပွဲကို မတ်လ ၁၅ ရက်က ရန်ကုန်မြို့ Prime Hill Business Square တွင် ပြုလုပ်ခဲ့သည်။

 အများနှင့်အကျုံးဝင်သော စီးပွားရေးလုပ်ငန်းများသည် စီးပွားရေးအရ ခိုင်မာစွာရပ်တည်နိုင်ကာ ဆင်းရဲ နွမ်းပါး သူများနှင့် ၀င်ငွေနိမ့်ပါးသူများအတွက် ကျယ်ပြန့်သည့် အတိုင်းအတာတစ်ခုဖြင့် တီထွင်ဆန်းစစ်မှုရှိသော စနစ် ကျသော နည်းလမ်းများဖြင့် ကူညီပေးနိုင်သော လုပ်ငန်းများဖြစ်သည်။

 ယူကေနိုင်ငံ၏ နိုင်ငံတကာဖွံ့ဖြိုးရေးဌာန DFIDသည် ငွေကြေးထောက်ပံ့ပေးထားသောအစီအစဉ်ဖြစ်သည့် DaNa Facility မှတဆင့် မြန်မာနိုင်ငံတွင် ယင်းလုပ်ငန်းများအကောင်အထည်ဖော်ရာတွင် အဆင်ပြေသည့် ပတ်ဝန်းကျင်တစ်ခုဖြစ်ပေါ်လာရေးအတွက် မူဝါဒပိုင်းဆိုင်ရာပံ့ပိုးမှုများ ဆောင်ရွက်ပေးလျက်ရှိကြောင်း သိရသည်။

 အဆိုပါလုပ်ငန်းများနှင့်ပတ်သက်ပြီး မြန်မာနိုင်ငံလူငယ်စွန့်ဦးတီထွင်လုပ်ငန်းရှင်များအသင်း ဒုတိယဥက္ကဋ္ဌ ဒေါက်တာ အောင်သူရက အခြေခံလူတန်စားများနှင့် စီးပွားရေးကို ပူးပေါင်းဆောင်ရွက်ပြီး  လုပ်ငန်းအတွက် သာမက အခြေခံလူတန်စားများအတွက်ပါ အကျိုးအမြတ်ရှိသော စီးပွားရေးလုပ်ငန်းမျိုးကို အားလုံးနှင့် အကျုံးဝင်သော စီးပွားရေး (Inclusive Business ) ဖြစ်သည်ဟု ဆိုသည်။

" Inclusive Business ဖြစ်ဖို့ နည်းလမ်းနှစ်မျိုးရှိတယ်။ ကိုယ့်ကုမ္ပဏီထဲမှာရှိတဲ့ ၀န်ထမ်းတွေ ဒါမှမဟုတ် ကိုယ့်က Produce တွေ Service တွေ ၀ယ်တာကျတော့ ဘယ်သူတွေဆီက ၀ယ်လဲဆိုတော့ အခြေခံလူ တန်းစားဆီက ၀ယ်တယ်။ ဒါမှမဟုတ် အခြေခံလူတန်းစားကို ၀န်ထမ်းအဖြစ် အလုပ်ခန့်တယ်။ ဒါပေမယ့် သာမန်လုပ်ငန်း ထက်စာရင် သူတို့ကို ပိုပြီးတော့ ကျန်တဲ့ ပျှမ်းမျှထက် လစာပိုပေးတာပဲဖြစ်ဖြစ် သူတို့ဆီက ဆားဗစ်တွေ Produce တွေ ၀ယ်တယ်ဆိုလဲ သာမန်ထက်ပိုပြီးတော့ ရာခိုင်နှုန်းပိုပြီးတော့ ပေးတယ်ပေါ့နော်။ အဲဒါဆိုရင် Inclusive Business ဖြစ်ပါတယ်။ ဒုတိယဟာက အခြေခံလူတန်းစားအတွက်ကို သေချာစဉ်းစားပြီး တော့ သူတို့ဘာ ပစ္စည်းတွေ ဘာထုတ်ကုန်တွေ၊ ဘာဝန်ဆောင်မှုတွေ လိုအပ်တယ်ဆိုတာကို စဉ်းစားပြီးတော့ သေချာထွင်ပြီးတော့ လုပ်ထားတဲ့ လုပ်ငန်းတွေကိုလည်း Inclusive Business (IB) လို့ခေါ်ပါတယ်" ဟု ယင်းက ဆက်လက်ပြောသည်။

 စီးပွားရေးဆိုင်ရာ အခွင့်အလမ်းများ ဖန်တီးခြင်း၊ ချဲ့ထွင်ခြင်းတို့သည်  ပုဂ္ဂလိကဏ္ဍအနေဖြင့် IB များကို ဖွံ့ဖြိုးမှုဖြစ်စေသည့် ချည်းကပ်လုပ်ဆောင်ပုံဖြစ်ပြီး IB လုပ်ငန်းများသည် ကုမ္ပဏီများအတွက် ဆုံးရှုံးနိုင်ခြေ နည်းနည်းနှင့် အမြတ်အစွန်း များများရစေခြင်း၊ နွမ်းပါးသူများအတွက် ပိုမိုကောင်းမွန်သော ၀င်ငွေနှင့် ၀န်ဆောင် များကို ရနိုင်စေခြင်း၊ အစိုးရအတွက် တိုင်းပြည်တွင် ဆင်းရဲနွမ်းပါးမှုလျှော့ပါးစေသည်ဟု ဆိုသည်။

ယူကေနိုင်ငံ၏ နိုင်ငံတကာဖွံ့ဖြိုးရေးဌာန မြန်မာနိုင်ငံဆိုင်ရာအကြီးအကဲ  ဒေါက်တာ ဂေးလ်မာဇက်တီက " မူဝါဒပိုင်းဆိုင်ရာ အကောင်အထည်ဖော်တာနဲ့ပတ်သက်ပြီး ကုမ္ပဏီဥပဒေတွေ လုပ်နေတယ်။ Finance မရှိသေး တဲ့အတွက် မူဝါဒပိုင်းဆိုင်ရာ အကောင်အထည်ဖော် တဲ့နေရာမှာ စိန်ခေါ်မှုလေးတွေဖြစ်နိုင်တယ်။ ဒါပေမယ့် အားလုံး ပူးပေါင်းဆောင်ရွက်ရင်တော့ အဆင်ပြေသွားမှာပါ "က ဟုဆိုသည်။

DaNa Facility သည် တာဝန်ယူမှုရှိသော အများနှင့်အကျုံးဝင်သော စီးပွားရေးလုပ်ငန်းများတွင် ရင်းနှီးမြှုပ်နှံလျက်ရှိပြီး မြန်မာနိုင်ငံအတွင်း အများနှင့် အကျုံးဝင်သော စီးပွားရေးလုပ်ငန်းများ ပေါ်လွင်စေရေးအတွက် ဈေးကွက် အတိုင်းအတာ လေ့လာမှုတစ်ခုကို လုပ်ဆောင်လျက်ရှိကြောင်း သိရသည်။