ဒေါ်အောင်ဆန်းစုကြည်အား တရားစွဲရန် သြစတြေးလျရှေ့နေများက ကြိုးပမ်းသော်လည်း ပယ်ချခံရ

ဒေါ်အောင်ဆန်းစုကြည်အား တရားစွဲရန် သြစတြေးလျရှေ့နေများက ကြိုးပမ်းသော်လည်း ပယ်ချခံရ

 

မတ် ၁၇ ။              ။ နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်အား လူသားချင်းစာနာမှုအပေါ် ဖောက်ဖျက်ကျူးလွန်မှုဖြင့် သြစတြေးလျရှေ့နေများက တရားစွဲဆိုရန် ကြိုးပမ်းခဲ့သော်လည်း ပယ်ချခံခဲ့ရကြောင်း သတင်းတစ်ရပ်တွင် ဖော်ပြထားသည်။

ဒေါ်အောင်ဆန်းစုကြည်အား တရားစွဲရန် သြစတြေးလျရှေ့နေအဖွဲ့တစ်ခု၏ အဆိုပြုကြိုးပမ်းမှုကို သြစတြေးလျရှေ့နေချုပ် ခရစ်တီယန် ပေါ်တာက ခွင့်ပြုမပေးခဲ့ဘဲ ပယ်ချသွားခဲ့ကြောင်း သိရသည်။

လက်ရှိအချိန်တွင် သြစတြေးလျ ဝန်ကြီးချုပ် မယ်လ်ကွန် တန်းဘူးလ်က ဒေါ်အောင်ဆန်းစုကြည်အပါအဝင် အာဆီယံခေါင်းဆောင်များကို ၎င်း၏နိုင်ငံသို့ ဖိတ်ကြားပြီး အာဆီယံ-သြစတြေးလျ အထူးထိပ်သီးအစည်းအဝေးပွဲကြီးတစ်ရပ်ကို အိမ်ရှင်အဖြစ် လက်ခံကျင်းပနေလျက်ရှိနေသည်။

သြစတေးလျ နိုင်ငံသို့ ရောက်ရှိလာသည့် ဒေါ်အောင်ဆန်းစုကြည်အား လူသားချင်းစာနာမှုဆိုင်ရာ ကျူးလွန်မှု ပြစ်မှုများဖြင့် တရားစွဲရန် သြစတြေးလျ ဖယ်ဒရယ်တရားသူကြီးဟောင်းတစ်ဦးအပါအဝင်   ရှေ့နေငါးဦးပါ အဖွဲ့တစ်ခုက မယ်လ်ဘုန်းမြို့ တရားရုံးတစ်ခုသို့ ဦးတိုက်လျှောက်ထားခဲ့ကြောင်း သိရသည်။ သို့ရာတွင် ၎င်းတို့၏ ကြိုးပမ်းချက်ကို ရှေ့နေချုပ်က ပယ်ချသွားခဲ့သည်။

မြန်မာနိုင်ငံ ရခိုင်ပြည်နယ်တွင် ဘင်္ဂါလီ (မူရင်း ရိုဟင်ဂျာ ဟုဖော်ပြ) လူနည်းစုအပေါ် ကျူးလွန်သည့် လူသားချင်းစာနာမှုဆိုင်ရာ ပြစ်မှုများဖြင့် ဒေါ်အောင်ဆန်းစုကြည်အား တရားစွဲရန် အဆိုပါ သြစတြေးလျ ရှေ့နေများက ကြိုးပမ်းနေခဲ့ခြင်းဖြစ်သည်။

သို့သော် ဒေါ်အောင်ဆန်းစုကြည်အပေါ် တရားစွဲဆို၍ ရမည်မဟုတ်ကြောင်း သြစတြေးလျ ရှေ့နေချုပ် ခရစ်တီယန် ပေါ်တာက ပြောသွားသည်။

" ဒေါ်အောင်ဆန်းစုကြည် သြစတြေးလျရောက်နေချိန်မှာ ခုလို တရားစွဲဆိုခံရမှုအရေးကနေ ကင်းလွတ်ခွင့် အပြည့်အ၀ ရှိပါတယ်၊ ဘာလို့လဲဆိုတော့ နိုင်ငံတကာဥပဒေတွေအရ နိုင်ငံတွေရဲ့ အကြီးအကဲတွေ၊ အစိုးရအဖွဲ့ခေါင်းဆောင်တွေကို ခုလို နိုင်ငံရပ်ခြားမှာ တရားစွဲဆိုတာတွေ လုပ်လို့ မရပါဘူး၊ သူတို့ကို ဖမ်းဆီးခွင့် မရှိပါဘူး၊ တရားစွဲခွင့်လည်း မရှိပါဘူး" ဆိုပြီ သြစတြေးလျရှေ့နေချုပ်က the Guardian သို့ ပြောသွားသည်။

နောက်ဆုံးရသတင်းတွေကို နေ့စဉ် အခမဲ့ဖတ်ရှုနိုင်ဖို့ သင့် အီးမေးလ်ကို ဒီနေရာမှာ စာရင်းသွင်းလိုက်ပါ။

* indicates required