စီးပွားဖြစ် သင်္ကြန်မဏ္ဍပ်များ ရန်ကုန်တိုင်းအတွင်း ပြန်လည်ခွင့်ပြု

စီးပွားဖြစ် သင်္ကြန်မဏ္ဍပ်များ ရန်ကုန်တိုင်းအတွင်း ပြန်လည်ခွင့်ပြု
ဓာတ်ပုံ - သူရ

ရန်ကုန် ၊ မတ် ၁၇ ။                 ။ ရန်ကုန်တိုင်းဒေသကြီး အစိုးရမှ ထုတ်ပြန်ထားသော သြင်္ကန်မဏ္ဍပ်များ ဆောက်လုပ်ခွင့်နှင့် ပတ်သက် ပြီးလိုက်နာရမည့် စည်းကမ်းများတွင် ပိတ်ပင်ထားသည့် စီးပွားဖြစ်မဏ္ဍပ်များ ဆောက်လုပ်ခွင့်ကို နေရာအချို့မှ အပ ပြန်လည်ခွင့်ပြုပေးခဲ့သည်။

ထိုသို့ ခွင့်ပြုခဲ့သော်လည်း အဓိက လမ်းမကြီးများ ဖြစ်သော ကမ္ဘာအေးဘုရားလမ်း ၊ တက္ကသိုလ်ရိပ်သာလမ်း ၊ ကန်တော်ကြီးပတ်လမ်း တို့တွင် မဏ္ဍပ်ဆောက်လုပ်ခွင့် ပြုသွားမည် မဟုတ်ကြောင်း သိရသည်။

ပြီးခဲ့သည့် ၂၀၁၇ ခုနှစ် သြင်္ကန်ကာလအတွင်း၌ ရန်ကုန်တိုင်းအတွင်း စီးပွားဖြစ်သြင်္ကန်မဏ္ဍပ်များအား ဆောက် လုပ်ခွင့်ကို တိုင်းအစိုးရမှ ပိတ်ပင်ခဲ့ခြင်းကြောင့် မဏ္ဍပ်အရေအတွက် လျော့ကျခဲ့ပြီး သြင်္ကန်စည်ကားမှု နှုန်း လျော့ကျခဲ့သည်ဟု ဝေဖန်မှုများ ထွက်ပေါ်ခဲ့သည်။

ယခုထုတ်ပြန်ခဲ့သည့် စည်းကမ်းများသည် ယခင်နှစ်များနှင့် ကွာခြားမှုမရှိဘဲ မဏ္ဍပ်အမျိုးအစားအလိုက် တိုင်းအဆင့်နှင့် မြို့နယ်အဆင့်ရုံးများတွင် လျှောက်ထားရမည် ဖြစ်သပြီး မဏ္ဍပ်ဆောက်လုပ်သူများအနေဖြင့် မဏ္ဍပ်နေရာချထားရေးကော်မတီမှ သတ်မှတ်ပေးထားသည့် နေရာတွင်၌သာ ဆောက်လုပ်ခွင့် ရမည်ဖြစ်ပြီး နေရာလွှဲပြောင်းရောင်းချခြင်း မပြုရ ဆိုသည့် စည်းကမ်းချက်များ ပါဝင်သည်။

ယင်းအပြင် မဏ္ဍပ်၌ ရေကစားသူများအနေဖြင့်  မြန်မာ့ယဉ်ကျေးမှုဖြင့် မအပ်စပ်သည့် အပြုအမှုများ ၊ ဝတ်စား ဆင်ယင်မှုများ မပြုလုပ်ရန် တားမြစ်ထားပြီး သံချပ် ဖျော်ဖြေမည့် အဖွဲ့များအနေဖြင့်လည်း ဖျော်ဖြေမည့် အကြောင်းအရာများအား ကြိုတင် တင်ပြရမည်ဟု စည်းကမ်းသတ်မှတ်ထားသည်။

မဏ္ဍပ်ဆောက်လုပ်ခွင့်ရရှိပါက ပေးသွင်းရမည့် စပေါ်ငွေ ၊ မြေအသုံးပြုခ ၊ သန့်ရှင်းရေးဆောင်ရွက်ခ စသည့် သတ်မှတ်အခွန်အခများအား ပေးသွင်းပြီးမှသာ မဏ္ဍပ်ဆောက်လုပ်ခွင့်ပြုမိန့်ကို ရန်ကုန်မြို့တော် စည်ပင်သာယာရေး ကော်မတီ ၊ အင်ဂျင်နီယာဌာန(လမ်းနှင့်တံတား)က ထုတ်ပေးမည်ဖြစ်သည်။

၂၀၁၈ ခုနှစ် သြင်္ကန်အား မန္တလေး ၊ မုံရွာ ၊ ငပလီ စသည့် နေရာများတွင် စည်စည်ကားကားကျင်းပမည်ဟု သက်ဆိုင်ရာတိုင်းဒေသကြီးအစိုးရအဖွဲ့များက ကြေညာထားသည်။

 

Mizzima Weekly