မတ်လ ၁၄ ။ ။ ရခိုင်ပြည်နယ်ရှိ မြို့ရွာစီမံကိန်းရေးဆွဲခြင်း သို့မဟုတ် ပြန်လည်တည်ဆောက်ခြင်းလုပ်ငန်းစဉ်များတွင် မည်သည့် ကုလအဖွဲ့အစည်းကမှ ပါဝင်ပတ်သက်ခြင်းမရှိကြောင်း မတ်လ ၁၄ ရက်တွင် ကုလသမဂ္ဂမှ ကြေညာချက်ထုတ်ပြန်ခဲ့သည်။
သတင်းဌာနအချို့တွင် ဖော်ပြပါရှိသော ရခိုင်ပြည်နယ်သို့ နေရပ်ပြန်လာမည့်သူများအတွက် မြို့ပြနှင့် နယ်မြေကျေးရွာစီမံကိန်းရေးဆွဲခြင်းဆိုင်ရာ နိုင်ငံတကာဂိုက်လိုင်းများအပေါ် လွဲမှားသည့် ရည်ညွှန်း ကိုးကားမှုများနှင့်ပတ်သက်၍ မြန်မာနိုင်ငံရှိ ကုလသမဂ္ဂက ပြန်လည်ရှင်းလင်းလိုသည်ဟု ဖော်ပြထားသည်။
ပြည်တွင်းသတင်းတစ်ရပ်တွင် ကုလသမဂ္ဂ မြို့ရွာနှင့် အိုးအိမ်ဖွံ့ဖြိုးရေးအစီအစဉ် (UN-Habitat)၏ ပြန်လည်နေရာချထားရေးဆိုင်ရာ အကြံပြုချက်များ ရယူပြီး နေရာချထားမှုများ ဆောင်ရွက်နေသည်ဟု ဖော်ပြပါရှိခဲ့ပြီးနောက် ယင်းသို့ ကြေညာချက် ထုတ်ပြန်ခဲ့ခြင်း ဖြစ်သည်။
သတင်းဆောင်းပါးများတွင် လွဲမှားစွာ ဖော်ပြထားသကဲ့သို့ မြေနေရာ ရှင်းလင်းခြင်း သို့မဟုတ် ကျေးရွာများကို ပြောင်သလင်းခါအောင် ဖြိုဖျက်ညှိပစ်ခြင်းများ လုပ်ဆောင်ရန် တောင်းဆိုထားခြင်း မရှိဘဲ နေရပ်ပြန်လာမည့် သူများ၏ ပူးပေါင်းပါဝင်မှုဖြင့် အိမ်ယာပြန်လည်ဖော်ဆောင်ရေးအစီအစဉ်များကို လုပ်ဆောင်ရန်ကိုသာ အားပေးထားသည်ဟု ဖော်ပြပါရှိသည်။
ကုလသမဂ္ဂ မြို့ရွာနှင့် အိုးအိမ်ဖွံ့ဖြိုးရေးအစီအစဉ် (UN-Habitat)သည် အိမ်ယာနှင့် အဆောက်အအုံ မူလပိုင်ရှင်ထံ ပြန်လည်အပ်နှံခြင်းနှင့် မြို့ပြနှင့် နယ်မြေပိုင်နက် စီမံကိန်းရေးဆွဲခြင်းတို့နှင့်ပတ်သက်သည့် နိုင်ငံတကာ ဂိုက်လိုင်းလမ်းညွှန်ချက်စည်းကမ်းများကို လိုက်နာသည်ဟု ထုတ်ပြန်ချက်တွင် ပါရှိသည်။
လက်ရှိတွင် ကုလဘက်က မြန်မာနိုင်ငံရှိ လူသားနေရာချထားရေး စီမံကိန်းရေးဆွဲခြင်းနှင့် အိမ်ယာ တည်ေ ဆာက်ရေးတို့တွင် နိုင်ငံတကာ စံနှုန်းများနှင့် ကိုက်ညီစေရေးအတွက် အစိုးရကို ကူညီပံ့ပိုးပေးရန် ပြင်ဆင်လျက်ရှိသည်။ ထို့ပြင် ၎င်းတို့၏ မူလနေထိုင်ရာနေရာများသို့ ဘေးကင်း၊ လုံခြုံ၊ သိက္ခာရှိစွာ ပြန်လာနိုင်ရေး ကူညီပေးရန် ကုလဘက်က အသင့်ရှိနေသည်ဟုလည်း ဖော်ပြထားသည်။