လူအခွင့်အရေးနှင့် လွတ်လပ်ခွင့်များအပေါ် ကမ္ဘောဒီးယားတွင် တင်းကြပ်ခြင်းအား ကုလသမဂ္ဂ စိုးရိမ်

.

ဖနွမ်းပင်၊ မတ် ၁၄ ။       ။ ကမ္ဘောဒီးယားနိုင်ငံတွင် လွတ်လပ်စွာ ထုတ်ဖော်ခွင့်၊ မီဒီယာများနှင့် နိုင်ငံရေးတက်ကြွလှုပ်ရှားမှုများအပေါ် တင်းကြပ်လာခြင်းနှင့် ပတ်သက်ကာ စိုးရိမ်ကြောင်း ဖော်ပြပြီးနောက် ကုလသမဂ္ဂက ကမ္ဘောဒီးယားနိုင်ငံအား လူ့အခွင့်အရေးကို လေးစားရန် မတ် ၁၄ ရက်တွင် ပြောဆိုတိုက်တွန်းလိုက်သည်။
ကမ္ဘောဒီးယားဆိုင်ရာ ကုလသမဂ္ဂ လူ့အခွင့်အရေးဆိုင်ရာ အထူးကိုယ်စားလှယ် အမျိုးသမီးဖြစ်သူ ရိုနာစမစ်က ယင်းနိုင်ငံသို့ ငါးကြိမ်မြောက် အလည်အပတ်ခရီးအပြီးတွင် ယခုကဲ့သို့ မှတ်ချက်ချခြင်း ဖြစ်သည်။
လူ့အခွင့်အရေးကို လေးစားလိုက်နာခြင်းသည် ငြိမ်းချမ်းရေးနှင့် ဖွံ့ဖြိုးမှုတို့ တာရှည်ခိုင်မြဲရေးအတွက် မရှိမဖြစ် ဖြစ်ကြောင်း ၎င်းက ပြောသည်။
“ကမ္ဘောဒီးယားနိုင်ငံဟာ အရေးကြီးတဲ့ လမ်းဆုံလမ်းခွမှာ ရပ်နေတော့တာ ဖြစ်ပါတယ်။”ဟု ထုတ်ပြန်ချက်တွင် ရိုနာစမစ်က ဆိုသည်။ 
“ကမ္ဘောဒီးယားရဲ့ အသံကို ချုပ်တည်းခံရခြင်းဟာ အစိုးရနဲ့ ပြည်သူတွေ ခက်ခက်ခဲခဲ တည်ဆောက်နေတဲ့ ခိုင်မာစွာ တည်ငြိမ်ရေးကို အဆုံးစွန်အထိ ခြိမ်းခြောက်နေပါတယ်။”ဟု ၎င်းက ပြောသည်။
အဖွဲ့အစည်းများ၊ လွတ်လပ်စွာ ထုတ်ဖော်ခွင့်နှင့် ငြိမ်းချမ်းစွာစုဝေးခွင့်များ လွတ်လပ်မှုကို ကာကွယ်ပေး တည်ဆောက်သင့်ကြောင်း၊ တင်းကြပ်ပိတ်ဆို့ရမည် မဟုတ်ကြောင်း၊ ကမ္ဘောဒီးယား၏ ဖွဲ့စည်းပုံအရ အာမခံပေးထားသော လစ်ဘရယ် ပါတီစုံ ဒီမိုကရေစီအတွင်းမှာ ရှိရမည်ဖြစ်ကြောင်း ရိုနာစမစ်က အလေးအနက် ပြောဆိုခဲ့သည်။
ကမ္ဘောဒီးယားတွင် အစိုးရက ဦးဆောင်ပြီး အတိုက်အခံများ၊ သဘောထားကွဲလွဲသူများကို နှိပ်ကွပ်နေခြင်းကို အမေရိကန်နှင့် ဥရောပသမဂ္ဂတို့က ဝေဖန်ထားပြီး ၂၀၁၈ ဇူလိုင်တွင် ကျင်းပရန်ရှိသည့် ရွေးကောက်ပွဲကို ကြီးကြပ်ရမည့် ရွေးကောက်ပွဲကော်မရှင်အတွက် ရန်ပုံငွေကိုလည်း ပြန်လည်ရုပ်သိမ်းထားသည်။ အဆိုပါ ရွေးကောက်ပွဲတွင် လက်ရှိဝန်ကြီးချုပ် ဟွန်ဆန်က နောက်ထပ်သက်တမ်းအတွက် ဝင်ရောက်အရွေးခံမည်ဖြစ်သည်။